今早會先去舊城區既斯德哥爾摩王宮 (Stockholms slott) 參觀，跟住睇埋 12:00 既衛兵交接儀式，所以我地 9:30 就出發。斯德哥爾摩王宮係瑞典國王既官邸以及舉辦皇室接待活動既地方，內有超過 600 間房間，分佈於七個樓層，係歐洲規模最大既王宮之一。王宮既入場費係 SEK160，景點有王宮城堡、藏寶閣、三皇冠博物館、古物博物館及皇家教堂。
我地 10:30 開始參觀王宮，行左一個半鐘，只係夠時間睇左王宮城堡。12:00 就出返去王宮外既廣場睇衛兵交接儀式。個衛兵交接儀式跟其他國家既分別不大，但去到最後，奏樂隊會留底表演輕鬆既樂曲，與民同樂，係其他地方既衛兵交接儀式我未見過有呢個咁特別既表演。
斯德哥爾摩既市政廳 (City Hall) 係諾貝爾獎頒獎典禮及宴會的舉行地點。要入去參觀，一定要參加導賞團，由認可導賞員帶我地入去，入場費係 SEK90，大約需時 45 分鐘。行程第一個地方係 Blue Hall，Blue Hall 就係諾貝爾得獎者及賓客享用晚宴既會場。係 Blue Hall 有一條大樓梯，各得獎者就係由呢條樓梯慢慢步下到晚宴會場。
 |
| 斯德哥爾摩市政廳 |
 |
| Blue Hall |
上左二樓，可以參觀市政廳議政既議會大廳 (Council Chamber)，每個星期三瑞典既 101 位議員都會係呢度開會。
 |
| 議會大廳 (Council Chamber) |
跟住就會去到諾貝爾獎頒獎典禮跳舞慶祝既 Golden Hall，成個 Golden Hall 都由金箔馬賽克砌成。可以幻想一下，係諾貝爾獎宴會時，各得獎者及賓客係閃爍燦爛既燈光下，大家一齊係呢度起舞，真係好夢幻。
 |
| Golden Hall |
今日既午餐，我地去左位於Hötorgshallen市場地下既 Kajsas Fisk 海鮮店。呢間店係網上好多推介，因為價廉物美。而大家最推薦既係佢既鮮魚湯，每客 SEK120。魚湯用料豐富，有蝦有魚，飲完仲可以免費添飲一碗。如果只係飲湯就當然未必飽，佢既殺手鐧係麵包同沙律任食，所以一定可以食到飽飽！
我地今日要去既景點都去晒，剩低既時間就係 Drottninggatan 既一帶既商店區行下。講開又講，係瑞典七日，竟然未見過宜家傢俬，為左打張卡，我地係 Google Map 搵左附近既宜家傢俬，係門口影左張相。
行完商店區，我地坐地鐵返去舊城區 (Gamla Stan) 行下，係舊城區地鐵站對面有一間叫 The Flying Elk 既餐廳，佢門口有張米芝蓮星星餐廳既貼紙，仲要係三星喎。好！我地行完舊城區就黎呢度食晚餐。我地去舊城區主要係要搵一塊之前見過既口水肩比我個姪女，好彩呢度既舖頭都開得夜，我都買到呢塊口水肩。
 |
| 舊城區 |
 |
| 舊城區 |
我地走返去 The Flying Elk ，佢問我地有冇訂位，我答冇，佢話今晚滿左，有少少失望。跟住個職員同我講可以去旁邊一間叫 Gaston 既餐廳，都係佢地既，係同一個廚房，野食都差唔多，但比較 Causal 。
去到 Gaston，間餐廳唔大，只可容納二十人左右，佢既檯好細，似 pub 多過餐廳。我地坐係門口旁既檯，雖然張檯好細，但真係輕鬆好多，冇 Fine Dining 既嚴肅。我地叫左個煙挪威三文魚、帶子及鴨胸，個三文魚好好食，油份高又肉質柔軟，與數比係超級市場買既高好多。最驚喜係個鴨胸，佢個皮做到我地港式既香脆味，係西餐好少有既惹味。我地兩個人食物連兩杯酒，價錢係 SEK950，以米芝蓮三星既廚黎講，好平囉！
No comments:
Post a Comment