 |
| 食早餐 |
 |
| 蛋餅早餐 |
食完野，我地先坐輕軌去一個貨櫃屋市集，叫「集盒 KUBIC」。市集以不規則既排列方式，將三十幾個色彩繽紛既大貨櫃堆放出不同既空間。我地去到因為太早，所以市集內既咖啡店及精品小店都未開。我地本想影下相，突然有位帶住口罩既工作人員係市集內噴殺蟲濟，我地唔想中毒，即閃。係集盒旁有間 IKEA ，我地就走左入去行下，行左一陣先再出去集盒影相。
我地坐輕軌返去駁二四圍行下，影下相。大約 12:00 返酒店拎行李退房。
 |
| 駁二 |
今日約左姪仔同佢女友去夢時代食午餐，我選左去老乾杯烤肉店食炭燒和牛。呢間餐廳係 2016 年拎左米之蓮一星，亦係全球第一間拎到米之蓮既烤肉店，好似好有來頭。
午餐有不同既套餐，我地叫左四客澳洲和牛套餐，每客 NT$880。套餐先有蒸蛋、沙律及湯，跟住一塊澳洲和牛，一隻蝦及蔬菜。因為呢間係高速公路餐廳，所以有專人係我地面前幫我地燒，燒完佢會將牛扒切細，放上碟比我地食。澳洲和牛雖然冇日本和牛咁入口即溶，但牛味，咬口非常好。只係以 NT$800 去食和牛，有專人燒，真係非常抵食。
 |
| 炭火爐 |
食完我地就坐的士去大魯閣草衙道大型購物中心及遊樂場。並且會合返去左小琉球既團友。大型購物中心我就興趣不大，我地主要係去佢既棒壘球打擊場及鈴鹿賽道樂園。
棒球係香港唔係太普及，所以我地好少玩到，但因為我地時常睇日本漫畫，所以都時常接觸到有關棒球既題材。今次我地黎到棒壘球打擊場，終於可以試一試打捧球既滋味。棒壘球打擊場內有一條條擊球道，每條擊球道門口都有寫明球速，入到去大家帶上頭盔，拎起捧球棍就開始玩啦！當然之前你一定要係門口入左錢先，咁佢部機器就會自動投球比你打。當打中個球，發出清脆既擊球聲，原來真係好興奮架！
鈴鹿賽道樂園係日本鈴鹿賽道授權既賽車主題樂園，樂園有好多有關車既機動遊戲，適合不同年齡既人，一家大細黎玩。而係樂園有一條將日本鈴鹿賽車場 10:1 等比例縮小既迷你鈴鹿賽道，係賽道大家可以玩時速有 70km/h 既小型賽車。我地本來成班十幾人去玩，但佢地非常嚴謹，見到女士們要佢地一一先試車，睇下夠唔夠力去操控架車，點知所有女士都唔玩得，只有我地三位男士可以玩。而每一位係 NT$550 玩 8 分鐘，如果第一次係呢個場玩，要比多 NT$100 上堂，上左堂會比張證你，下次就唔使再上堂。
上堂係學習一下架車個操控，安全事宜及賽道上每個彎位要注意既地方，好專業。我地試車及上堂都搞左一個鐘，5:30 先真正落場玩。一個圈平均 45 秒至一分鐘 ，8 分鐘大約可揸到 8 個圈。小型賽車因為好貼地，所以速度感好高，入彎出彎都好緊張，彎位爬頭就更加刺激。雖然短短 8 分鐘，但都玩到心跳加速，手心冒汗。如果可以再多朋友一齊玩，一定更加刺激。
我地坐 9:25 飛機返香港，由大魯閣草衙道去機場只須一個捷運站。所以我地都玩到 7:00 先走，臨上機前係機場食埋台灣牛肉麵及珍珠奶茶先走。
No comments:
Post a Comment