Joseph@外地遊記: 201501 韓國首爾第三日 - 「來自星星的你」展覽，北村，仁寺洞，弘大，梨大

今日原本打算去南怡島，但因為睇見天氣報告預測今日會有雨，所以改為明天才去南怡島。今日一早到東大門的韓版麥當勞 Lotteria 食早餐，然後 10:00 乘坐專車去位於 Kintex 的「來自星星的你」展覽。

坐專車去 Kintex，車上面都印有都敏俊 c 同千頌伊

由東大門去到 Kintex 大約 45 分鐘，Kintex 附近好荒蕪，而「來自星星的你」展覽就於一個臨時搭建的大帳幕內。今日場內好少人，我估要去睇既人一早已經去左，熱潮亦已經開始退減。我們首先經過入口的都敏俊c 既時空門進入會場，場內先有拍攝古代時既道具，之後就進入都敏俊c及千頌伊既屋企，仲有佢地時常撞到既電梯大堂。因為好少人，工作人員主動為我地拍合照。見佢地咁熱心，我就幫襯佢地影左一張都敏俊c屋企露台既合成相。大約玩左一個鐘，我地就坐接駁車去附近大化站，然後坐地鐵去北村 (安國站)。

「來自星星的你」展覽的大帳幕

入場票

都敏俊c 時空門

電梯大堂

都敏俊c 間屋好大

其實我係 Camera Man

工作人員主動熱心幫我地拍合照

都敏俊 c 睡房

到千頌伊睡房

另一個熱心工作人員為我們拍千頌伊間屋前合照

合成相

走前同兩位主角合照

去到北村，終於開始落雨，好彩只係微微雨。我們先去百年土種蔘雞湯食午餐，入去餐廳先經過戶外座位，因為落雨，所以冇人坐，否則坐露天位食人蔘雞都幾爽。我們坐底後，即刻點了兩客人蔘雞，13000 韓圜一客。點菜後大約三分鐘就有得食，仲快過麥當勞。食人蔘雞湯，第一口湯通常人蔘味都很啖，因為人蔘藏在雞內，要挑開隻雞，人蔘味才會走出黎！而我最鍾意食雞內的糯米，糯米吸收了雞湯及人蔘的味道，越食越好味！寒冷天氣下，食碗熱辣辣人蔘雞湯，好幸福呀！

百年土種蔘雞湯

有粒人蔘

北村保留了很多朝鮮時代以瓦磚建築的韓屋，村內有很多不同的博物館及工作室。我們慢慢細雨中欣賞古色古香的小巷及建築物，經過半山到達三清洞。

北村韓屋

三清洞是一條充滿獨特風味的街道，傳統的建築物與現代摩登藝術的結合，我覺得好似歐洲小鎮的小街，於街上隨便逛逛都非常寫意。今日下午茶就到了三清洞的 Beans Bins，Beans Bins 是一間連鎖咖啡店，以前三清洞的 Beans Bins 位於韓屋內，非常有特色，但最近已搬到一般的三層樓內，所以我覺得唔需要專登去三清洞的 Beans Bins，隨便任何一間 Beans Bins 都可食到它的招牌窩夫 (Waffle)。Beans Bins 的招牌窩夫太吸引，雖然我剛剛食完人蔘雞，但都忍唔住點了一份芒果窩夫，窩夫餅底有少少脆，上面舖滿忌廉及芒果肉，中間仲有一個芒果雪糕球，望見都好開心！

三清洞的 Beans Bins

超好味的芒果窩夫

由三清洞雨中漫步去仁寺洞，仁寺洞好似香港以前的旺角 (唔係而家全是金舖及連鎖店的旺角)，一間間獨立小店，售賣不同的衣物及精品。我們去仁寺洞的目的是去仁寺洞宣傳館玩韓服體驗。由人人廣場 (Ssamziegil) 對面的小巷行入去，就會看見古老建築的仁寺洞宣傳館。講開人人廣場，大家可以去看看這個類似香港元創方的年青創意藝術市集。講返韓服體驗先，網上據說仁寺洞宣傳館有免費韓服體驗玩，不過我地去到見到要收 3000 韓圜一個人，即港幣二十幾蚊，抵玩啦！宣傳館的職員登記我們名字，排隊等穿韓服，好彩今日唔係好多人，等十分鐘左右就有得玩。我地從幾件韓服中挑選了自己喜歡的一件，工作人員會幫手替我們穿上韓服，不過拍照就要自己拍。而另外又有兩個香港女仔穿韓服，所以可以叫佢地幫手拍照，我幫下佢地拍，佢地又幫下我地拍。廿幾蚊港紙，有韓服著，超好玩！

雨中漫步三清洞

仁寺洞宣傳館

韓服體驗

人人廣場

由仁寺洞附近鍾路站坐地鐵到首爾站的樂天超級市場，打算買下手信，點知今日竟然休息，超級市場都有休息日？我真係又學到野啦！

首爾站

今日晚餐，我地坐地鐵去弘大，光顧一間叫 마포나루냉면 的傳統韓國食店食醬油蟹。大家食醬油蟹，通常去新沙洞的醬蟹街光顧元祖馬山 (원조마산아구찜) 或者 Pro 醬油蟹 (프로간장게장)，但價錢就頗貴。我見網上有人介紹去弘大呢間食店食醬油蟹，價錢平好多，又好味，又地道。因為得個韓文名，我都搵左一陣，走左幾轉先搵到呢間食店。店舖有幾層，裝修走懷舊路線，除了醬油蟹，仲有其他韓國料理。我們坐地下果層，有一位講國語的服務員，可以溝通到。我們點了一份大的醬油蟹，價錢 36000 韓圜，已經夠兩個人食。另外服務員介紹我們叫了一支栗子酒，酒中真係有少少栗子味，好得意。醬油蟹跟湯、飯及泡菜，我第一次食醬油蟹，一入口，咸咸地，輕輕用口輕蟹身，蟹肉就自己濟出來了。蟹肉質感似牡丹蝦刺身，齋食比較咸，送飯就一流！