Joseph@外地遊記: 201601 日本関東甲信寒冬遊第二日

禽晚雖然好夜瞓，今日因為行程緊密，所以 7:30 就起身。東橫 INN 包埋早餐，不過就好簡單，得飯、粥、漬物同溫泉蛋。食完我就先去 Toyota 攞車，去到架車真係冇雪軚，成個東京都冇咩雪，咁我照租啦！不過佢要我簽一份免責聲明，話係冇雪軚，避免駛去雪地等資訊。

一早去租車

租左呢架 Prius α

我地首先會揸大約一個鐘車去位於川崎市既藤子・F・不二雄博物館 (多啦 A 夢既作者)。呢個博物館買入場票好麻煩，要預先上網預約入場時間，再係入場前去是但一間 Lawson，搵部機印張入場票出黎。我預約左 10:00 入場，因為驚中途車程有阻滯或搵唔到停車場，所以冇一早係東京既 Lawson 印定張飛出黎。我去到川崎市，係市內一個停車場泊左車，然後去附近 Lawson 開始搞張飛出黎。我之前上網睇定部機點操作，點知去到一個位要入名，佢一定要我入日文名，我識鬼用佢地個鍵盤打日文咩！我叫 Lawson 個職員幫我，佢又好似唔係好知點搞，試左幾次，終於過左 10:00，部機話過左時，冇得買 10:00 既飛。專登揸車黎到，入唔到去好失望！我地唯有行去門口影張相當入左去啦！

泊左架車係呢個停車場

市內橋上面既欄都有多拉A夢果樣

去到門口，佢真係絕到一隻多啦 A 夢公仔都冇！我見其他人都好開心咁入去，好失望呀！好失望呀！門口檢查入場票果兩個日本妹都幾卡娃兒，我試下問佢地有冇計先。其中一個日本妹幫我用對講機問下人，然後佢話有另一個職員會出黎幫我。係唔知邊度，突然有個男人走出黎，叫我跟住佢去左一個辦公室既地方。佢即刻手寫左四張入場票比我，我就比錢佢。跟住我就開心到跳下跳下走返去搵個兩個卡娃兒既日本妹。唔係！係返去搵返我既團友們一齊入場啦！好多人都話日本人好有原則，但都好有人情味呀！

門口得個牌

真係一隻公仔都冇

市內既巴士好可愛

大巴士亦都好可愛

博物館入場票價 ¥1000，入到去有好多藤子・F・不二雄既真跡手搞，唔只有多啦 A 夢，仲有神奇小子及Q 太郎。最得意去到戶外區，有好多一比一大細既公仔黎影相，有個靚仔版胖虎係個井升上黎，又有大雄時常去有三條大水泥管既公園。經過餐廳門口，我地唔會入去食，但見個餐牌，每樣食物都整到好卡通樣，我仲見到有多啦 A 夢既記憶麵包呀！

靚仔版胖虎

好大部多啦 A 夢扭蛋機

神奇小子曬緊太陽

戶外既多啦 A 夢

當然唔少得隨意門啦

有三條大水泥管既公園

少靜香玩緊大水泥管

Q 太郎

多啦美

餐廳由胖虎接待

精品店好多野賣

四周既指示牌都好有心機去整

係博物館玩左一個鐘多少少，行番去攞車。11:50 開車，揸左半個鐘去到河口湖富士急遊樂場附近一間叫「ほうとう不動」既餐廳食午餐。先講講開車過黎既野先，我地一路行中央自動車動呢條高速公路，兩旁都有積雪，不過路中間因為灑左鹽，所以冇雪，我架車照高速行都冇事。但離開左高速公路，條路兩邊勁高積雪，條路又有少少雪，有時仲有冰。我見咁既情況，用超慢速去過都仲可以！

好彩條路冇咩雪

講番個午餐，ほうとう其實係烏冬既一種，以蔬菜及味噌黎煮，係山梨縣既郷土料理，更加係河口湖既必吃名物。「ほうとう不動」有四間分店，我地去呢間東恋路店比較特別，外型似一舊雲，位置在一個可欣賞富士山既地方。

似一舊雲既ほうとう不動

仲可以見到富士山

我地叫左一人一碗ほうとう，另外叫左一碟馬刺，即係馬肉刺身。馬刺先到，肉身有好分明既雪花，配薑蓉及芥辣，入口似牛肉。碗ほうとう以鐵鍋上，似係即刻係火爐煮完，原鍋上枱。鍋內有不同既蔬菜，湯底完全係蔬菜既清甜味，烏冬入口彈牙，唔會煮到爛溶溶。係冬天，食呢鍋熱辣辣既烏冬，真係最適合。

ほうとう不動內

馬肉刺身及烏冬

午餐後，繼續向河口湖出發，沿路依然係有少量既雪同冰，我一見地下有冰，就唔比油，等架車慢溜過去，暫時都仲應付到！去到河口湖，泊好車，跟住坐纜車上天上山公園睇富士山。上到山係就係可以一望無際咁見到個富士山，不過個太陽係正富士山旁，影相背晒光。呢度應該係上午黎比較好。

去到河口湖

坐纜車上天上山公園

纜車上望見既河口湖

天上山公園睇見既富士山

逗留左一陣就坐纜車落山，然後係山腳間「河口湖芝士蛋糕公園」(河口湖チーズケーキガーデン)食下蛋糕。

河口湖芝士蛋糕公園

一人一件芝士蛋糕

心心不忿下，決定去埋大石公園睇富士山。因為要好專心睇清楚條路既冰，所以好小心咁慢慢揸去，短短十幾分鐘車程都好似好耐咁。黎到大石公園，呢度係湖既另一邊，下午時候太陽既位置係右手邊，完全冇影響到我地影相。另外呢個位置仲可以張富士山同河口湖一齊攝入鏡內！黎到大石公園，我地順便入埋去旁邊既河口湖自然生活館睇下，裡面有當地手信，農產製品等售賣。

大石公園睇富士山

同富士山合照

5:30 天開始黑啦！我唔想係入夜後揸車，因為睇唔到路面情況，好危險。所以我快快揸車去今晚住宿既「湖南荘」溫泉旅館。湖南荘正正位於河口湖遊覽船碼頭旁，我選呢間最主要係因為佢個大浴場可以睇見富士山。我地住係傳統日式客房，窗望湖景，可惜我地入到房時已經 6:00 ，天都黑晒，望出去咩都睇唔到。我地係房沖下茶，食下餅，跟住上左天台既足湯浸下腳，然後 7:00 就去旅館內既餐廳食晚飯。