Joseph@外地遊記: 201604 荷蘭第四日 - 庫勒慕勒美術館 (Kröller-Müller Museum)，烏得勒支 (Utrecht)

本來今日行程係去全世界最大花園庫肯霍夫公園 (Keukenhof )賞花，不過天氣預報話今日天陰，明天會天晴，所以我地又轉一轉行程，今日先去庫勒慕勒美術館 (Kröller-Müller Museum)。一早 9:00 執好行李上車出發，拜拜鹿特丹啦！

本來打算去一間叫 Ten to Three Bakery 既麵包店食早餐，揸車去到門口又唔知點解冇開門。咁唯有即刻上網睇下附近有咩食，我地搵到最近有一間酒吧，朝早有早餐食，個名叫 Eetcafé Noord-west。可能佢真係做開酒吧，預唔到突然有六個人叫野食，而我地又衰既，每個人都叫唔同既野，所以等左半個鐘先有野食。食埋早餐搞到 11:00 先正式出發，比預算遲左好多。

食早餐既酒吧

食早餐

庫勒慕勒美術館位於國家森林公園 (Hoge Veluwe National Park) 內，除左阿姆斯特丹既梵高博物館外，佢係全世界收藏最多梵高作品既地方。另外佢個戶外公園亦係全歐洲最大的雕塑公園。入國家公園及美術館每位€18.3，我地有博物館証就平少少，每位€9.15，泊車就每架車€6.5。

我地先去美術館，入到去直奔梵高展區。上年十月去過法國既聖雷米 (St. Remy)及亞爾 (Arles)，去睇過梵高住過既Maison de santé Saint-Paul 精神病院，同埋去過好多佢作畫既實景，今次係美術館見到佢既真跡，好開心！呢度有佢畫位於亞爾既《星空下的咖啡館》 (Cafe Terrace at Night) 及《梵高橋》 (Van Gogh bridge)，仲有住精神病院時畫既《普羅旺斯夜間的鄉村路》(Country Road in Provence)及《播種者》(The Sower)。睇真跡先可以睇到梵高剛勁有力既筆觸及強烈對比既色彩。

先去博物館

博物館入口前既戶外展品

梵高橋

普羅旺斯夜間的鄉村路

星空下的咖啡館

去到戶外既雕塑公園，因為今日天氣真係幾凍，所以我地都冇行晒。而戶外既雕塑中，最觸目係法國藝術大師尚杜布菲 (Jean Dubuffet) 既大型雕塑品 Jardin d'émail。呢件雕塑除左可以睇，大家仲可以走上去雕塑上。

小湖上既展品

大型雕塑品 Jardin d'émail

仲可以走上去

國家森林公園裡有免費既單車比遊客使用，我地係美術館外既單車停泊區，是但揀一架單車，就踩去公園客戶服務中心旁既餐廳。呢架單車跟平時踩既有少少分別，佢係冇手掣剎車，要用腳踩反方向去剎車。平路都可以控制到，但落斜車速快時，好難用腳去剎車，太細力又剎唔到，太大力又驚突然鎖死條軚，架車會反。有段落斜既彎路，我架車真係失晒控，差少少炒左落塊大石上，好危險！

國家森林公園裡踩單車

今日成個國家公園都唔係太多人，不過入到餐廳，估唔到坐滿晒人。呢間餐廳係學校飯堂方式，自己拎完食物，跟住去收銀處比錢。我只係叫左碗湯，同埋食左件蘋果批。

食午餐既餐廳

好有郊外木屋感覺

蘋果批

森林內既路

食完後，我地踩單車返去美術館既停車場攞返架車，然後係國家公園內遊下車河，大約 4:30 就離開。我地揸左大約一個鐘車，去到今晚係烏得勒支 (Utrecht) 住既酒店 Star Lodge Hotel Utrecht。本來我地有兩間酒店選擇，另一間係 Holiday Inn Express，價錢仲平少少，不過我地想試下唔係集團式既酒店，所以選左 Star Lodge Hotel。入到酒店大堂，木屋原始設計，加上大量使用玻璃既摩登設計，兩者融合一起，好特別，而大堂一旁既梳化位仲有個摩登真火爐。入到房，水泥簡約牆身，玻璃開放式淋浴間，真係開放到門都冇。但係最大問題係冇雪櫃，冇電水煲，冇杯飲水。我地走去大堂櫃檯問下有冇水，佢話可以去大堂既自助水吧，用開門既門卡記賬買咖啡、茶或啤酒。我好驚訝，熱水都要比錢買？後來櫃檯話可以借電熱水壺比我地！咁都冇咁嬲！我好掛住之前幾晚住既 Novotel，房又大，有衣櫃，有雪櫃，有梳化，有藍芽喇叭仔，又有免費樽裝水送，價錢仲要平過呢間酒店。本來諗住呢間酒店比較貴，會比較好，而家仲差左，好失望！

Star Lodge Hotel

大堂食早餐既地方

中間仲有個火爐

我地間房

由酒店去烏得勒支市中心要半個鐘車程，我地 7:00 去到烏得勒支火車站既停車場泊好車，然後行去烏得勒支市中心。我覺得烏得勒支係一個非常特別既古城，古城區位於運河一帶，四周沒有汽車行走。而運河既碼頭低於地面，碼頭邊以前既洞穴式倉庫，而家改建成特色餐廳及酒吧。運河兩旁既古城建築物開滿不同商店，好似真實版既威尼斯人酒店商場。

烏得勒支市中心

烏得勒支既運河

主教塔 (Domtoren) 係荷蘭最高既鐘塔

運河

唔知點解今日市內好大風，天氣凍本來問題不大，不過天氣凍加上大風就真係好攞命。我地係運河影左幾張相，跟住落去運河碼頭旁一間叫 American Steakhouse Broadway 既扒房食晚餐，呢間係我係 Tripadvisor 網站搵出黎既餐廳，佢係烏得勒支市內四百多間餐廳中排行第三，都好鬼勁呀！頭先都有提過，餐廳由本來係洞穴式倉庫改建，入到去成間餐廳都係半圓既拱型洞穴內，好型格！

American Steakhouse Broadway 內

叫得扒房，梗係有不同既扒比你楝，有西冷、牛柳、牛臀肉扒、T骨扒及肉眼，佢餐牌上 T骨扒稱為 "Broadway's 2nd biggest star! " 係全店第二最好既。我問佢最好係咩，原來係一個兩人份量，900 克重既烤大肉眼扒。我叫左呢個第一位肉眼扒，呢塊扒真係超大塊，佢用一塊大木板上，睇見個賣相已經好吸引。切開塊肉，真係燒到五成，外脆內軟，肉汁豐富，入口好香烤肉味，內層又好嫩滑，果然係招牌菜。另外叫既西冷同牛柳都係超水準，黎到烏得勒支，American Steakhouse Broadway 真係一間唔可以錯過既餐廳。