201801 日本石垣島第一日

石垣島位於台灣及沖繩之間，地理上比較接近台灣。成個島既面積只有 222.5 平方公里，即係香港島加大嶼山既面積左右。以往去石垣島，大家要去日本本島、沖繩或台北轉飛機過去，多得香港快運，而家可以由香港直飛石垣島。 

我地係石垣島會住三晚，本來打算三晚都住同一間酒店，但全日空石垣島洲際度假酒店 (ANA Intercontinental Ishigaki Resort) 第一晚冇房，所以我地第一日晚先住 Hotel Grandvrio Garden，之後兩晚轉去洲際。  石垣島公共交通唔係太方便，所以租車係最好既選擇。我地今次光顧 OTS 租車公司，佢有個優惠，租 Toyota Prius AQUA，三日只需 ¥11340 ，我地六個人去，租左兩架車。 由香港去石垣島既航班係早上 7:45 出發，早上日本時間 10:45 到達。

石垣島既國際線機場超細，所以過海關都花左半小時左右。拎左行李，我地行去內陸線既機場搵 ATM 提款。

石垣第一餐就係雪糕

內陸線機場比國際線大好多，仲多好多商舖。(內陸線其實係冇商舖既！) 去租車公司要坐由租車提供既接駁巴士，車程三分鐘左右。去到 OTS 都幾多人等緊租車。我地搞好晒租車手續， 12:30 先正式開車出發。

第一站係揸 30 分鐘車去島北面既新垣食堂食石垣牛咖哩飯，去到點知冇開門。

我地既 Plan B 係再揸多 10 分鐘車去明石食堂食軟骨蕎麥麵。我地揸車過黎時，沿路都唔見太多車同人，但呢間明石食堂居然勁多人，仲要等位。大約等左二十分鐘，先到我地入去。

我試左佢既軟骨蕎麥麵，條軟骨唔係只有骨，仲有好大塊肉，肉好入味又好腍。石垣島既蕎麥麵跟日本本島既唔同，雖然大家都叫そば(SOBA)，但原來石垣島蕎麥麵唔係用蕎麥製，而係用麵粉製成。所以似我地食開既油麵。

海葡萄

軟骨蕎麥麵

無酒精啤酒

圍住石垣島有好多個燈塔，而係石垣島最北面有個叫平久保崎燈台。本來我冇打算去，但去到明石食堂，再過去都只係二十分鐘左右，所以即興去埋呢個燈塔。好彩我地有去到，因為當去埋其他燈塔，先發現平久保崎燈台係風景最靚既一個。

去到平久保崎燈台，有幾個泊車位，泊完車沿一條小路行去燈塔，一見到個海就不得了，海水清澈見底，海底珊瑚礁反映太陽光，成個海都係翡翠綠，我真係第一次見好似綠寶石咁閃既海。呢個景點真係黎石垣島一定要到既地方！ 

由平久保崎燈台返去石垣市中心，途中經過玉取崎展望台，係呢度你可以一次看到西面既中國海及東面既太平洋，不過景色就冇平久保崎燈台咁靚。

玉取崎展望台

呢幾隻唔知係唔係石垣牛？

我地 4:00 到達 Hotel Grandvrio Garden，酒店比左間向海既房我地，呢間酒店係一間渡假酒店，有好大既泳池，又有好多康樂設施，最特別係有溫泉浸，個溫泉有內湯及一個半露天既外湯，都幾好架。

放低左行李，襯天仲光，我地走去酒店既泳池及海邊影下相。酒店面向西面，去到海邊仲可以睇埋日落。

今日既晚餐，我地訂左 6:30 去「舟蔵の里」食石垣八重山鄉土料理。「舟蔵の里」位於我地酒店旁，唔駛二分鐘就去到。會席料理套餐價錢由 ¥3,500 至 ¥11,000，我地選左 ¥6,500 及 ¥8,500 既套餐。「舟蔵の里」食晚餐時仲有傳統表演睇，表演時有好多食客都好投入咁企起身跟住跳下舞，都幾特別及有趣。

呢餐會席料理都好多野食，重點係石垣牛陶板燒及燒龍蝦，石垣牛有四塊厚切既，好好味，不過唔係全個旅程最好既石垣牛。燒龍蝦有半隻，起晒肉，大塊大塊咁入口，好滿足。 

晚餐後，我地揸車去附近既 AEON MaxValu 超級市場，買左宵夜，士多啤梨、蘋果及雪糕。