Joseph@外地遊記: 201803 冬遊瑞典丹麥第六日

2018/03/30

201803 冬遊瑞典丹麥第六日 - 斯德哥爾摩 (Stockholm)

早上先係酒店食早餐，然後跟酒店櫃台職員買左張 Stockholm 72 hours Travelcards，有在呢張卡就可以 72 小時內係斯德哥爾摩任坐地鐵、火車、電車及巴士，價錢係每張 SEK250。

黎到斯德哥爾摩，好多人都會地參觀地鐵站，因為好多地鐵站都裝置了不少藝術家既藝術品。我地由酒店坐 22 號電車去到 Gullmarsplan 站，再轉綠色線地鐵去 T-Centralen，再轉 T11 線去 Kungstradgarden 車站。Kungstradgarden 車站就係其中一個大好多藝術品及裝飾既地鐵站。

斯德哥爾摩另一個重點觀光點，就係位於動物園島 (Djurgarden) 既瓦薩沉船博物館 (Vasamuseet)，由 Kungstradgarden 坐 7 號電車就可去到。瓦薩沉船博物館入場費係 SEK130。博物館展出 1628 年沉沒既瓦薩號戰艦，當年瑞典國王為左展示軍力，花左大量人力物力及時間，建造出呢艘大型戰艦，戰艦上有非常多炮台及寶物，船身既雕像色彩奪目，整隻戰艦可以話係極盡奢華。不過係 1628 年首航時，因為設計問題，離岸唔夠千五米，比風一吹，就吹反左隻船，仲沉左落三十幾米既海底。因為當時既技術，冇可能打撈返隻船上黎。直到三百幾年後既 1961 年，瑞典政府先成功令瓦薩號戰艦重見天日。之後經過不少專業人士努力復修，而家先可以係博物館比大家參觀。

瓦薩沉船博物館

瓦薩號戰艦

戰艦尾既雕塑

戰艦上既大炮

戰艦模型還原船尾既色彩

戰艦側


戰艦既甲板

係瓦薩沉船博物館附近有一個斯堪森露天博物館 (Skansen)，呢個係一個戶外民俗博物館。博物館展出瑞典昔日既生活及建築，另外仲有一個動物園，可以睇到北歐獨左既麋鹿及馴鹿，入場費每人 SEK125。

斯堪森露天博物館

麋鹿

馴鹿

博物館內就好似一個個不同既舊村落，村落有郵局、製玻璃、印刷排版、織布等小店。好多戲子穿著以往瑞典人既衣服，係小店內示範當時既工作。要食野，可以去舊式既麵包店、咖啡室，或者可以去市集買下野、食下野。因為斯堪森露天博物館真係好大，我地花左三個鐘，都只係快快咁行左七成既地方！

以前既麵包店

買麵包食

有人示範以前點整書

市集

買左呢個即刻燒既餅食

位於舊城區 (Gamla Stan) 既諾貝爾博物館 (Nobel Museum) 係展出諾貝爾獎得主既資料及表揚佢地既成就，裡面既展品多數以文字及物品來介紹。其實我地冇可能知道及認識咁多年黎不同範疇既諾貝爾獎得主，所以都唔會續個續個得獎者既資料好仔細咁去睇。所以入到去好快咁走一圈，睇幾個既介紹就走。諾貝爾博物館入場費係 SEK120，不過由九月至五月，每個星期五既下午 5:00 至 8:00 係免費入場。今日就係星期五，而我就夾啱 5:00 後先黎，咁就慳返 SEK120。

諾貝爾博物館

舊城區最旺既地方就係 Västerlånggatan 商店街，我地今晚既晚餐就係呢度搵左一間叫 Corner Bar Restaurant ，呢間餐廳有一種瑞典傳統食物叫 Plankstek，可以選擇牛扒、雞扒或三文魚扒。將主菜放係木板上，旁邊圍左靚靚既薯蓉，再放上少少蔬菜。價錢 SEK169，味道又唔差，係瑞典算係好抵食既一餐。