201601 日本関東甲信寒冬遊第一日 - 東京羽田空港

又係香港快運啦！佢又出特價機票，HK$1627 一個人來回東京羽田空港，連稅同行李。不過時間就唔靚，夜晚 18:15 機去，到東京已經係 23:10。回程早上 6:35 ，零晨已經要出機場。因為時間真係好鬼差，買之前要先研究下咁夜去到東京點算，同埋走時，一早點去機場。

又係香港快運

我搵到係羽田空港附近有一間東橫INN，佢有免費接駁巴士由羽田空港去酒店，每 15 分鐘一班，最夜一班係 00:12。第二朝去租車既 Toyota 租車公司離東橫INN又唔係太遠，行 10 分鐘左右就到。

免費接駁巴士

東橫INN

回程要零晨 4:40 去到機場，如果住酒店，3:00 左右就要 check-out 走。又唔知有咩車去到羽田空港。坐的士一定超貴，為左呢張特價機票去坐的士，隨時仲貴過正價靚時間既機票，得不償失！好彩搵到台場大江戶溫泉物語有個套票，¥3300 包入場浸溫泉及專車於零晨 3:50 開去羽田空港，大約 4:20 到達。好明顯，呢個套票係專為我地呢班機而設啦！如果要玩呢個套票，記得最少三日前比個電郵佢去預約左先！

大江戶溫泉物語

解決左呢兩個問題就可以放心比錢買機票啦！跟住要諗下去邊玩。東京留兩日食下野，買下野、長野就去睇雪猴浸溫泉、河口湖睇富士山、松本參觀松本城、草津當然浸溫泉、軽井沢就去 outlet 同睇下風景。短短八日，實際得六日既行程，夠晒充實啦！

租車就照平時一樣同 Toyota 租，今次四個人去，都係同上次一樣租 PRIUS α ，貪佢車尾箱夠大，放四件行李都綽綽有餘。我去 Toyota 網頁預約時，選左要雪軚，佢好快覆我話冇雪軚。我試過搵其他租車公司，只有細車先有雪軚。咁我唯有照租冇雪軚既車，希望到時唔好咁大雪啦！點知就係勁大雪！

就係呢架 Prius α 今次同我地經歷左好多驚險野！

第一日照原定計劃，飛機仲早左少少去到羽田空港。我地過左海關，攞埋行李，然後坐 23:42 分既東橫INN免費接駁巴士去酒店。上左房放低行李後，我地去左酒店附近既 Lawson 買個杯麵返酒店大堂食。一切都係預計之內，好順利！

我地既宵夜

典型好細間房既東橫 INN 

廁所都超細