Joseph@外地遊記: 201601 日本関東甲信寒冬遊第七日

最後一日既旅程，今日係東京發癲狂食日！10:15 先出發去築地食早餐，我地去左一間叫「虎杖」食海鮮丼。呢間店有個叫「虎杖元祖海鮮ひつまぶし」既海鮮丼，內有十二種切到細細粒既不同刺身，呢個飯有三種食法，可以就咁食個海鮮飯，或者用香菇及蓮藕撈個海膽食，或者加湯成為茶漬飯。我唔係太鍾意搞到剌身古靈精怪咁食，所以我叫左一碗正正常常￥2280 既極丼，碗飯上面舖有中拖羅、海贍、大蝦、蟹及帶子等十一種刺身。呢間既剌身食得出好新鮮，真係唔錯！

築地

海鮮丼

有舖頭即劏吞拿魚

係築地，一定可以見到一間叫「築地山長」既玉子燒店，因為佢門口時常排左一大條隊。玉子燒係日本料理中頗考功夫既一種美食，「築地山長」門口有師傅即場示範整玉子燒，大家睇完學唔學識整就真係睇天份。不過唔識整既，就可以幫襯師傅買黎食，熱辣辣新鮮出爐，一串仲要只係￥100，大件好味又抵食！

築地山長

玉子燒

1:00 左右我地就坐 JR 去新宿車站食 BAKE 芝士撻。我係香港 SOGO BAKE 分店都買過幾次返屋企食，通常返到屋企會用焗爐整返熱佢。今次真係第一次試剛出爐就食！BAKE 芝士撻好食之處就係佢個芝士心係流流地，即係流心咁，又唔會太甜。新宿店係一間外賣店，我地買完要企係度即刻食左佢，如果係一間 Cafe，可以坐低買杯咖啡，一路飲一路嘆呢個撻就非常完美啦！

新宿

BAKE 門口排大隊

BAKE 芝士撻

係新宿行左一陣商店，走左入去一間 UNIQUO 同 BIG CAMERA Crossover 既舖，佢叫自己做 BICQLO。呢間 BICQLO 有九層，每層有一半係賣 UNIQUO 衫，另一半係 BIG CAMERA 賣電器。我覺得呢個 crossover 好聰明，女士可以去睇衫，男士可以去睇電器。

BICQLO

跟住我地又坐 JR 去明治神宮前，表參道附近既 Luke's Lobster 食龍蝦飽。Luke's Lobster其實係來自美國紐約既超人氣龍蝦飽店。龍蝦飽有兩種 US 及 Regular ，其實係大細既方別，US 飽內有一隻龍蝦既肉，Regular 飽內有半隻龍蝦既肉。我地咁為食，梗係叫左 US 啦！買完要等佢即刻整，大約五分鐘左右就有得食。龍蝦肉真係非常多，填滿成個飽。入口龍蝦肉爽口鮮味，好好食。不過因為天氣都幾凍，係戶外食，個飽好快就凍晒。

Luke's Lobster 食龍蝦飽

龍蝦飽

我地係原宿行去渋谷，目的就係去食雪糕菠蘿飽。呢間店個名好鬼長，叫
「世界で2番めにおいしい焼きたてメロンパンアイス」，意思即係世界第二好食既雪糕菠蘿飽。雪糕菠蘿飽個飽似我地香港菠蘿飽，仲要好似剛剛焗好咁，又熱，個菠蘿皮又脆。飽中間夾左一片雪糕同一片真菠蘿。入口個飽又熱、個雪糕又凍，個菠蘿又有少少酸、個雪糕又甜。好複雜既口感，好特別，但又好夾，總之就係好好食！佢自稱世界第二好食，咁第一好食係點既呢?

食雪糕菠蘿飽

雪糕菠蘿飽

食雪糕菠蘿飽都好大件

係渋谷，我地快速咁行左一陣。我去左 Disney Store 同一間叫 ONE PIECE MUGIWARA STORE 既海賊王專門店。我地預訂左 6:30 去「よろにく」食燒和牛，點知我地 Shopping 到成 6:15 ，由渋谷行去都要半個鐘，而我地又要 9:00 前返酒店拎行李，時間太趕，所以我地放棄去食和牛囉。

ONE PIECE MUGIWARA STORE

Disney Store

冇得食和牛，諗住去渋谷車站附近既另一間出名芝士撻店 Pablo 買芝士撻食，去到點知執左粒！Pablo 咁出名都執，有冇搞錯呀！

橫惦食唔到和牛，我地用埋食飯時間去台場既 AQUA City 行下，順便影下彩虹橋。夜晚去到大江戶溫泉物語先食晚飯。

彩虹橋

台場自由神像

台場一丁目商店街

8:30 左右返去酒店拎行李，跟住就去大江戶溫泉物語。我第一日都講過，大江戶溫泉物語有個套票，¥3300 包入場浸溫泉及專車於零晨 3:50 開去羽田空港，啱晒我地坐一早機既人。去到大江戶溫泉物語，係門口除左鞋，將行李鎖入 locker ，跟住去櫃檯同職員講訂左羽田空港專車套票，跟住比左錢就可以去揀浴衣。大家去更衣室換左浴衣，然後就去仿舊日本江戶時代街道既商店街。呢度有餐廳、有占卜、有小遊戲及小商店。我地先走去食拉麵。本來今晚食和牛，而家變左食拉麵，好大反差！