201604 荷蘭第八日 - 阿姆斯特丹 (Amsterdam)

今日係阿姆斯特丹一日遊，一早係酒店食完早餐，就揸架車去 Zeeburg 泊車轉乘 (P+R: Park and Ride) 停車場，然後轉 26 號電車入市中心。我地先去喜力體驗館 (Heineken Experience) 參觀，入場費 €16 一個人。

喜力體驗館

喜力體驗館門口

喜力體驗館原為有百年歷史既喜力啤酒廠，1988 時改為觀光為主既喜力體驗館。平時參觀啤酒廠都係睇下釀酒過程，品下酒，但喜力身為啤酒業界既表表者，佢既體驗館更係多野玩好多。裡面有不同互動設施，你可以拍合成照或一段 MV，然後電郵比自己，你又可以製作一支有你名字既啤酒。品酒更可選兩杯生啤或一杯冰點啤酒。係賣精品既商店仲可以買隻啤酒杯，並即時刻上名。

裡面有喜力既博物館

專人講解釀啤酒

釀啤酒既大缸

先有一細杯，教你點飲啤酒

再有大杯冰極啤酒

仲有喜力精品店

有我名既一支喜力啤酒

係喜力體驗館內玩左兩個半鐘，唔好似為完啦！係離開時，入口有職員會派遊船河既票，係免費架！我地拎左船河票，見有少少時間，就係附近小食車買隻熱狗食。我地 2:00 上船，然後開始遊覽阿姆斯特丹既運河。成個船河大約半個鐘，我地係另一個地方，近 Waterlooplein 站附近上岸，上岸後跟職員行去附近既喜力精品店，又可以用之前上船派既 Coupon 免費領取一隻小小既啤酒杯。

午餐幫襯快餐車

熱狗午餐

喜力既船

黎阿姆斯特丹，我最想去梵高博物館 (Van Gogh Museum) 欣賞梵高既真跡。其他無興趣去既人就去行下街，然後 5:30 左右係著名既 " I Amsterdam" 標誌會合。我由落船既地方慢慢行去梵高博物館方向，先經過很多運河，再見到有好多大麻咖啡廳。我地去梵高博物館會經過阿姆斯特丹國家博物館 (Rijksmuseum)，係博物館旁有個好靚既花園，好多人坐左係度嘆下午茶，一陣如果有時間，我一定要黎坐下！

有另一個 I amsterdam 牌

沿路運河既風景

沿路運河既風景

沿路運河既風景

阿姆斯特丹國家博物館旁既花園

穿過左博物館就會見到著名既 " I Amsterdam" 標誌，標誌前面就係梵高博物館。梵高博物館入場費€ 17，我地用博物館証就免費入場。梵高博物館係全世界座擁最多梵高作品既地方。博物館展區有四層，地下有梵高著名既自畫像，一樓有 1883-1889 年既作品，二樓介紹梵高家人朋友及其工作，三樓就有 1889-1890 年既作品。係眾多作品中，一定要留意梵高晚期，係南法 Arles 作既畫，例如《太陽花 》(Sunflowers)、《睡房》 (Bedroom)及《播種者》 (Sower)等名作。前幾日係庫勒慕勒美術館 (Kröller-Müller Museum)見到梵高既《星空下的咖啡館》 (Cafe Terrace at Night) 及《梵高橋》 (Van Gogh bridge) 已經好開心。今日見到咁多佢既真跡，真係好滾動！

" I Amsterdam" 標誌

" I Amsterdam" 標誌

梵高博物館前有好大片草地

梵高博物館

梵高博物館內唔可以影相，只係呢個位比影

超滿足咁睇完梵高博物館，跟住就走去頭先經過既花園，搵左個位，然後買左塊荷蘭餅乾 Stroopwafel 食。呢塊餅係荷蘭既傳統點心，脆餅中間夾住焦糖，焦糖有淡淡既肉桂香。食呢塊餅係有技巧既，首先要準備一杯熱茶或咖啡，然後將塊餅蓋著杯熱茶或咖啡。等熱氣輕輕將餅乾中既焦糖融化，然後再配杯熱茶或咖啡一齊食。入口中間軟軟既焦糖，非常好味，然後再呷一口茶或咖啡去中和甜味，真係比齋食塊餅好好多。

花園下午茶

荷蘭餅乾

嘆完茶，大家會合返，然後坐電車去 Bloemenmarket 鮮花市場附近，沿 Kalverstraat 商店街行去 Dam 水壩廣場，跟住再行下 de Bijenkorf 百貨公司，大約 8:00 就去食晚飯。

Kalverstraat 商店街

今晚本來想去食一間地道既荷蘭菜，去到滿座，冇得食。跟住我地去返禽晚 CAU 附近，入左去一間叫 Mas Y Mas 既阿根廷餐廳。餐廳氣氛好隨和，有個講西班牙話既職員非常熱情，又同我地講笑，又不斷叫我地 Amigo，好好笑！今次我兩個人叫左個烤肉拼盤，一大籃，又有香腸，又有牛扒，又有雞扒，又有粟米，好大堆頭製作。味道就再稍為比不上昨晚既質數，但呢間餐廳個氣氛就勝在比較輕鬆。

Mas Y Mas 阿根廷餐廳

好大盆肉