201710 台灣高雄快閃第一日

今次係跟人去台灣，頭兩日我地死跟大隊，所以我唔駛編行程。第三日大隊去小琉球，我就離大隊去月世界，佛光山同義大。第四日下午就同大隊於太魯閣匯合。

今次各自買機票同訂酒店，我就經國泰假期買左套票，坐港龍早上 8:00 機出發，晚上 21:25 飛返香港，早去晚返，玩足四天！酒店就選擇左新開既城市商旅-高雄真愛館。雖然佢叫真愛館，但唔係真愛碼頭附近，佢係位於近幾年重新規劃既鹽埕區，係駁二大義倉庫旁。酒店旁邊就係新既輕軌站，好方便！因為呢區係新規劃，所以環境好整潔，好多綠化既草地！加上面向高雄港，係舊碼頭散步吹海風已經好寫意。

快閃高雄

我地 9:30 到達高雄機場，先去 ATM 提款，跟住去電訊商櫃台買上網 simcard (TWD$300 五日任上網)。然後大家一齊去坐捷運先去酒店放行李。我由機場坐捷運去西子灣，再轉輕軌。我地呢段時期，輕軌仲係試行階段，所以免費乘坐。因為時間早，輕軌上唔係太多人，仲有位坐。輕軌一路沿海邊行，沿途可以欣賞下風景，幾好！

輕軌

後面係我地間酒店 城市商旅-高雄真愛館

係酒店放左行李，我地就行去大隊既酒店，秝芯旅店駁二館。城市商旅係豪華既風格，而秝芯旅店就行玩味風格，房內居然可以有滑梯！

第一個行程係去鹽埕舊區搵食，我地先去食試双妃奶茶，係高雄双妃奶茶及樺達奶茶都好出名。佢地標榜以鮮奶沖奶茶，我個人覺得奶味太濃，搶晒茶味。跟住我地就去左附近既米糕城食米糕，台灣既米糕類似我地既糯米飯，細細碗，上面舖滿肉鬆，好好食！

双妃奶茶

米糕及貢丸湯

係一條後巷內有一間老字號小籠包店，永和小籠湯包。呢間店真係好簡樸，係後巷開幾張檯就開檔。呢度既小籠包超平，十幾蚊港紙就有九隻即叫即蒸既小籠包。而味道真係不錯，不過你唔好用鼎泰豐黎同佢比，鼎泰豐個皮係超薄，成個小籠包係好精緻。呢度就講求平民化，好味抵食！

永和小籠湯包

係另一條後巷內，有一間舖專食雲吞，叫金溫州餛飩大王。呢間都係鹽埕區既人氣店，門口排左唔少人，我地都要等一陣先有位。我地試左佢既餛飩湯及牛肉乾麵，餛飩湯既雲吞係真材實料，但冇咩驚喜，反而牛肉乾麵做得幾好，麵身夠乾，再沾上濃郁既湯汁，呢個仲有驚喜！

金溫州餛飩大王

餛飩湯

牛肉乾麵

食左咁多野，冇可能再食得落，係時候去附近駁二區觀光，等個胃有時間落下格。我地係鹽埕區步行去到駁二蓬萊倉庫群，駁二蓬萊倉庫群及旁邊既哈瑪星鐵道文化園區，係將舊既倉庫及火車站重新改建，成為文化區，去吸引遊客及民眾，令呢一帶再次熱鬧起黎。我地去到倉庫群，最吸睛既係圍繞倉庫群行走既小火車，呢種小火車，大人見到都好想去玩，但牛高馬大去坐，好似好奇怪。今次我地有一位幾歲既小朋友，我地十幾個大人就個個用陪佢玩黎做借口，其實係自己想玩。所以我地成架火車都係大人，得一個小朋友。仲要重到架火車行得比人地慢！

駁二區

小火車

其實好細架

我地全部大人坐左上去，都仲行到

玩完火車，又去食野！係倉庫群中有一家專食愛玉既店，叫小本愛玉。佢係將愛玉整成玫瑰花既形狀，然後再配上不同味道既糖水，例如檸檬味、鳳梨味、百香果等味道。呢度既愛玉跟平時夜市食既愛玉冰完全係兩回事，呢度既愛玉專業好多！

小本愛玉

玫瑰花形既愛玉

黎到駁二蓬萊倉庫群，大家一定要去哈瑪星台灣鐵道館睇下佢既鐵道模型展館，呢度以 1:87 既比例去將台灣既鐵道風光呈現出黎。再配合燈光聲效做出日與夜既變化，不論係唔係鐵路迷都一定會被呢個超大型模型吸引。

哈瑪星台灣鐵道館

係哈瑪星鐵道文化園區，有一大片昔日係火車廠既地方，而家被綠化後，係上面放置左幾個大型藝術裝置，就變成高雄市民假日休閒活動既地方。我地見好多一家大細係度放風箏、情侶拍拖影相。

昔日火車廠

係高雄有個地方有好大型既 3D 錯視畫比大家影相，叫做時空之城，地點係台糖高雄物流園區既停車場天台，好奇怪既地點！我地由哈瑪星坐輕軌去夢時代站。下午既輕軌超多人，迫到同港鐵繁忙時間既情況一樣。台糖高雄物流園係一座典型既工業大樓，我見到都懷疑點解會係呢個地方，所以走去問更亭既保安去確定我冇黎錯地方。入到去係門口旁登記及比入場費，然後坐電梯去到一個展場。跟住有職員會介紹一下台糖既製布資料，不過個職員知我地個目的係去影3D 錯視畫，佢都好識做，快快介紹完放我地去停車場天台。係停車場頂層畫左好多大型 3D 錯視畫，係我見過最大型既，足足有兩三層樓高！有部份影出黎好似真，但有部份影來影去，同埋唔同角度都影唔到立體既感覺。

3D 錯視畫位於工廠天台

去完影野，又係食野既時候，我地坐的士去到瑞豐夜市。因為今日係星期六，瑞豐夜市人頭湧湧。成個夜市人貼人咁行，跟本冇咩位比你停低慢慢睇下食咩！我地好辛苦咁買左慕尼黑德國豬腳、港式脆皮臭豆腐、乾燒蛤、法式朱古力雞排及串燒魷魚。慕尼黑德國豬腳真係好食，燒得好香。港式脆皮臭豆腐我覺得台中既一中夜市比較出色。乾燒蛤就最得，花甲用酒煮，煮得剛剛好，唔會太熟，花甲肉仲好多水份，入口嫩滑無比。法式朱古力雞排就好搞笑，炸大雞排面層塗一層朱古力，然後再用火槍燒一燒。因為佢用唔係好甜既朱古力，所以又唔會覺得唔夾。

瑞豐夜市

慕尼黑德國豬腳

臭豆腐

因為個夜市真係太多人，雖然未食夠，但都冇心情再入去同人迫，所以我地就坐的士返酒店！今早太早未有房攞，所以我地而家先 check-in 攞房。我地間房好大，有兩張大床，廁所浴室分開，浴室有浴缸及淋浴地方，唯一唔好既地方係我地訂左冇窗既房，睇唔到個海景。雖然冇窗，但佢都整左幅大窗簾係牆身，扮落左簾既窗，即時冇左密室既感覺。

夜市個餐食唔飽，所以要出去食宵夜。係酒店附近冇咩地方食野，我問酒店既人，佢話行返去玫瑰聖母聖殿主教座堂對面有間通宵營業既熱炒。咁我地就慢慢行過去，當行到去途中，我地見到一間叫「駁一活海鮮」既小店仲未關門，我地就入左去食。我地叫左炒螺肉、炒豬肉、炒菜、炸花枝丸，睇價錢牌，泊得住香港大牌檔既價錢。雖然貴，但炒得好好食，我最鍾意佢個炒螺肉，螺肉炒到爽口又入味。