Joseph@外地遊記: 201604 荷蘭第六日 - 阿克馬(Alkmaar)，福倫丹漁村(Volendam)，荷蘭風車村 (Zaanse Schans)

2016/04/08

201604 荷蘭第六日 - 阿克馬(Alkmaar)，福倫丹漁村(Volendam)，荷蘭風車村 (Zaanse Schans)

今日天氣預測，都係陰晴不定，時好時壞，我地照原定行程，9:00 出發，揸一個半鐘車去阿克馬 (Alkmaar)。

阿克馬 (Alkmaar)

阿克馬最出名係傳統芝士交易市場 (Alkmaar Cheese Market)，每年四月至九月既逢星期五早上，係市中心既廣場，當地芝士業者就以古老芝士交易方法去拍賣芝士。兩人一組既工人，純熟地以傳統木架搬運芝士，非常有趣。另外場內仲有穿著傳統服飾的荷蘭小姑娘即場售賣芝士，我地為左吸引佢地過黎同我地影相，都買左幾袋芝士。後來返香港開左呢幾袋芝士食，真係好好味喎。係廣場旁仲有間阿克馬芝士博物館，我地張博物館證可以免費入場，所以入左去睇下。

市中心既廣場

滿地芝士

傳統運送芝士

穿著傳統服飾的荷蘭小姑娘

為左同佢影張相，所以買左一袋

袋裡面既芝士

旁邊仲有好多小攤檔

賣芝士既小攤檔

阿克馬芝士博物館

12:00 由阿克馬揸半個鐘車，去到福倫丹漁村 (Volendam)。福倫丹位於海邊，海邊既街上開左不少餐廳、小食店、賣紀念品既小店，就好似我地長洲咁，遠離城市，好簡樸舒服既地方。

福倫丹漁村 (Volendam)

所謂靠海食海，黎到呢度，我地既午餐更係食海產啦！係荷蘭，當地人好鍾意食生希靈魚 (Raw Herring)。日本人會將希靈魚切片，再混入一粒粒黃色的魚籽醃製食酸酸甜甜味道既刺身片。荷蘭人就張手指左右大細既希靈魚醃係醋或特製鹽水內，然後成條食。聽聞係福倫丹食希靈魚係好新鮮，所以一定要試下。我係街邊一檔點左一條，個店員幫我張條魚切開一塊塊，唔駛成條放入口，心理上已經好左少少。條魚表面滑潺潺，都幾肉酸。第一塊放入口，感覺都幾核突。不過衝過第一啖既關口，食落又唔錯喎。起碼下次再黎荷蘭，我會再食希靈魚。只係食左條魚仔，更係唔夠飽，我另外仲食左 Fish and Chips 及 Poffertjex (即係 Pancakes)，荷蘭既炸魚薯條原來都幾好食架。

賣希靈魚既檔仔

生希靈魚

買炸魚薯條

炸魚薯條

Poffertjex, 荷蘭班 Pancake

我地由福倫丹揸左半個鐘車，去到著名既風車村 Zaanse Schans。好多旅行團都會黎風車村，因為呢度係免費入場。亦因此，村內有好多商店黎賺返遊客錢，例如餐廳，芝士廠、木屐廠、糖果店等。我覺得小孩堤防比較鄉郊，而風車村商業味就較濃，我比較喜小孩堤防。雖然風車村商業味比較濃，不過環境真係好靚既。好多古老既房屋，再有風車、草地、小河流。真係隨便舉起相機影，都影到靚既風景相。

風車村 Zaanse Schans

風車村

可以入去風車內參觀

風車內睇其他風車

風車內部，用風力去磨穀物

合照

木屐廠

好閃既木屐

由風車村返去烏得勒支 (Utrecht)，大約一個半鐘。我地今晚食米芝蓮推介既法國菜，叫 Elvi。餐廳唔係太大，大約十張檯左右，裝修格調走大路既簡約型格路線。我地叫左四道菜既晚餐，價錢係 €40，另外再加生蠔，每隻€2.9 。Elvi 既上菜速度係好正宗既法國餐，超慢！我地真係食足三個鐘。不過慢工出細貨，由頭盤、主菜、甜品都整得好好，賣相同味道都對得住「米芝蓮推介」呢個稱號。