Joseph@外地遊記: 201501 韓國首爾第四日

今日會去南怡島及小法國村玩，一早 8:00 出門口，先去東大門的 Isaac 三文治小店買早餐。Isaac 是一間出名的外賣小檔，看見阿豬媽於鐵板上左煎右煎，幾分鐘就整好一件香噴噴三文治。不過我覺得最可惜係冇堂食，拎到去火車站，食時已經凍晒。

Isaac 三文治小店

去南怡島都唔容易，要預先上網搵定火車及巴士班次，最好預早買定火車票。我首先坐地鐵去清涼里 (Cheongnyangni) 站，然後坐 9:17 開出的 ITX-青春火車去加平站，9:55 到達加平站，跟住衝出去巴士站排隊搭觀光循環巴士，如果唔衝出去排隊，上唔到車就要等一個鐘。觀光循環巴士由加平去晨靜樹木園，中途經南怡島站、小法國村站及清平火車站，全日任乘車票 5000 韓圜一位。好彩我地衝出去排隊，所以順利上到車！

清涼里站

舒適的 ITX-青春火車

加平站

加平巴士站排隊坐巴士

觀光循環巴士

由加平去南怡島站只需五分鐘。落車後行去碼頭，以 8000 韓圜一位購買入島來回船票。本來以為去到南怡島會是四周舖滿白雪的雪景，不過好似因為唔夠凍，所以只有少部份地方有雪。我嘗試用一隻腳踏上結冰的湖上，湖上冰面即刻碎裂，好彩我都估到，冇跌落湖裡。

南怡島售票處

坐呢種船去南怡島

噴水池變左冰山

成個南怡島好多呢隻公仔

成地雪好似好凍，其實唔太凍

冬天一陣霧氣，都好有氣氛

有小冰屋

我就係試踏上呢個結左冰既湖

食個熱紅豆餅

南怡島好多松鼠

冬日戀曲男女主角銅像

南怡島地標，杉樹

呢個湖都有結冰

河邊都結冰

係南怡島都差不多逗留了兩小時，坐船回到巴士站已經 12:45，下一班巴士將於半小時後到達。原來打算去食春川雞，半小時又唔夠時間食，所以係巴士站旁的小吃車買粟米及串燒先醫肚，去到小法國村再食。

小吃車賣小食

由南怡島去小法國村 (Petite France 쁘띠프랑스) 車程大約要 25 分鐘。小法國村入場費每位 8000 韓圜。小法國村是仿歐洲小村建築，結合「小王子」故事書的人物世界。最近不少韓劇及 Running Man 都來取景，所以帶旺了小法國村。

小法國村

小王子

小法國村全景相

本來想係小法國村的餐廳正正經經坐低食個午餐，但村內的餐廳關了門，只有一間賣小食的開門。所以我地既午餐係食韓式年糕，炸雞塊及咖啡，好奇怪的組合。小小的小法國村，我地都逗留了兩個鐘，我地真係玩得好 Hea。

食午餐

咖啡，炸雞塊及韓式年糕

小法國村的小屋內都好多擺設

冇開門的餐廳

彩繪玻璃

有錯視畫

小廣場

大個仔既小王子

離開時，我們於小法國村門口等巴士去清平火車站，然後坐火車回首爾。當巴士到達時，竟然太多人上唔到車，而下一班巴士要等一個鐘。小法國村附近荒山野嶺，點樣等一個鐘？我即刻睇一睇巴士時間表，對面線下一班巴士回加平十分鐘左右到達，我係其他人仲未諗到坐回頭車返加平，再轉火車回首爾呢個方法前，即刻衝去對面巴士站排隊。其他人見我咁做，都開始走過黎。去加平的巴士準時到達，我地兩個上到車，但有其他人上唔到車。去到加平火車站，走到自動售票機買ITX-青春火車車票，但試幾次都買唔到，佢又冇寫原因。我走去買車站職員，佢話 ITX-青春火車回首爾已經滿座。咁我只好坐速度慢又站站停既京春線火車回去。

我們坐火車去忘憂站，然後行去祭基洞的京東市場人蔘街買人參。人蔘街成條街兩旁都係賣人蔘攤檔，真係眼花撩亂。我又唔識分人蔘，其實都唔知點買。我求其入左一間，個大叔介紹我買一款，我買左 1kg，44000 韓圜，我覺得好平。後來返香港比阿媽煲人蔘雞湯，都好有人蔘味。

祭基洞的京東市場

買人蔘

我地行去清涼里站坐地鐵走，去到清涼里站原來有樂天超級市場，好野！禽日去唔到，今日可以去啦！係超級市場買左兩大袋手信，拎住兩大袋野，諗諗下係附近搵野食算啦！

清涼里站樂天超級市場

於超級市場樓上有一間食韓式自助餐既餐廳，門口好多人等位。我一向去旅行好少食自助餐 (除左早餐)，但見呢間野咁多韓國人等位，應該都唔會冇料到，所以決定去試下。入到去，先走去睇下有咩野食，嘩！同平時食既自助餐好大分別，包燒肉既菜都有幾款，韓式冷麵有好多醬汁，都唔知點落？即製石頭飯又唔知要落咩落去？好似大鄉里第一次食自助餐，無從入手！第一輪都係拎左碗湯返埋位先。剛好隔離檯有兩位韓女剛剛坐低，我等左一陣，見佢地出去攞野食，我又跟住佢地出去，我見佢地攞咩，我就攞咩，見佢地落咩醬汁，我又落咩醬汁，哈哈！終於學識點食韓國自肋餐啦！成個自助餐最好味係韓式冷麵，個汁酸酸地，麵有彈牙，另外石頭飯熱辣辣好惹味，甜品自家即製紅豆冰好好玩。最後埋單兩個人 33800 韓圜，好平，好抵食！

食自助餐的餐廳，得韓文名，唔知叫咩

餐廳內

石頭飯及紅豆冰機

石頭飯、冷麵、紅豆冰及燒肉

晚飯後先回酒店放低超級市場買的手信，休息一陣就去東大門行下。去到韓國點都要試下炸雞啤酒，東大門有一間僑村炸雞，網上評價好好，我就親身去試下。僑村炸雞舖位好細，一入去就係點餐既地方，後面就係廚房，樓上有幾張堂食既檯。我點了一客一半原味一半辣味的雞，點完就要等。我見其實佢地主力做外賣，所以都等左半個鐘左右先有得食。原味隻雞肶幾好食，其他胸呀，背呀就冇咩肉食，同埋炸到好乾。辣味就辣到跟本食一兩塊已經頂唔順。食完我覺得好一般，肯得基上校整得仲好食。不過如果大家真係要試，我建議只點雞肶，唔好食其他部位。