今日早上我地會去玩紅樹林獨木舟，之前我上網訂獨木舟活動時，第一間 Email 覆我話唔識英文，所以只接待日本人，我再上網搵，先搵到呢間肯接待非日本人。10:20 有架專車黎酒店接我地，佢架 Van 仔都幾殘舊，好少係日本見到有咁舊既車用黎接遊客，唔通獨木舟呢門生意真係唔太好搵？其實佢只係收 ¥3000 一個人，係日本算好平！
我地坐左十分鐘車，去到佢地個營地。我地先去穿救生衣，然後去個大草地聽教練講解。個教練都係唔識英文，全程用日文及身體語言教我地。我地用左五分鐘左右就學完，正式出發。我地兩個人一條獨木舟，男士坐後，女士坐前。坐獨木舟要雙腳向前放，都幾扯大脾條根，我後來見教練盤膝而坐，我都轉盤膝，即刻舒服好多。
我地先係紅樹林逆流而上，因為逆流，好似划極都唔係太郁，好鬼攰。當我地去到紅樹林中間，獨木舟係樹木中間穿插，好好玩。當去到一個大山洞，係咁近距離見到呢個自然生態，真係好開心！回程時因為順流，所以輕鬆好多，唔駛點划都會自己郁。我地足足玩左一個鐘獨木舟，原本以為會好攰，跟住會手痛腳痛，但又冇事喎。可能因為我地玩完有做返拉根動作，舒緩返肌肉。
係酒店梳洗完，我地去左酒店附近既「鮨人迴轉壽司」食午餐。去到日本唔食返餐壽司，跟本好似冇去過日本。我上去 Tabelog.com 見呢間迴轉壽司都幾高分，應該冇死啦！係日本是但入去一間壽司店，真唔會唔好食啦！點知今之就錯啦！呢間迴轉壽司既壽司勁普通，冇驚喜，食完我都完全冇印象食左咩。後來同去過石垣既朋友傾開，佢地都同意石垣係冇好既刺身。點解石垣四面環海都冇靚刺身既？
下午我地揸車去島既北面觀光，我地先揸三十五分鐘車去到川平灣。川平灣係石垣島最靚既沙灘，石垣島名信片一定有佢出現。不過今日下午天氣唔好，天色灰暗，幾靚既沙灘都死！去到川平灣我地照去坐玻璃船，睇下海底既珊瑚，因為冇太陽射落珊瑚度，所以都冇咩顏色，有些少失望。如果大家去川平灣，都係好天先好去。
 |
| 加左工既相，好似真係好靚 |
見時間仲早，所以去埋御神崎燈台，又係天氣唔好既關係，一落車大風到人都吹得郁。係燈塔望出去個海，波濤洶湧，冇左禽日既翠綠見底既大海。
食飯前，我地由去返石坦市公設市場行下商店，買埋最後既手信。
晚餐我地去左一間叫「あだん亭」既居酒屋，呢間居酒屋我又係 Tabelog.com 搵出黎。呢間居酒屋地方唔大，似係家庭式經營，店員跟我地雖然語言不通，但都盡力使用身體語言，非常親切。係沖繩縣，我地叫左當地特產海葡萄及炸苦瓜，另外仲叫左好多當地美食，例如刺身、豆腐、沙律及炒麵。
最後衝刺，食完飯，再去 AEON MaxValu 及藥粧店，買呀！買呀！
No comments:
Post a Comment