Joseph@外地遊記: 201601 日本関東甲信寒冬遊第六日

2016/01/26

201601 日本関東甲信寒冬遊第六日 - 晴空塔，淺草寺，汐留

早上 8:00 係酒店食左個好簡單既早餐，有燒魚、炒蛋、香腸、沙律、飯、麵包及湯，係咁多，數晒啦！

酒店食簡單早餐

冇咩人食早餐

簡單早餐

9:15 開車離開輕井沢返東京，車程都要三個鐘左右。由輕井沢離開先行國道 43 號，呢段路都有上山落下既路，所以我地仲要用條雪鏈。當去到碓氷軽井沢，跟住就上高速公路「上信越自動車道」，直去東京。係上高速公路前，我係一個空地停左車，開始拆雪鏈，大約 20 分鐘就成功拆完雪鏈。一上返高速公路，我隻黃金右腳終於解封，比行油，直上 110km/h，爽晒！

拆雪鏈

去到東京既首都高

係東京，我地會住係位於台場既 Oakwood Apartment Ariake Tokyo，其實好多人都唔係太鍾意住台場，因為出入都要坐比較貴既百合海鷗號，或臨海線電車去東京市中心。我地選擇住台場係方便最後一晚，帶住行李去同樣位於台場既大江戶溫泉物語。

係東京住既地方

大約 12:15 去到酒店，本來諗住先寄存行李，不過酒店方面好好，佢比我地提早攞房。房間有 20 平方米，附設簡單廚房及露台，景觀好開揚。係酒店後面有個叫 Tokyo Fashion Town 既商場，商場內咁啱有郵局，我就帶條雪鏈寄返去草津町。寄條咁重既雪鏈，只係須要￥620，比我預計平好多好多！

房

有廚房設施

開揚既露台

由台場揸架車去豐田吾妻橋店還車，然後行去附近既晴空塔，順便係晴空塔個商場食午餐。商場內有一間叫「トリトン」既回轉壽司店，因為呢間店係 Tablog 都好高分，我地去到門口都見好多人排緊隊等入去！係日本食回轉壽司，差極都有個譜，而呢間店既壽司算係中上既，價錢又唔太貴。

晴空塔

トリトン回轉壽司店

回轉壽司

食左好多碟

本來想上去晴空塔睇下，去到售票處，見到￥2,060 一位，好鬼貴，所以冇上去，只係商場行下。商場三樓有間 Jump Shop，喜歡日本動漫既朋友一定唔好錯過！

晴空塔

冇上晴空塔，係下面塊板影張相

有十年以上冇去過淺草，而晴空塔離淺草都幾近，所以我地行到 5:00 左右，就坐電車去淺草行下，影下相。淺草除左行淺草寺及仲見世商店街，最近好多雜誌都介紹一間新開既購物商場「まるごとにっぽん」，呢個場主打係可以係呢度買到日本唔同地方既名產及手工藝品，食到日本唔同地方既美食。

淺草雷門

仲見世商店街

淺草寺

まるごとにっぽん內

今晚我地訂左去野田岩本店食鰻魚飯，野田岩本店係榮獲米芝蓮既一星飯店。我地去到被安排一間獨立房間，我叫左一個￥6400 既「鰻三楽コース」，先有一份前菜鰻魚凍，一層成啫喱狀既鰻魚汁包著一塊鰻魚肉，好香鰻魚味，好特別。跟住上左個白燒鰻魚，塊鰻魚冇加醬料黎燒，再放係一個有熱水係底保溫既盒內，呢塊鰻魚燒得好好食，唔會太肥。呢個餐最後仲有我最期待既鰻魚丼，另外附上漬物及鰻肝清湯。個鰻魚丼比預期係差，入口冇咩炭燒香味，個飯比汁搞到好濕，我食左一半開始有膩既感覺，唔係好想食，最後要用唔好浪費既心態去食晒去。我都係比較掛住柳川同名古屋既鰻魚飯！