今次旅程係因為於 Accor 酒店會員戶口的分將快到期，所以要是但搵一處地方，三月前出發，用分訂酒店。剛好香港快運又有特價，$1488 一張來回機票去首爾，連稅及 20kg 行李，都算好抵啦！不過平野一定有代價，就係晚機去，去到首爾機場零晨 2:25。回程就好少少，中午 12: 30 機，不過要一早出機場，都係冇左一日！
 |
| 坐香港快運去首爾 (但架機係香港航空) |
其實未出發前一路都好擔心會好凍，因為早幾年前，一月去首爾，去到負六度，凍到跟本唔想出街。今次出發前上網睇下天氣預測，好好喎！平均都有三至六度，都冇咁驚！
23/1 出發當日請左一日假，中午去左某酒店食自助午餐，有生蠔食，我地兩個人每人都食左大半打。食完先返屋企休息一陣，唔知係唔係生蠔唔乾淨，我地兩個都肚痾，痾到痾水咁。出機場前我強迫自己快快痾晒，否則上到機仲痾就好麻煩。去到機場，走去貴賓室食清淡少少既食物，飲下熱茶。個肚好左少少，雖然不斷「咕咕」聲，但起碼仲忍到，唔駛急到要即刻解決。
班機遲左少少起飛，但都趕到準時到達首爾。飛機降落時有驚險事發生，話說航班上有一團幾十人既強國團，飛機一著陸，仲係跑道行緊時，呢班人居然起身攞行李，仲要唔係一個人，係成班十幾人一齊起身。果位空中服務員 (男既) 嚇到大聲叫佢地坐低，但完全冇人理佢，呢位盡責既空中服務員唯有起身走去續個制止佢地，當佢制止完佢地走番機尾個位時，我見佢一路行一路搖晒頭。
落機後過海關，全個機場都冇咩人，好似得我地呢班機，同呢班旅客。過左海關後先去櫃員機提取韓圜，我提了 W500,000，連手續費，銀行扣了我 HK$3620.05，匯率即 138.12，而當地機場匯率是 133.9，當日香港百年是 137.3，又係用提款卡提款最好！
 |
| 冇人既首爾仁村機場 |
時間已經係早上 3:30，因為太夜，所以已經冇鐵路出市區。機場有一間汗蒸幕叫 「Spa on Air」，位於地庫 B1，我打算入去瞓到 10:00 左右，然後坐巴士出市區。入到「Spa on Air」的接待處，職員話已經滿了。點算？唔通係機場等天光？冇得瞓一定累死！
 |
| Spa on Air 門口 |
我記得最後一班出首爾火車站的巴士將於 3:50 開出，我地即刻急急腳走去巴士站，好彩趕得到！由機場去到首爾火車站，大約一個小時。一落巴士即刻轉的士去酒店，今次訂了位於東大門新開的 Hotel ibis Budget Ambassador Seoul Dongdaemun。因為太早未有房，所以先寄存行李。
 |
| 先坐巴士去首爾火車站 |
 |
| 清晨時份的首爾火車站 |
寄存行李後都早上 5:30，唔可能唔瞓直落到夜晚。我們走到東大門 Good Morning City 地庫一間叫 SPAREX 的汗蒸幕，沖一沖涼及瞓幾個鐘。SPAREX 入場費 W8,000，比錢後，櫃檯位阿豬媽會比條儲物櫃鎖匙、一件衫、一條褲及一條毛巾比你。跟住走去一排鞋櫃搵你條匙個編號，鎖好自己對鞋。鎖好後就跟指示牌去前面男女分開的洗澡區，洗澡區跟日本的溫泉一樣，一入去有個更衣室，更衣室內有儲物櫃、洗手盆，再入去就係洗澡及泡湯的地方。
 |
| SPAREX 的汗蒸幕 |
 |
| SPAREX 接待處 |
 |
| 換左衫個樣 |
脫光衣服後就走入去沖涼，係日本大家會有條毛巾仔帶入去遮一遮重要部位，但韓國人個個好豪邁，坦蕩蕩毛巾都冇條走來走去，你攞條毛巾仔遮遮掩掩反而仲奇怪。入到去沖涼既地方，有日本式坐底對住塊鏡沖涼個種，另外仲有牆身一個個花灑，好似運動場更衣室，跌左番梘千奇唔好彎底身執個隻！日本人通常坐底沖，但韓國人個個企係花灑沖，咁我唯有都走去企係度沖啦！沖涼時四圍都見唔到有洗頭水及梘液，只有一塊塊用過既番梘，我猶疑緊用唔用呢塊番梘時，我再望真下塊番梘，有條毛係上面既？嘩！我唔敢用啦！而我梗加驚如果拎上手，一下唔小心跌左落地，究竟好唔好彎底身執呢？
齋沖完身便走去泡湯，泡湯池旁有兩張搓澡床，有兩個男人正在搓澡，畫面真係好似其他人網上形容咁，兩塊豬肉放係張床上面比人反來反去，擦來擦去！要光脫脫比人放係張床舞來舞去，旁邊仲有係泡湯池內的一眾觀眾，我仲未接受到，所以我冇試到！
沖完涼就可以出返去經樓梯落去下層既休息區及食堂。休息區地方非常大，不過都好多人，個個席地而睡，我地走了一圈，隨便搵一個唔阻人既地方就瞓。不過瞓得唔係幾好，側邊有兩個韓國女人不停傾計，後來佢地走左，終於可以瞓。但我又唔慣瞓硬地板，不停要轉身，醒下又瞓下，大約 10:00 左右就起身啦！
 |
| 休息區，呢張係走前影架，晚上成地都係人係度瞓 |
 |
| 左手面一個個洞，d 人就走入去瞓，前面圓形係高溫屋 |
 |
| 86 度的高溫屋 |
 |
| 入左個洞扮瞓 |
No comments:
Post a Comment