201604 荷蘭第一日 - 鹿特丹 (Rotterdam)

今次又係同家人去旅行，一直以黎都好想去荷蘭睇下運河、花同風車。係年初時都預計四月去荷蘭，一路等有冇特價機票，終於三月頭，德國航空 Lufthansa 有港歐廣機票，來回去歐洲加一程香港飛廣洲，連晒稅 HK$4996。雖然冇上次去法國 HK$4510 來回法國加單程台中咁抵，但呢口價算係呢排最抵啦！買完機票，淨返冇一個月時間去 Plan 行程、預約租車、租酒店，所以一切都要以極速進行！

荷蘭風車

荷蘭其實唔算太大，所以我地只係住兩個地方。一落機會先去鹿特丹住，玩完鹿特丹及附近景點，我地就會轉去烏得勒支 (Utrecht) 住，跟住玩阿姆斯特丹 (Amsterdam) 及附近景點。我地選擇住烏得勒支，而唔住阿姆斯特丹，係因為阿姆斯特丹住宿好貴，同埋我地全個旅程都租車，揸車入去阿姆斯特丹係一件非常麻煩既事，又多車，又難泊位，比你泊到，停車場錢又超貴。

荷蘭鬰金香

2/4 晚上出發去機場，坐 23:20 分既機先去慕尼克，呢班機正正係幾個月前去法國坐過既機，所以好熟悉既感覺。上次去法國都講過，德國航空呢架機最好既地方係將所有廁所集中係機既下層，一來唔怕騷擾到坐廁所附近既人，二來又唔會有臭味飄到客倉。呢程機係坐十二個半鐘，我一向坐長途機都極好瞓，食完晚餐就瞓，瞓醒食早餐，跟住就差唔多落機。我地係德國時間早上 05:40 落機，今次唔知搞咩，個入境海關位超多人，好似係因為有一班由大陸黎既機又係剛剛著陸，兩班機既人迫晒係度，我地排左成個鐘先入到去轉機大堂。過完海關，去到飛歐盟機既候機大堂，呢度好大，有好多商店，最好係有免費咖啡、茶、朱古力任飲。我地後來發現飛國際線既候機大堂係冇免費飲品既。

出發

漢莎航空

慕尼克日出

慕尼克機場有個小型既Allianz Arena 球場

機場有免費飲品

係慕尼克等左個零鐘，早上 08:50 就起飛去阿姆斯特丹。今次呢班機個航空公司叫 Air Dolomiti，呢間航空公司係德國航空 Lufthansa 既子公司，專飛德國去意大利航線，所以機上好多野都用意大利文。我真係第一次聽呢間航空公司個名！

Air Dolomiti 去阿姆斯特丹

10:30 到達阿姆斯特丹機場，出發及抵達都係同一個大堂，呢個大堂有好多商店，我地第一時間去左賣鬱金香既花店，影張相放上網呃下 Like 先啦！拎返行李後，我地走去電訊舖睇下上網電話卡幾錢，€25 有 1GB 上網。其實我一早上網睇左價錢，機場買卡係好貴，都係出返市區先買。

機場內已經有鬰金香賣

我地一早跟 Sixt 租車公司預訂左兩架 BMW 2 Series Grand Tourer 或 Opel Zafira 棍仔車，我梗係想揸 BMW 多過 Opel 啦。機場既租車公司全部位於火車站大堂，我地去到 Sixt 櫃檯，我成功租到 BMW 2 Series GT 棍仔車，但細佬得 Opel，佢又唔想揸 Opel，咁唯有加錢升級去 BMW 3 Series 自動波。搞好晒租車手續，我地行去停車場攞車。呢段路超遠，仲要拉住行李，我地即刻決定還車時一定一定要去 Airport Dropoff 放低晒行李同人，然後先去還車。我架 BMW 係 218i，因為呢款 2 系新出左唔係好耐，所以呢架車超新，只係行左 2375 公里。細佬果架係 316d，油渣車，比較慳油。兩架車都有 GPS，我架 218i 仲有 HUD (Head Up Display)，唔需要低頭就可以睇到車速及 GPS 資訊，又安全、又方便。

BMW 218i 及316d

有好好用既 HUD

我地先揸 40 分鐘車去 Novotel Rotterdam Schiedam 酒店，呢間酒店位於鹿特丹西面近郊地區，揸車返鹿特丹市中心大約 13 公里，約 15 分鐘車程。我地揀呢間酒店係因為佢有免費泊車，房間又夠大，有 22 平方米，同埋佢唔貴，平均一晚 €75。我地下午 1:00 到達，酒店方面已經安排左房比我地直接上去放低行李。坐完長途機，大家都好攰，所以係房休息及梳洗下，然後先出發入鹿特丹市。

上高速公路去鹿特丹

Novotel Rotterdam Schiedam 酒店

我間房

房既窗外景色

鹿特丹既著名景點，大部份位於布萊克車站 (Blaak Station) 附近，所以我地將架車泊左係 Kipstraat 街既停車場，每泊 29 分鐘€1。一落車，大家都肚餓啦！我地行去 Witte de Withstraat 既 Ter Marsch & Co. 食漢堡。先介紹下 Witte de Withstraat 呢條街，呢條街上有好多藝廊、設計師個人小店、餐廳、咖啡店及酒吧，係當地次文化既聚集地，好有悠閒藝術氣息。

Witte de Withstraat 

我地去既 Ter Marsch & Co. ，係獲得全荷蘭最佳漢堡獎既漢堡飽店，來頭都唔惹少。呢間店有不同既漢堡，分別在於唔同既牛肉，有熟成肉眼、蘇格蘭安格斯及和牛等選擇。我地叫左幾款，入口真係有少少分別，不過你唔係叫晒黎每樣食一啖咁試，你係好難食到個分別。總之呢間店既任何一款漢堡，都係即叫即整，牛肉又厚又多汁，配菜又新鮮爽脆，真不愧為全荷蘭最佳漢堡。

Ter Marsch & Co. 食漢堡

獲獎既漢堡

由鹿特丹火車站一直去到Westblaak大街，有一條鹿特丹最旺既商店街，叫做 Lijnbaan。我地先去搵上網電話卡，我本來想買一張 Lycamobile 電訊公司既電話卡，據說係最抵既，但搵極都搵唔到。我地後黎見到有間 Vodafone 門市，就買左張€15，4G 網絡，一個月有 1GB 數據，平過機場 €10 啦！

Lijnbaan 商店街

鹿特丹著名獨特建築有方塊屋 (Kijkkubus)、鉛筆屋、水管圖書館 (Centrale Bibliotheek Rotterdam) 及鹿特丹市場 (Markthal)，全部集中於布萊克車站。方塊屋係當地有名既創意建築，每間屋都係傾斜 45 度既立方體，一排方塊屋型成一組外型特別既建築群。方塊屋其中有幾間屋係由一間青年旅館經營，本來想租黎住下，不過我想訂時已經滿晒。如果想入方塊屋參觀，可以比 €2.5 一位，去睇下示範單位。屋內其實真係三尖八角，不過經過設計師設計既特製傢俬下，又變得好實用，地方又見使。

鹿特丹市場旁既大草地及摩天輪

水管圖書館及鉛筆屋

方塊屋

方塊屋，後面係鉛筆屋

方塊屋

方塊屋

方塊屋內

方塊屋內既尖頂

鉛筆屋及水管圖書館係正方塊屋旁，因為方塊屋太特別，所以鉛筆屋及水管圖書館就冇咁顯眼，我地都係影張相就算啦！跟住我地就去左鹿特丹市場，鹿特丹本來有一個露天市集，2009 年，當地開始興建呢座室內市場去代替露天市集。荷蘭建築團隊花左四年時間，於 2014 年 10 月，建成呢座馬蹄形拱頂新地標，而市場室內拱型天花，畫左一幅色彩鮮豔既壁畫，呢幅畫仲係全世界最大既藝術品。

鹿特丹市場

鹿特丹市場

鹿特丹市場天花壁畫

對正鉛筆屋

鹿特丹市場除左好睇之外，仲好食好行！市場內有好多好多熟食檔、生果檔、芝士檔、仲有超級市場。我最鍾意係一檔番茄檔，佢有好多不同顏色及品種既小番茄。客人可以買一隻大膠杯或細膠杯，然後任你夾小番茄入隻杯。佢仲大方地比我地夾之前試食小番茄，佢既小番茄真係又甜又多汁！

鹿特丹市場內

鹿特丹市場

好味既小番茄

我地係布萊克車站附近既商店行到 6:30 左右，跟住去左 Alan & Pim's 烤雞店食晚餐。去到既時候，全餐廳滿座，職員話就算外賣，因為人太多，佢地烤唔切，起碼要等一個鐘先有得食。因為今朝坐完長途機，大家都唔想太夜返酒店，所以我地放棄食烤雞，決定返酒店餐廳食，食完就返房休息。

Alan & Pim's 烤雞店

酒店既餐廳好少人，我地六個人係全場最多人既一枱。我地叫左肉醬意粉、千層麵、薄餅、沙律及意大利飯。係酒店食，預左一定冇咩驚喜。千層麵及薄餅應該係一早整好雪住，然後用焗爐焗返熱佢。唯一好既係碟肉醬意粉超大碟。

酒店內食晚餐

都係食沙律、意粉及薄餅