今日我地會離開瑞典，返去丹麥，目的地係奧登斯 (Odense)。由斯德哥爾摩去奧登斯，我有考慮過揸車、坐飛機或者坐火車。首先由斯德哥爾摩揸車去太遠，唔可行。飛機就冇直接去到奧登斯，只可以飛去哥本哈根再轉車。火車亦都係要先坐到去哥本哈根再轉。考慮左價錢同時間，我決定坐火車去哥本哈根機場，再係哥本哈根機場租車自己揸去奧登斯。
 |
| 坐車去斯德哥爾摩火車站 |
由斯德哥爾摩去哥本哈根既火車，本來四個多小時就到。但因為剛剛有鐵道維修工程，所以所有快車都取消晒，我地只可選擇坐七個小時既 Snälltåget火車。為左比較舒適，我地買左頭等位坐，價錢係 SEK 318 一個人。
 |
| Snälltåget 火車 |
早上 7:15 出門口，先坐電車 22 號，再轉地鐵 17 號，大約 7:50 去到中央火車站 (T-Centralen)。我地班火車 8:30 開車，所以我地仲有時間係火車站買早餐上車食。
 |
| 德哥爾摩火車站 |
 |
| 買早餐 |
今日其實可以算係七日行程後既一個休息日，大家係架火車食下野，瞓下覺，玩下電話。大約下午 3:00 就到達瑞典邊境既 Malmo 站。跟住我地再轉坐 20 分鐘火車，經過連接兩個國家既松德海峽大橋 (Øresundsbron) 抵達哥本哈根機場。
 |
| 頭等位 |
 |
| 餐卡 |
 |
| 沿途景色 |
 |
| 瑞典邊境既馬爾默 (Malmö) 火車站 |
係機場既 Lagkagehuset 麵包店食左個包，跟住就去租車公司攞車。今次係租左架 Opel Insigna 旅行車，但租車公司升級左架 BMW X1 比我。我地有四個大行李，要放入去架 X1 既車尾係有少少難度。後來發現係尾箱底有個暗格，打開左個暗格就可以放晒四個大行李。
 |
| Lagkagehuset 麵包 |
 |
| 四個大行李 |
由哥本哈根揸車去奧登斯，大約兩個鐘。途中要經過連接丹麥西蘭島和菲英島既大貝爾特橋 (Storebælt)，過一次要 DKK245，差唔多 HK$300，勁貴。我地同租車公司買定橋費，去到收費站用條碼一掃就可以啦。
 |
| 大貝爾特橋 (Storebælt) |
去到奧登斯已經晚上 6:45 左右，我地租左一個兩房服務式住宅住三晚。呢間屋係市中心旁既一個小山丘，係一個全住宅既小社區，好寧靜，返去市中心都只係幾分鐘車。我地住呢間屋有四層，我地住最頂三及四樓，因為冇電梯，所以要自己拎行李上去，而個屋主都會幫手拎既。呢間屋既裝修好有簡約既北歐風，一入去已經好舒適。因為我地係屋既斜頂內，所有牆身都係斜既，對我地住開正正方方屋既人黎講，好新鮮！
大約 8:00 ，我地揸車返去市中心搵野食。係市中心有好多街邊泊車位，唔算難搵位，而夜晚時段唔駛比錢。我地泊好車，係市中心內走左入去一間叫 La Melisa Italiensk Restaurant & Steakhouse 既意大利餐廳，餐廳有五個套餐，包頭盤、主菜及沙律吧，佢既主菜主要係牛扒，而頭盤就有三文魚、蝦等可選擇，價錢由 DDK169 至 DDK299。當食物黎既時候，真係有驚喜，份量夠，賣相及味道都唔差，以呢個價錢，好滿意啦！
 |
| 奧登斯 |
No comments:
Post a Comment