201801 日本石垣島第二日

石垣島附近有好多外島，本來打算去全日本最南既波照間島，睇下有波照間藍稱號既大海。不過原來由石垣島去波照間島要坐好耐船，所以我地只係去近近地既竹富島。

一早起身先去浸一浸溫泉，之後食埋早餐就退房。我地將所有行李放上車，跟住就揸車去石垣島碼頭。由石垣島坐船去竹富島只需 15 分鐘，來回票價 ¥1150。我地坐 10:00 出發既船，去到竹富島碼頭，四圍都幾荒蕪。但係碼頭旁已經有好幾架車停係度等客，佢地其實係不同既單車租借公司及水牛車活動公司既車。我地既目標係搵間有電動單車及雙人單車既公司。我地問第一架車，佢冇雙人單車，佢介紹我地去一間叫友利公司。咁我地問下友利既職員，佢有電動單車及雙人單車，咁我地就上左佢架車，等佢車我地去佢舖頭。

碼頭旁有好幾架車停係度等客

去到佢舖頭，試好及揀好車，我地就出發用單車遊覽竹富島。竹富島最出名既就係星沙浜沙灘，呢個沙灘除左海水清到見底之外，佢沙灘上既沙會係星型既，所以好多人都踎係度搵星沙。我搵左十幾分鐘，都只係搵到十幾粒，都唔易搵架。 

好清既海水

係星沙浜沙灘附近有另一個沙灘コンドイビーチ (Kondoi Beach)，呢個沙灘冇咩人，其實又冇咩特別，算係順路停下影下相。

コンドイビーチ 好多貓

竹富島有個小小既石碼頭叫西棧橋，講真，都係冇咩特別，但我地又除左鞋，行落水玩左一陣。

竹富島既中心有唔同既商舖及餐廳，好得意！四周都係白沙既街道，每座屋既圍牆都由石砌成，好有特色。

今日既午餐，我地去左一間叫竹乃子既餐廳，餐廳係木造既建築，屋頂鋪了紅瓦。我地叫左個厚豬肉定食及一個炒麵 (焼きそば)，厚豬肉定食有飯又有麵，份量十足，日本人整厚豬肉一向出色，入口鬆化，好好食。

炒麵

厚豬肉定食

我地食完就去還單車，跟住就坐下午 2:45 分既船返去石垣島。

碼頭既銅像

係石垣島碼頭附近有間人氣布丁店，叫「石垣島プリン本舖」。係石垣島上最好食，最有名既布丁。佢有個每日限定既超濃味布丁，每個 ¥650， 蛋香超濃，又滑，真係好好食。

我地今明兩晚會住係全日空石垣島洲際度假酒店 (ANA Intercontinental Ishigaki Resort)，呢間酒店都好靚，佢有個好大既泳池，不過而家天氣幾涼，冇得游水。唔緊要，佢都有個溫泉大浴場。 

Checkin 完，係酒店四圍行下，影下相。跟住就揸出去市中心既石坦市公設市場行下。石坦市公設市場附近係石垣島唯一既商店街，大家要買手信就一定要黎呢度啦！

今日既晚餐，我地係去食燒石垣牛。係石垣島，有間好出名既炭火燒肉專門店叫「石垣屋」。我地冇訂位，去到要等一陣先可以入座。我地被安排係一間和式既包箱，自成一角。呢間餐廳既重點係用炭火去燒肉，唔知點解大家都對炭火呢樣野著迷，總之炭火就係好野，不論炭火串燒、炭火雞蛋仔。

我地點左兩客三人份量既拼盤，拼盤有西冷、里脊肉、肋骨肉及牛舌，每客 ¥13,200。幾年前係沖繩都食過石垣牛，今次係石垣島上食，真係唔同，好食好多。里脊肉、肋骨肉油份好多，燒出黎好香，有咬口。最精彩係個西冷，真係超香，入口即溶。我食過唔同地方既和牛，石垣牛真係最好食既和牛。

我地食完燒和牛，貪得意叫左個石垣牛刺身壽司試下。和牛真係要燒一燒，等佢既油份溶左少少先好食，生食刺身係唔好食既，仲浪費左塊和牛。

食完野，去左附近既 EDION 電器店，AEON 超級市場及藥粧店行下。我地係超級市場買左個蜜瓜及兩包士多啤梨，跟住返酒店浸完溫泉食。個蜜瓜勁甜，好好食。