Joseph@外地遊記: 201803 冬遊瑞典丹麥第二日 - 基律納(Kiruna)，阿比斯庫 (Abisko)

天未光就係酒店去機場，我地坐 7:00 既飛機，先飛去瑞典既斯德哥爾摩，跟住轉機去基律納 (Kiruna)。因為我地坐廉航內陸機，機上冇野食。上機前，我地就係機場既 Lagkagehuset 麵包店買左丹麥酥食。Lagkagehuset 係丹麥一間好出名既連鎖麵包店，你係丹麥時常都可以見到佢，真係總有一間係左近。咁佢既麵包又真係好好食，我地之後返黎丹麥都仲有幫襯佢幾次。

早上既哥本哈根機場

Lagkagehuset 麵包店

中午 12:30 左右，終於到達北極圈內既基律納，四周圍都冰天雪地。落機時，我地仲未穿著重裝備既禦寒衣物，但因為有太陽，又冇咩風，所以仲頂得到。基律納機場係超細既機場，落機要自己行入去機場大樓，而大樓真係一眼見晒，連餐廳都冇間。

我一早上網預訂左一架 Volkswagen Passat Varient 自動波車，攞車時，佢比左條 Volkswagen 車匙我，係一架 Golf Varient，我當時冇為意唔係 Passat，咁照出去停車場上行李。但一上車入波開車時，點解棍波車黎既？棍波車我識揸，但雪地棍波車，為大家安全計，我都係冇咩信心。咁我入返去同租車公司個職員講，佢問我可唔可以揸棍波，我照同佢講為安全，我唔想囉！之後佢搵到一架 SKODA Superb 自動波車比我，要加錢 Upgrade。咁呢架車又真係 Superb，四驅行政房車，好舒適，仲有大屏幕既 GPS 導航，司機及三位乘客都好滿意。

SKODA Superb

我地首先揸車去基律納市區一個商場，然後用佢門口既提款機提左 SEK2000 蚊 (我之前都講過，係瑞典同丹麥真係唔需要用現金)。午餐我地去左一間叫 Annis Grill 既餐廳，間餐廳好美式風格，佢專賣漢堡及肉丸，即叫即整。

基律納市內

Annis Grill 餐廳

我地今晚會住係阿比斯庫 (Abisko)，之前聽聞阿比斯庫冇咩野食，所以我地打算自己煮晚餐。但我地又聽聞阿比斯庫既超級市場冇咩野賣，同好貴，所以我地先係基律納市內既 Coop 超級市場買定今晚晚餐同聽日早餐既食材。後來去到阿比斯庫，原來佢都有一間好大既超級市場，價錢都係差唔多。

由基律納去阿比斯庫車程一個半小時左右，沿途道路既狀態都非常好，有摌雪車不停摌走路上既雪，仲有撒鹽防止路面結冰。全程我都用合法既最高速 (100km/h) 行駛，安全地一個半小時到達阿比斯庫。

由基律納去阿比斯庫

阿比斯庫係一個小村莊，人口得幾十人，屋都唔知有冇二十間。我地預訂左 Abisko Fjällturer AB 旅館，呢間旅館有兩類房間，如果要便宜既，可以租佢地既床位，廁所及浴室就公用既。我地就訂左雙人房，有獨立廁所，但浴室都係公用既。旅館既浴室好開放，分男及女浴室，一入去就有張長椅比你放野，跟住直望有兩格淋浴既水喉，冇門冇浴簾，又係跌番梘唔好彎腰執果隻。當有人出入開門時，門外既人係睇到你沖涼架。不過我地雙人房係位於另一座建築物，住床位既人係唔會黎我地浴室，所以住兩晚，兩晚我都係一個人獨享成個浴室，好安全，跌番梘都唔怕執！

Abisko Fjällturer AB 旅館

共用廚房

Checkin 時個哥仔同我講床位果邊既建築有桑拿房，每晚指定時間開放，男女一齊，Nake 既！我好平淡咁答佢 OK！我估佢因為同我講 Nake ，而我地又唔係好驚訝既樣，佢又重覆講一次！而我都係好平淡咁重覆答佢 OK！我咁平淡係因為我一早上網睇過，知道佢又個男女全裸桑拿，旅館既伯伯會入去桑拿帶大家走出雪地裸跑。我地一行人因為覺得夜晚既時間去追極光好過去裸跑，所以都冇諗過去桑拿。

我地既房係二樓，房內有一張碌架床，有個小小廁所，同一個小小洗手盆。地方都夠大去開兩個喼。公眾廚房亦都係二樓，我地今晚就係度煮野食啦！

係零下十度左右既天氣下，我既預寒衣物要出場啦。上身由內層開始有 UNIQUO Heat Tech 內衣，一件衛衣，一件薄羽絨外套再加件 Columbia 防風防水外套。下身就一條 UNIQUO Heat Tech 長貼身褲加一條雪褲。鞋就一對羊毛厚襪加一對高筒防水雪鞋。手就一對防水雪手套。頸就有 fleece 頸套。頭就用返 Columbia 外套頂帽。入去室內有暖氣既地方就除左件 Columbia 及薄羽絨，呢幾日咁既裝備已經好夠暖，我帶左黎既手及腳暖包都冇用過。

我地襯天未黑，揸架車去湖邊，探定路。去到湖邊，個湖好大，湖面結晒冰，有人仲揸左架雪地電單車去到好遠既湖中心。我地係湖面撥開上面既雪，真係可以見到透明既冰面。

企係結左冰既湖上

見到湖面

我地返到旅館，換返輕便既服裝，跟住就去廚房準備晚餐，我地既晚餐係瑞典肉丸長通粉，又快又易整！

阿比斯庫超級市場

我既 iPhone 一早 download 左個極光指數預測 App，佢預測今晚 9:00 - 11:00 左右既指數係去到 4 KP。所以我地今晚大約 9:30，就出動去湖邊追極光。湖邊有幾家民居，所以有光源，唔算太黑。我地去到時，都有六七個人係度等緊。好好彩，我地等左幾分鐘，極光 show 就開始上演。一開始淡淡既極光，漫漫地越來越光及不斷改變形態。我地大家都超興奮，第一次去睇極光，第一日就睇到，非常開心。大約上映左 45 分鐘，極光 show 終於落幕，我睇一睇個極光指數預測 App，佢既指數已降到 4KP 以下，所以我地都返去旅館啦。