Joseph@外地遊記: 201501 韓國首爾第二日

離開 SPAREX 汗蒸幕，先去食早餐。因為禽日肚痾，今早都係食清淡早餐好些。我們去了東大門 apm 後街一間叫「本粥본죽」既韓國粥連鎖店，入到去睇睇個餐牌，都幾貴喎，最平蔬菜粥都要 W$6,500 (HK$48)，最貴飽魚粥要 W$20,000 (HK$144)。我點了一碗 W8,000 (HK$58) 牛肉蘑菇粥。因為即叫即煲，所以都要等十分鐘左右。收得你 W8,000，一定唔會得一碗粥，點都跟幾碟仔配菜。碗粥用料又真係好得，成碗粥好濃牛肉味，好香，不過我都係覺得好貴，試一次就夠啦！

早晨！東大門

本粥門口

好貴既粥

早餐後去東大門新開既東大門設計廣場 ( Dongdaemun Design Plaza - DDP) ，廣場建築外型獨特，好似一架外星飛碟停泊於東大門。廣場內部有藝術廳、博物館及小商店。由於展品不太多，所以都是入內看看內部的建築。

東大門設計廣場

東大門設計廣場內部，都好有簡約風格

由東大門行十多二十分鐘，去到有一百年歷史的廣藏市場 (서울광장시장) 。廣藏市場的貨物包羅萬有，有布料、衣物及韓服等。不過大家去到廣藏市場，最主要是光顧韓國小食，據聞有綠豆煎餅、紫菜包飯及黑大腸，而我因為要留肚食午餐，所以只係行下，睇下人地食。

廣藏市場

廣藏市場內的小吃

有醬蟹賣

午餐去了廣藏市場附近的陳玉華奶奶一隻雞，陳玉華奶奶一隻雞附近有幾家食一隻雞的餐廳，大家要認清楚個門口呀！陳玉華店內很簡單，每張檯的客人就只是吃雞煲。一坐下來，有講國語既侍應前來解說，其實都不太要解說，就係叫一隻雞，再加年糕、白飯、薯仔或麵。因為我地得兩條友，唔食得太多，所以一隻雞加年糕就夠！店內水及泡菜就自助式，我見好多人將泡菜放入煲內跟雞一起煮，成煲變成紅色，好似好惹味，我就怕辣，唔敢試！

陳玉華奶奶一隻雞，好多人，要等位

主角一隻雞來到，個湯望落水咁清，好似冇咩料到，試飲一啖，真係冇咩料到！不過煲煲下，開始黎料，清湯變雞湯，當差不多可以食時，阿豬媽就過黎用較剪將隻雞分屍，而年糕亦可放入湯內。煲下煲下就可以食啦！雞肉沒有網上寫到咁精彩，我覺得 70 分啦！反而個年糕勁好食，煙煙韌韌，再點少少醬，好正！

一隻雞及年糕

開動！

下午 2:30 回 Hotel ibis Budget Ambassador Seoul Dongdaemun 攞房，呢間酒店位於東大門歷史文化公園站 4 號出口對面，雖然唔係東大門中心地帶，但都算方便。酒店剛於年頭新開張，所以裝修很新，色彩很活潑及年青。我訂了一間標準雙人房，房間地方雖然不大，不過透過設計師精心佈局，地方很實用。例如設計師把床加高，床底下就可擺放行李，而地下使用木地板，行李就可輕鬆地由床底拉出拉入。

Hotel ibis Budget Ambassador Seoul Dongdaemun

房內

於酒店休息了一會，跟住就坐地鐵去位於漢江鎮站的 Leeum, Samsung Museum of Art (三星美術館)，我們由漢江鎮站 1 號出口出，往梨泰院方向走，再步行上半山的三星美術館，大約行十分鐘。三星美術館內主要展出來自韓國本土藝術家的大作，我對韓國藝術家不太熟悉，所以都好快睇完。反而最深刻是三星美術館這座建築，內裡的白色螺旋樓梯，戶外的金屬球藝術裝置都非常驚艷！

三星美術館門口

三星美術館門口另一角度

三星美術館內

白色螺旋樓梯

睇完美術館，行返落大街，入左去 Banana Tree 食下午茶，其實我都唔知呢間野都幾出名，後來返到香港先知，真係誤打誤撞走左入去。入到去叫了左杯咖啡及一個出名既盆栽蛋糕，盆栽蛋糕真係好似一盆盆栽，蛋糕係泥，上面插上假花，隻匙羹仲要好似泥鏟，好得意。

Banana Tree 食下午茶

咖啡及盆栽蛋糕

我覺得都幾好食

食完下午茶就返東大門一帶行下商場，大約 8:00 就去八色五花肉食晚餐，東大門的八色五花肉位於大廈二樓，去到時已有一條人龍於樓梯排隊，大約要等半小時才入座。八色五花肉即是有八種不同味道的五花腩肉，有大蒜、葡萄酒、松葉、香草、咖喱、味噌、辣椒醬及人蔘味。我地兩個人食唔晒八色五花肉，所以點了另一個三色套餐，套餐包括有原味五花肉，新鮮元貝及沙蔘。每檯除了燒肉外，還跟一個足料海鮮鍋，燒緊肉時又可以食下海鮮鍋濕濕口，真係想得周到。在韓國烤肉中，配角生菜非常重要，這裡的生菜塊塊完整新鮮，把燒好的肉沾一些醬汁，再包上生菜，放入口，真係好美味！