今早係酒店食自助早餐，種類唔算太多，我都係食下多士，食個粥就算。早餐後走去酒店對面既駁二藝術特區行下，影下相。然後跟大隊匯合後就一齊去微熱山丘高雄駁二特區門市。
 |
駁二藝術特區
|
微熱山丘賣鳳梨酥賣到出晒名，係台灣已經有好多分店。高雄呢間分店以船舶造型為外觀，簡約既內部設計，配合返駁二既藝術特色。微熱山丘試食既地方好似一間餐廳，有專人帶你入座，然後另一位專人將一件鳳梨酥及一杯熱茶送到你面前。服務周到，收費全免。食左人一件免費鳳梨酥，大部份人都會買返幾盒走。所以微熱山丘唔怕免費請你食一件！
 |
| 微熱山丘試食既地方 |
今日既午餐係同其中一位團友慶祝生日，我地去左一間叫 Smokey Joe's (冒煙的喬) 既美式餐廳。我地食左意粉、薄餅、豬肋骨、意大利飯等！味道正正常常，份量大，價錢比香港美式餐廳平好多。
 |
| 冒煙的喬美式餐廳 |
下午我地去旗津半天遊，今次因為有小朋友，又有幾個大朋友唔識踩單車，所以我地租左三架電動四人車。電動四人車速度唔太快，駕駛非常簡單。我地由碼頭先去參觀高雄燈塔，跟住沿海邊揸去彩虹教堂、雙螺台及旗津海珍珠。
 |
| 電動四人車 |
 |
| 高雄燈塔上既風景 |
 |
| 高雄燈塔 |
 |
| 雙螺台 |
 |
| 雙螺台 |
 |
| 雙螺台 |
 |
| 旗津海珍珠 |
本來打算再去埋旗津風車公園，但去到半路，有一架車冇電。我地發現每架車都由兩舊水電推動，咁我地即時水電工上身，將其中一架車既電換去冇電既車，然後掉頭返去旗津碼頭。行左一陣，本來冇電既車又再次冇電，咁我地又將另外架車既電換埋比佢。終於都捱到返去還車。
晚餐我地係旗津食海鮮，我地已經揀最多人幫襯既一間，但都係唔太多食，海鮮始終都係香港比較煮得出色。
我地坐船返去酒店，休息一下，跟住就坐的士去食第二餐晚餐，鼎王麻辣鍋。鼎王唔駛講啦！雖然價錢唔平，但材料新鮮精緻。(對比台灣物價唔平，但對比香港既打邊爐，佢算係平)
食完第二餐，諗住去埋附近六合夜市食第三餐，但去到已經有好多檔口關門，咁我地買左小食及果汁，返去酒店先慢慢食！
 |
| 六合夜市 |
No comments:
Post a Comment