201601 日本関東甲信寒冬遊第五日 - 草津温泉，軽井沢

今朝起身，天氣依然寒冷，地上面既積雪比禽日仲多左，睇黎我地架車冇可能離開到草津温泉。唔理住，先去浸溫泉，日頭去大浴場浸露天風呂，可以睇住風景浸，真係冇得頂！我今朝仲去埋「岩室」同「光林」呢兩個貸切露天風呂。

窗口有掛冰

條路好似仲惡劣左

後面就係貸切露天風呂

貸切露天風呂

有人砌左兩個雪人仔

食早餐時，我地商討下，結論係我地架車一定要有雪鏈，先可以安全離開草津温泉。我先諗下有冇慳錢既方法，我嘗試走去大堂叫職員幫我打電話去最近草津既長野原草津口豐田，問下佢地有冇雪鏈租，佢地叫我打返去我租車既東京店，嘥氣！東京店既人點黎草津呀！咁我唯有叫個職員，幫我打去禽晚佢地比我張單張個電話，叫人黎幫我安雪鏈。係個電話度，對方話同佢地買真係要萬幾円，另外仲有安裝費要收。佢話可以租，租就幾千円，要黎睇左先可以報到價。有得租更係租好啦！買既話，條鏈用完都唔知點處置。

自助早餐

自助早餐

我約佢 9:30 黎到酒店，日本人真係超準時，呢位叔叔真係 9:30 黎到。我帶佢去睇下架車，佢報比我 ￥5000，如果要佢安裝就另外￥2000，一共 ￥7000，好抵！我諗都唔駛諗，即刻叫佢安雪鏈。大約 30 分鐘左右就安好左，然後個叔叔就教我點拆雪鏈，以及雪地行車要注意既地方。佢叫我落左山，去到長野原，路邊有個箱，張條雪鏈放入去就可以還返比佢。我同佢講，我要去軽井沢，因為去軽井沢要再行另一個山，所以我唔可以係長野原還雪鏈。佢好好人咁叫我去到東京，然後去郵局寄返比佢。雖然我唔知係東京寄條咁重既雪鏈返黎草津會唔會好貴，但為安全計，郵費幾貴都冇所謂！另外，因為我會用多兩日條雪鏈，位叔叔又冇再計多我錢，都係收我￥7000，太好啦！

安好雪鏈啦

上左雪鏈，一開車，架車好嘈，好震！基本上冇可能可以開得快過 50 公里，不過真係好輕易上到斜同停到車！因為我唔再須要好專注留意路面冰雪狀態，所以揸車時都輕鬆左好多，冇禽日咁嘥神。10:20 我地離開溫泉旅館，開車去草津市中心，沿路經過好多好斜同積左厚雪既路，條雪鏈真係發揮到作用。不過落斜時都唔好咁快，因為鬆散既積雪都有少少跣。

草津市內既路，全都係雪，有雪鏈，輕易落斜

呢條斜路就係禽晚上唔到去既地方

斜路旁既 7-11，我禽晚係係呢間7-11 門口嘗試轉上斜路好多次

我地去到草津既湯畑観光駐車場泊左架車，跟住先去熱乃湯睇「揉湯」表演。係草津，為左唔好令泉水變質，當地有兩種方法令水降溫，「揉湯」係其中一種。「揉湯」以木板，跟住草津民謠既節奏，一路跳舞，一路拍打泉水，令其降溫。係熱乃湯，大家就可親身體驗揉湯既樂趣。

熱乃湯門口

揉湯

仲有舞蹈表演

我地都揉湯

溫泉街中心的「湯畑」係草津地標景點，一個個整齊木箱組成既湯畑，其實就係另一種令泉水降溫既方法。泉水流過木箱，籍此降溫，然後再輸送到附近溫泉旅館。

湯畑

湯畑

係溫泉街行左一陣，大約逗留左一個鐘，我地就揸車去軽井沢。因為我地唔可以開太快，所以原本一個鐘既路程，我地用多十五分鐘先去到。我地首先去「村民食堂」食午餐。唔好一見食堂兩個字，以為係香港工廈級數既食堂。「村民食堂」係由星野度假村經營既餐廳，餐廳全落地玻璃，一路食野，可以一路睇景。食物方面，最特別係採用信州當地食材，所以口碑極佳。天寒地凍下，我地叫左火鍋黎食，另外有人試左燒銀鱈魚，肥美香滑！

村民食堂

村民食堂

我食火鍋

「村民食堂」後面就係「星野溫泉」，「星野溫泉」係一所大眾溫泉，比錢就可以入去浸，聽聞裡面有室內同露天溫泉，露天溫泉向住森林，冬天係飄雪下浸，簡直無得頂！我本來諗住今晚黎浸，不過唔知做咩，今日唔開門！所以冇得浸囉！

星野溫泉

星野溫泉旁雪景

星野溫泉旁雪景

石の教会 内村鑑三記念堂係軽井沢地標建築，呢個教堂外型獨特，係冬天舖左一層雪，我覺得好似灑左一層糖霜既牛角飽。教堂內部可以入去參觀，但唔可以影相。內部跟個外型都係咁獨特，陽光輕透入黎，好寧靜詳和既感覺。

石の教会 内村鑑三記念堂

係軽井沢有個叫「星野榆樹小鎮」既商店小鎮，小鎮建於淺溪旁。鎮內有餐廳，咖啡座及各式商店，係漫步購物既好地方。但係唔知係唔係因為太凍，成個鎮都冇咩人，好多店舖都冇開門，跟我想像中既悠閒小鎮相差好遠。本來諗住係度飲下咖啡，行下小店，見到咁既環境，都係走啦！

星野榆樹小鎮

雲場池係軽井沢另一著名觀光名勝，雖然叫做池，但佔地亦不少，所以應該叫做湖。我地冬天黎到，冇咩人，平靜的池水再配上四周雪景，景色壯麗。如果秋天黎到，漫天紅葉，更為艷麗。

雲場池

雲場池

又有人整左個雪人

軽井沢王子購物廣場係一個超大，品牌超多既 Outlet。呢個 Outlet 裡面有個湖，環境非常優美，同平時去開既 Outlet 好唔同。我地係 Outlet 行左兩個鐘以上，但呢度大到我地一半都行唔晒。去到呢個 Outlet ，大家一定要去買呢度獨有既年輪蘋果蛋糕。呢個蛋糕中間有個完整既信州蘋果，外層包左年輪蛋糕。帶微酸既蘋果跟外層軟甜既蛋糕，非常配合。

軽井沢王子購物廣場

年輪蘋果蛋糕

切開左既年輪蘋果蛋糕

都買左野呀

係 Outlet 行到 7:00，跟住就揸車去一間叫 「ろぐ亭」 既餐廳食燒和牛。係網上好多中文網頁都有介紹呢間舖，我地去到真係超多人，不過唔係多日本人，係好多台灣人，仲有台灣團成車黎食晚飯。餐廳既職員仲要識講國語，我以為自己係台灣。我地叫左頂級既和牛拼盤，有唔同部位既牛肉。食燒和牛最能食到和牛既精彩地方，未入口已經聞到焦香及牛油香，入口肉質軟滑，再配一碗用日本米煮既白飯，真係簡簡單單既極品。

燒和牛晚餐

食完飯，我地揸車去左一間叫 MATSUYA 既超級市場買下手信，跟左就揸車去今晚住既酒店 Chisun inn Karuizawa 。呢間 Chisun Inn 跟前晚係長野既 Grand Chisun 真係有分別，冇左個 Grand 字就真係變番普通既商務酒店，細細既大堂，細細既房。我地成 10:00 先 check-in，聽朝又一早走，所以選左呢間平平地既酒店，主要沖個涼，跟住就瞓啦！

Chisun inn Karuizawa，第二朝早影既

細細間房