201601 日本関東甲信寒冬遊第四日 - 長野，地獄谷野猿公苑，草津温泉

今朝一起身，即刻去窗邊睇下馬路既積雪狀況，比禽日仲嚴重，好可能去唔到今日要去既地方。今晚住既草津温泉旅館仲要係成個行程最好既一晚，一定要諗辦法去到！不過都係食完早餐先算啦！

長野早晨

成條路都有層雪

禽日講過，我今朝會先去酒店頂樓餐廳，睇下有咩食先決定係唔係呢度食。去到餐廳，180 度長野市雪景，未睇食物已經比個景吸引左。跟住睇見有好多地道日式美食，仲有當地鄉土菜式，真係唔錯喎！同埋出面天寒地凍，都係食埋先出發啦！咁我就走返去大堂，再問下會員有冇會員價食早餐，今次呢個職員又話有，好野！￥1000 一位！

有靚景既餐廳

同我間房個景一樣

日式早餐

9:30 我地出發啦！我地預計揸一個鐘車去地獄谷野猿公苑。上左上信越自動車道，然後駛去志賀中野有料道路，跟住去國道 292，沿路都係得兩旁積雪，車道中間未有問題。但到接近湯田中時，一離開國道 292，嘩！成條路唔見左，只係見到白色既雪。我唔敢行，唯有轉番上國道 292 搵另一個出口。呢一刻我不斷諗 Plan B，Plan C。未上山都已經咁惡劣，我地架車一定冇可能去到地獄谷野猿公苑門口。我記得係湯田中火車站有接駁巴士去地獄谷野猿公苑，咁我可以將架車停係火車話，轉巴士上去。我用 iPhone 入左火車站位置，然後跟住行。呢段路起碼見到條路，不過因為路上不時有冰，我都係超慢車咁行，真係唔快過 15 公里。本來一個鐘車程，我地花左一個半鐘先去到火車站。

條路白色一片

火車站有個旅客服務中心，我走去問下去地獄谷野猿公苑既時間表，個女職員話要下午先有巴士去。佢見我有車問我點解唔揸車去，我同佢講我冇雪軚，佢超驚訝！佢建議我地坐的士去，車程十分鐘左右。佢仲同我地叫埋的士，同的士司機講我地既目的地，跟住教我地回程時打電話去的士台叫的士返去火車站。我將架車泊左係火車站旁既停車場，跟住上的士出發。日本的士出左名貴，我地坐左唔夠十分鐘，￥2080。真係好貴，好彩四個人除，一人都係幾十蚊港紙啫。另外架的士上山時轉彎都跣軚，個的士司機好快手咁即時反軚去救車，人地架車有雪軚都跣，我架車一定炒硬！

坐的士去地獄谷野猿公苑

落車既地方旁邊有間餐廳「猿座－ENZA」，行前少少去到山路既入口，有一間賣行山用品及有關雪猴既精品。呢間小店仲有得租釘鞋及買釘鞋套，因為我著住隻跑鞋，頭先火車站位女職員已經同我講我隻鞋一定勁跣。佢咁幫我地，我更係信晒佢啦！所以我乖乖買左釘鞋套。一套左上隻鞋度，行雪地簡直如履平地，行步路都大步左，自信心都返晒黎！哈！哈！

賣行山用品及精品既小店

行呢段山路去到雪猴既位置，大約 1.6 公里，要行半個鐘左右。沿路個森林雪景靚到極點，加上冇咩風，其實唔太凍，我地不斷行下又停下影相，足足行左一個鐘先入到去。地獄谷野猿公苑入場費 ￥500 一位，我估冇咩人會行左咁耐入黎，而又唔比錢入去睇囉！

沿山路行去地獄谷野猿公苑

沿路都係好高既樹

好靚既雪山路

有間溫泉旅館

山谷景

地獄谷野猿公苑內好多雪猴，全部都唔怕人，佢地會失驚無神係你側邊行過。成個山頭，有一個地方，有成群人圍住係度，就係雪猴浸溫泉既池。池內唔係好多雪猴，聽聞係因為要猴王批准既雪猴先可以浸，所以好多雪猴只係附近走黎走去，冇得浸。係池側邊，聽到最多既說話係「卡娃兒呢！」「卡娃兒呢！」，講真，雪猴浸係熱水，爽爆既樣，又真係好「卡娃兒呢！」

一隻隻雪猴

呢隻玩緊水

呢隻企定定比人影相

溫泉池

好嘆既雪猴

捉蚤

回程冇一邊行一邊影相，真係半個鐘多少少就行番出去。我地去賣釘鞋套既小店，請佢地幫我打電話去叫的士返火車站，返到火車站都已經下午 2:00 。由湯田中揸車上返高速公路，再去不太遠既小布施公路休息站食個拉麵，大約 3:00 正式出發去今晚既目的地草津温泉。

小布施公路休息站

食拉麵

本來去草津温泉，行國道 292 只須一個半鐘就去到。不過因為國道 292 位於連綿既山上，仲會途經海拔 2172 米既日本國道最高點，冬天積雪問題嚴重，所以每年冬天都會封路。我地只好向南，經須坂長野東及上田菅平，轉一個大圈上去草津温泉，路途亦由一個半鐘變為兩個半鐘。

一駛出去就成地雪

好惡劣既路況

於須坂長野東ＩＣ離開上信越自動車道，再沿國道 144 行，呢段路既地面不時都有冰及雪，所以我唔敢開太快，同埋跟前車保持頗遠既距離，以防停唔切車。好彩既係，呢段路比較平坦，我成程保持唔快過 35 公里，慢慢地安全咁行。

其實揸慢車比揸快車仲消耗精神，我隻黃金右腳係個油門度就住就住咁比油，極度唔爽快！當揸左差唔多一個半鐘，我地駛離國道 144，轉去國道 59。成條國道 59  既情況都好惡劣，個地面全部都係冰雪，最嚴峻係呢段係又上山、又落山既路。黎到呢個位，四周都係荒蕪既雪地，冇得放棄，焗住繼續慢慢揸去。每逢轉彎，我都收到十幾公里既速度去過。上斜又唔可以比太大油，試過好似唔夠力，一比大少少油，錶板上面跣軚燈即著，我鬆返少少油，條軚爪番個地先冇事。落斜仲難，又唔可以踩死 break，要人肉 ABS ，一下一下細細力咁比 break，太大力驚會即時跣軚，然後成架車衝落斜。因為要好集中精神去揸車，不斷睇住路面情況既變化去應對，真係驚都冇時間去驚。

行得 30 km/h, 仲要用人肉 APS 落斜

係國道 59 既一條上斜既大斜路，我保持 25 至 30 公里既速度上去，前面輕微轉右，咁我就鬆少少油，等架車慢少少轉彎。轉完彎，我就比少少油出彎，點知比左油架車都唔去，仲越黎越慢，原來跣軚。今次因為上緊斜，比極油，條軚都只係跣住轉，架車完全唔向前。我嘗試慢慢比油，都係跣，比大少少油，亦係跣。點算呀？我開窗揮手示意後面既車行先，等冇咩車時，我留後少少再試，架車都係跣住唔肯行。我嘗試駛出絕招，我比大油，條軚跣住咁自轉，跣軚燈著晒，然後我快速地張軚盤左右扭動，嘗試令車軚咬到少少地。架車開始有少少起色，速度錶 4 公里、5 公里、6 公里咁慢慢提升速度。雖然係跣住軚咁行，起碼架車係慢慢向上行緊。我以呢個方法跣住慢慢上斜，終於去到頂，脫離呢個困境。

就係呢種路跣到上唔到斜

由國道 59 轉去國道  292，又係一條大斜路，架車又上唔到斜，又停左！今次因為地下太多雪，我用絕招都冇用。旁邊有間 7-11，門口有個空地，我留後，打橫架車，諗住打橫左之後，起到步再轉上斜，點知一轉上斜又跣軚，都係上唔到！我試左好幾次都唔成功，開始有放棄既諗頭。其實呢度仲有唔夠 5 公里就去到草津温泉，我諗住再試多一次，唔得就去 7-11 打電話去今晚既酒店求救。呢一試，我比油向前行，一轉上斜，我立即駛出左右軚絕招。喂！今次又得喎，架車冇減速，可以跣住上喎！又成功脫險！

打晒死火燈慢慢上斜

去到草津溫泉，以為目的地在望，點知草津溫泉市內既路仲惡劣，積雪非常嚴重。而加上天都黑晒，我好小心，好小心咁慢慢揸。當 GPS 指示仲有 350 米直路，前面就係今晚住既酒店時，又係一條大斜路，我地架車上左少少就上唔到。我又用絕招，但失敗！呢條路係落左斜先，然後上斜。我嘗試溜後到落斜既地方，然後先衝落斜，跟住用衝力既幫助上斜。我試左四次都唔成功，第五次我狠少少，比大少少油衝落斜，終於成功衝到上斜。但係原來只係上左第一段斜，仲有第二段，我好辛苦上左第一段，冇可能溜後落返去再衝過上黎。我唯有用絕招，但都係唔得。間酒店已經係眼前，我地仲差少少就到啦！我叫其他人落車行去酒店求救。當佢地落晒車，我入個低波，比少少油，架車冇跣喎，仲慢慢爬上斜，我估因為架車輕左。當去到酒店門口，終於因為太斜上唔到，又停左係度。

用落斜既衝力幫助上斜，但失敢

酒店門口既兩位職員走出黎，我同佢講我地訂左今晚係度住，佢叫我駛上斜，前面有停車場。我同佢講我架車冇雪軚，上唔到去啦！佢地個樣非常驚訝！仲用電筒照下我條軚。當佢地見到我真係冇雪軚都黎到，驚訝到個下巴都跌左落地！佢知我上唔到去，咁佢就叫我去後面一個停車位停低架車！終於我地用左超過三個鐘，驚險萬分咁黎到草津溫泉！

呢架車好叻叻，帶我地安全到達目的地，我都忍唔住拍拍佢，讚一句 「你好勁呀, 車車！」

驚險野講完，講返呢間酒店先。我地今晚住係「お宿　木の葉」溫泉旅館，呢間旅館不論係 Tripadvisor 或 Jalan 都非常高評價。整間旅館都舖上榻榻米，一入到去就聞到陣陣草香味。所有住客既鞋都要係旅館門口除低，然後放入門口旁既鞋櫃內。大家可以赤腳係成間旅館四圍走動，好 feel ！我地 chcek-in 完先上房放底行李，然後即刻去位於地下既休息處「旭月」，呢度 6:30 前有免費點心供應，我地 6:30 左右去到，個嬸嬸好好人，整埋比我地食。

第二日朝影既「お宿　木の葉」門口

旅館全都舖上榻榻米

有免費點心

我地住係和式附床既房，大約 21 平方米，唔算太大。房內有廁所，有洗面盤，但冇浴室，我估預左大家都去大浴場沖涼。

我間和式附床房間

我地食完點心，係旅館四圍行下。呢度既大眾溫泉有兩個，古の湯及季の湯，古の湯係比較細既浴場，季の湯係好大既大浴場，仲連接有一個好大既露天風呂。呢兩個湯都會於固定時間男女湯交換，所以兩邊都可以試下。呢間旅館最特別係有三間免費既貸切露天風呂，分別叫「竹座」、「岩室」、「光林」，「岩室」係三個中最好，佢可以望到開揚既雪景。去浸呢三個風呂唔須要預先預約，只要去到貸切露天風呂入口處，會有個燈號顯示每一間風呂有冇人用緊，你見到冇著燈，即係冇人用緊，你就可以去用。係季の湯門口，有個雪櫃，裡面放滿不同味道既雪條，大家可以隨意拎黎食，我地浸完溫泉拎條食，行過又拎條食，好開心！

貸切露天風呂既指示燈

古の湯

季の湯 (酒店網頁照片)

酒店網頁照片

貸切露天風呂「岩室」(酒店網頁照片)

我地 7:30 就去食事處「遊山」食晚餐，晚餐係半自助式。去到我地張枱，上面已經放左我地既前菜、魚生及陶板燒。食完枱面既野，可以出去自已任拎沙律、天婦羅、炸物、漬物、生果及甜品等食物。不過我都係比較鍾意前晚河口湖既傳統日式會席料理。

晚餐

每人一份前菜、魚生及陶板燒

自助拎既食物

食完又四圍行下，休息一陣就走去浸溫泉。我浸完大浴場，仲走左去浸貸切露天風呂。其實大家都唔會係貸切露天風呂浸太耐，所以等一陣就到我啦！我今晚仲試左「竹座」及「岩室」呢兩個貸切露天風呂。

去浸溫泉啦

10:30 我地又走去休息處「旭月」，每晚 10:00 至 11:30，「旭月」都會提供免費拉麵及啤酒。住呢間溫泉旅館，真係食完就浸，浸完又食，食完又浸，浸完又食。真係比佢餵到我地飽飽咁入睡！

宵夜有免費拉麵

仲有啤酒

嘆完世界，臨瞓前都要打算下聽日點揸車走。如果聽日都好似今日既天氣，地面仍然積滿雪，我地揸架車落山會好危險。我上網搵下資料，好似話有得買雪鏈加落條軚度。我走去大堂問下旅館職員，佢立即比左一張幫人安雪鏈公司既單張比我睇，單張上面寫左普通車  ￥7000-￥13000，我拎左張單張返房，再上網研究下。睇睇下，都係瞓啦！有咩聽朝先算啦！