Joseph@外地遊記: 201601 日本関東甲信寒冬遊第三日

今日一早未夠 7:00 就起身，就係為左走去大浴場一路浸溫泉，一路望住個富士山靚景，入到大浴場仲要得我一個人，好幸福呀！8:00 返去禽晚食晚餐間房食早餐，呢度既早餐跟晚餐一樣超豐富，有成十幾碟不同既野食，有鍋物、魚、漬物、蒸蛋，食完真係飽到上口心！

我間房就係對住呢個景

穿浴衣去食早餐

豐富早餐

9:15 左右執好行李上車，出發北上松本啦。一駛出去河口湖邊，個湖景靚到明信片咁樣，即時加插落車於河口湖旁影相環節。個湖反影雪山既倒影，雖然只有黑白兩色，但好有雪中既淒冷美。

河口湖邊

影左廿分鐘相，終於起行去摘士多啤梨。我會揸一個半鐘車去位於諏訪湖既「諏訪湖いちご園」。又講下雪中行車啦！由河口湖上左中央自動車道向北走，路面因為有灑鹽，冇咩冰同雪，冇雪軚下仍然可以正常行車。但去到士多啤梨園既戶外停車場，成個停車場都係冰，我用慢過 5 公里既速度泊車，問題亦不大。

諏訪湖いちご園

士多啤梨園收每位￥1,700，入到去溫室內可以任摘任食士多啤梨。呢個園內都可以搵到幾大粒既士多啤梨，食頭幾粒，有士多啤梨既香味，但唔太濃，入口好甜，含水量算中上。再食多幾粒，開始食到有少少酸味。去過日本好多地方摘士多啤梨，最香甜多水既始終係九州既士多啤梨。雖然話就係比九州既差少少，但都係算好好食既，所以我地都食左好多，我粗略估算，應該食左差唔多 90 粒，返到本啦！

摘士多啤梨

好大粒士多啤梨

諏訪湖好近下一個目的地松本，揸一個鐘車就去到松本市中心。我地將架車泊左係松本城旁既停車位。松本城係日本四大國寶城之一，於 1593 年左右建造，樓高五層六階既天守閣，係日本少有保存良好既木造五重六階天守。我地行去天守閣呢段路，雖然好短，但係唔知點解，一黎到松本，又大風又凍，行呢短短既路都凍到好辛苦。我地去到天守閣門口，要買票上去，買票既地方原來係入口處，咁鬼凍要行返出去，又行過入黎，我地都係放棄上天守閣囉。

松本城

午餐我地去一間叫「麺匠佐蔵」既拉麵店，呢間店係 Tabelog 網站有 3.55 分，屬於好高分。行去拉麵店 600 米左右，不過又大風又凍下，行呢條路都好甘。呢間拉麵以信州味噌為湯底，入口香濃。係天寒地凍下，食一碗滾熱辣既拉麵，真係救左我地一命，即時暖入心！

麺匠佐蔵拉麵店

食拉麵

拉麵店對面有座 PARCO 商場，我地入左去睇下，順便避寒。行返去松本城方向時，中途經過縄手通り，縄手通り其實係一條懷舊商店街，主要有雜貨店及古董店，但係又係因為太凍，所以成條街都冇咩人。

縄手通り

松本係出名既日本美術家草間彌生既故鄉，所以松本市美術館內專登為草間彌生設立常設展覽廳。去松本市美術館其實唔係太遠，但咁凍既天氣下，我地都係揸車過去。美術館門前既草地已經見到草間彌生既大型雕塑，旁邊既汽水機及長椅全部鬆上波波點，好似突然間入左去草間彌生既世界咁。上到常設展覽廳，入場費一位￥410。展覽廳有草間彌生既招牌大南瓜，另外仲有好多不同既作品。最特別係有間全鏡房，入到去有不同既點點燈，反射出無限既空間。

松本市美術館

波波點汽水機

波波點長椅

草間彌生展

草間彌生作品

草間彌生雕塑

由松本揸車去長野市，大約要一個半鐘，我地 5:00 出發，盡量係入黑前去到長野。沿路行長野自動車道，路面情況良好，所以都順利到達長野市。

我地今晚住係 Chisun Grand Nagano 酒店，離火車十分鐘路程左右。Chisun 酒店集團既酒店，我以前都住過，係我印象中係房細，但整潔既商務酒店。但今次住呢間，可能因為有個 Grand 字，所以超出我預期。首先大堂好大，唔似一般商務酒店細細個大堂，而佢更有免費朱古力、咖啡或茶任飲。上到房，間房好大，有梳化、有書枱。廁所有正常大細既浴缸，洗手盤唔會騎左一部份係浴缸上面。我訂房時冇訂埋早餐，我見網上既評論講呢間酒店既早餐好得，咁我問下大堂職員幾錢一位，一位係￥1,200。我係呢個酒店品牌集團 Solar Hotels 既會員，我問埋佢有冇會員價，佢話會員價￥1,000 一位，但我唔係佢地官方網頁訂房，所以冇會員價。咁我唔買住，聽朝去餐廳睇下有咩食先決定啦！