201803 冬遊瑞典丹麥第一日 - 哥本哈根 (Copenhagen)

首先我地會坐瑞士航空去蘇黎世，再轉機去哥本哈根，中間轉機時間得一小時。不過我之前幾次坐漢莎都係得一至兩個鐘時間轉機，係冇問題既！所以我都好輕鬆但又急急腳咁去轉機。

去到哥本哈根已經係第二日既早上 9:00 左右。因為我地仲有兩位團友坐另一班機，要下午 1:30 先到，所以我地先去酒店放行李，然後出市區行下先。我地只係哥本哈根住一晚，聽日一早又坐飛機飛去瑞典北面既 Kiruna，所以搵左一間機場附近既酒店，由機場坐一個站火車，大約三分鐘去到 Tårnby 站，一出站行過馬路就到既 Copenhagen GO Hotel。

哥本哈根機場

先講下點係哥本哈根搭車，哥本哈根既鐵路好完善，有火車及地鐵。我地買左一張 DKK80 既 Copenhagen City Pass，可以 24 小時內任坐火車、地鐵及巴士。不過係機場買呢張 Pass 時就有阻滯，要買 Pass 一定要用自動售票機，而部機只收信用卡。不過係歐洲用自動售票機，好多時都要你入 PIN (密碼)，我之前試過係荷蘭，好多銀行既信用卡都唔得，我今次都試左三張先得。後來我返香港打去銀行問，匯X同東X 銀行係唔得既，而我今次係用渣X 銀行既卡先買到。

唔易買既兩張火車飛

我地去到 Copenhagen GO Hotel，酒店好好咁即時比房我地。房間唔太大，好簡單咁得張床，一張檯，一張櫈。其實真係麻麻地，不過我地只係住一晚，聽日未天光就要返機場，所以平平地住近機場，冇咩要求。

由酒店坐 15 分鐘火車，我地就去到市中心既 Norreport 火車站。Norreport 火車站旁邊有個叫 Torvehallerne 既市場，市場由兩間玻璃屋及戶外地方組成，好似我地既街市加熟食中心，不過呢度就乾淨同靚好多。係玻璃屋內，我地要圍行下，睇下有咩食，我地係兩個檔口分別買左一份 Smørrebrød 及一份 Fish & Chips。Smørrebrød 可以叫做開口三文治，係丹麥既典型午餐，一份份唔同顏色既 Smørrebrød 放係玻璃櫃內，見到已經好吸引，好想食。Fish & Chips 既檔口，即叫即炸，我地完全比佢既香味吸引左去買。呢度有唔同種類既美食，地方又光鮮，真係午餐既好地方！

Torvehallerne 市場

Fish & Chips

Smørrebrød 開口三文治

食左野，加上時差，開始眼瞓。我地因為仲要搵有 Free Wifi 既地方搞上網 Simcard 既野，所以走左去市場對面既 Espresso House 咖啡店坐底，順便飲下野，提下神。

我地先坐火車返酒店會合另外兩個團友，跟住又出返去市區既哥本哈根火車總站 (Kobenhavn H)，買一張叫 Copenhagen Card 既卡。我地一星期後，去完瑞典返黎丹麥就會用呢張卡。張卡可以免費乘坐哥本哈根區域既交通工具，以及可以免費入去 86 個景點及博物館，就算係 Hillerød 既 Frederiksborg Castle ，以及 Helsingør 既 Kronborg 佢都包，所以好抵用。我地買左 72 小時既 Copenhagen Card，一個人 DDK659。

哥本哈根火車總站

哥本哈根最旺既地方就係市政廳廣場 (Radhuspladsen) 一帶，由市政廳廣場可以行入去 Strøget 呢條商店街，而 Strøget 係歐洲其中一條最長既商店街。但係我地去到Strøget 時，已經五點幾，大部份店舖都開始關門。

Strøget 商店街

市政廳廣場

Tivoli 遊樂場

晚餐我地打算去一間係 Tripadvisor 好高分既餐廳，叫 Olive Kitchen & Bar。我地行到去，點知冇預訂，所以冇位。我見間餐廳環境幾好，又真係全場爆滿，應該真係好得。咁我就即時訂定十二日後，我地返黎哥本哈根時食晚餐。

我地係條街行來行去搵野食，係趣伏裡公園 (Tivoli) 旁有間牛扒屋叫 A Hereford Beefstouw，佢門口有塊 Banner ，上面寫住 Sunday Roast，一塊 1 公斤既西冷牛扒，跟埋配菜，只係 DKK595。我地被佢咁吸引既價錢吸左入去。呢塊一公斤牛扒夠晒我地四個人食，不過塊牛扒整得比較乾，冇咩肉汁，味道真係好一般。可能真係一分錢一分貨！