我地一早上網預約左 12:00 去到春川玩鐵路自行車 (RailPark)，預左少少塞車，所以本來一小時十五分鐘既車程，我比夠兩個鐘時間，10:00 出發。出發前講講今朝既早餐，禽日因為太早，所以旅館主人未買得切早餐放係度。今日佢知我地早出門口，所以已經準備左一包白麵包及杯麵。我本來諗住沖杯茶，白麵包搽果醬就算。但見到個廚房，忍唔住開左罐午餐肉黎煎，煎開左個頭，又忍唔住煎埋蛋黎整餐蛋治。
 |
| 整早餐 |
我地食完後，洗返乾淨所有野，跟住準時 10:00 出發。開頭係首爾市雖然多車，但都算暢順。一離開左首爾市就開始塞車，心諗唔係好似禽日咁又炒車呀？慢車咁行左都唔知幾耐，終於去到塞車既原頭，原來大家塞咁耐車就係為左入去一個大型高速公路休息站。我頂你咩！你地揸到攰就入去休息，你地要入去休息就搞到塞車，因為塞車所以個個都揸到攰，跟本係一個惡性循環。如果唔入去，唔塞車，未唔攰囉，大家未可以快快到達目的地囉！
 |
| 塞車 |
我地揸左兩個半鐘，12:30 先去到位於金裕貞既鐵路自行車 RailPark，比預訂時間 12:00 遲左。我地同職員講，好彩佢安排到 1:00 比我地玩。鐵路自行車呢個概念真係好好，將冇用既火車路軌轉型為另一個吸引遊客既景點，既環保又有創意。遊客可以好似踩單車咁自己操控速度，沿途欣賞風景。由金裕貞去江村，我地先踩三分二路程，大約需要一個鐘。因為成條路只係平路及落斜，所以幾輕鬆。去到目的地，落左車就轉另一架火車去江村，到達江村再轉旅遊巴士返去金裕貞。
 |
| 鐵路自行車 RailPark |
 |
| 坐火車 |
玩完鐵路自行車都已經下午 3:00，我地跟住揸車去左春川市食午餐。春川最出名就係春川辣雞，係春川有一條春川辣雞街，街上有很多春川辣雞既餐廳，當中最著名既係明洞一號店 (명동1번지닭갈비 )。雖然我地去到係下午 3:30，已經過晒午飯時間，但明洞一號店內仍然好多人，仲不斷有客人入去食，好似真係好堅咁喎。
 |
| 春川辣雞街 |
 |
| 春川辣雞街 |
 |
| 右手邊就係明洞一號店 |
入到去坐底左，唔駛點菜，職員已自動自覺開爐，我同佢只係講左唔好太辣。等左三分鐘都冇，就一大盤春川辣雞送到面前，並全倒入鍋中，效率非常高。大約煮左十五分鐘左右就可以食啦。春川辣雞小小辣，入口十分惹味，雞肉又唔會太鞋，幾好食。當食到七七八八，我地叫左個飯，撈入去個辣雞內炒，變左春川辣雞炒飯，不過比較濕，炒乾身會好好食。
 |
| 好大盤 |
 |
| 煮熟左 |
 |
| 炒飯 |
春川市內有條商店街，叫春川明洞。因為係正春川辣雞街旁，我地順便行左一陣。
 |
| 春川明洞 |
春川市有個景點叫衣岩湖天空步道 (소양강 스카이워크) ，係一條伸出去湖上既玻璃橋。因為時間關係，我地只係去影左張杷，跟住就揸車返去首爾。
Hertz 8:00 關門，我地 6:00 係春川開車，好彩塞車唔太嚴重，剛剛好 7:55 返到去東大門還車。
晚餐我地去左網上曾經好紅既小店食九層海鮮塔，店名叫 무한조개구이까까。我地由東大門去奉天站，都幾遠架。去到見到間小店比較簡陋，又冇咩人，好似唔對路喎。但長途拔涉來到，就咁走又浪費左個車程既時間，所以我地照入去食。我地叫左個都算頂級既海鮮塔，黎到真係好壯觀架。影完相開始食，海鮮好一般，有幾種仲食得出唔新鮮。底層既海鮮因為蒸得太耐，老晒，唔好食。食完我地全都好失望，真係寧願再去食燒五層肉好過。
 |
| 九層海鮮塔 |
我地又長途拔涉坐車返去東大門，要補償返頭先食左唔好食既野，我地又去返禽既既甜品店食甜品。今次食左個原隻蜜瓜冰，隻蜜瓜又甜又多汁，非常好食。總算安撫返唔好食既九層海鮮塔。
 |
| 原隻蜜瓜冰 |
 |
| 蜜瓜冰內有乳酪冰 |
夜晚又係女士 Shopping，男士回旅館休息既時候。我又獨自一人係東大門慢慢地行返去啦！
No comments:
Post a Comment