201804 冬遊瑞典丹麥第十五日 - 哥本哈根 (Copenhagen)，慕尼黑 (Munich)

今日我地坐 12:55 早機離開丹麥，旅程最後既早餐，我去左食我覺得最有丹麥特色 Lagkagehuset 麵包店丹麥酥，當係留返個美好既早餐回憶。

由酒店坐火車去到機場，準時上機先飛去慕尼黑。係慕尼黑我有八個鐘時間轉機，所以我決定出市區下行及食飯。我地坐火車去到 Marienplatz (瑪利亞廣場)，我地買左一款叫 Airport-City-Day-Ticket 團體票，Euro 24.3 包五個成人即日來回機場及市中心，並可於市中心任坐火車。如果買單人既 Airport-City-Day-Ticket，要 Euro13。所以兩個人已經係團體票比較抵。

Marienplatz (瑪利亞廣場)

我地係 Viktualien Markt (穀物市場) 見到有 Beer Garden，有德國豬手、香腸及啤酒。但係佢只收現金，係丹麥及瑞典可以無現金交易，但德國竟然唔可以。咁我就走返去瑪利亞廣場既銀行，搵部櫃員機提取少少歐羅。係 Beer Garden 食德國豬手、香腸及啤酒感覺好正，啤酒都特別好飲。

下午 5:00 左右，好多店舖都開始關門。所以我地都坐火車返機場，係機場下行，買下野。跟住我地就坐 22:30 飛機返香港。返到香港機場，等拎行李，等左好耐好耐，我其中一個行李竟然唔見左。後來搞左好多日，終於係 4 月 17 日先送返去我屋企。原來行李係寄運途中個標籤唔見左，所以我個行李停左係慕尼黑機場。後來我 email 行李個樣比航空公司，跟住佢搵到我件行李，我比埋行李個密碼佢，佢開到證明到係我既，先可以送黎比我。

機場商店