Joseph@外地遊記: 201710 台灣高雄快閃第三日

2017/10/30

201710 台灣高雄快閃第三日

今日離隊，兩個人租左架車去玩。一早係酒店食左早餐，然後坐的士去和運租車。拎左車，我地就揸一個鐘車去到田寮區月世界。

月世界佈滿鋸齒狀的山脊，由於山脊是由泥岩、砂岩、頁岩等構成的青灰岩，高鹼性地質令草木都不能生長。看上去好似月球表面，所以稱為月世界。月世界內有很多條木棧道，經棧道可近距離觀看月球表面。如果要影張月世界全景相，就要爬上木梯既棧道登山。今日天氣都幾熱，又烈日當空，我地上到山，真係成身都出晒汗，濕晒！

由月世界揸半個鐘車，我地去到佛光山。我地兩個都唔係信佛既人，我地既目的其實係去佛光山既漢來素食健康概念館食午餐。好多人都叫漢來素食健康概念館既素食係五星級素食料理，我地平時食既素食，多數都好簡樸。但漢來素食就以高級餐廳既方法來經營素食，所有菜式都係色香味俱全既佳餚。呢度真係比我一個素食既新體驗。

食完午餐，係佛光山參觀下不同既佛像。然後我地就揸二十分鐘車去到義大世界購物廣場。義大世界購物廣場其實係一個 Outlet 商場，旁邊仲有個遊樂場叫義大遊樂世界。我地係呢度都行左兩個鐘，都買到野，有些少收穫。

晚上約左係高雄讀書既姪仔食飯，我地 6:30 左右去到佢間大學，四圍行下參觀下。台灣既大學跟香港既大學，最大分別係地方夠大，好多草地，好有校園既感覺。香港叫石屎森林，香港既大學就係縮細版既石屎森林。

去到已經天黑，只可以影下門口個牌

接左姪仔及佢女友，我就先揸返去高雄市還車。然後大家一齊坐的士去美麗島站附近一間叫「著火的牛阿根廷烤肉」餐廳。呢間餐廳係台灣叫「吃到飽」既餐廳，即係任食。每位台幣六百幾，有不同既阿根廷牛肉，豬肉，雞肉及阿根廷小食任食。師傅一燒好，就即時拎去你張枱問你要唔要，咁既價錢，咁既食物質數，CP 價超高，超抵食。