201810 日本北九州第一日 - 小倉

我地今次一共有六個人，有四個會先坐早上飛機去福岡，先出市區行下。我就坐下午 1:05 飛機去福岡機場，到達時間係下午 5:05，過關同拎行李都好快，半個鐘左右搞惦。今次我係 Budget 訂左架 Toyota Alphard，六個人六件行李，放得晒，冇問題。Budget 間公司唔係機場內，但係機場有個櫃位，不過冇職員既。你要拎起櫃位個電話同佢講你到左，跟住佢先搵架車過黎接你去佢公司。

Budget 租 Toyota Alphard

機場打電話比 Budget

搞晒租車手續都 6:45 ，我先揸去博多車站接返四位朋友。跟住揸一個鐘左右直去小倉既酒店，ARK BLUE Hotel 藍色方舟旅舍。我地係小倉係冇行程，只係住一晚，明早就會去門司港，所以對今晚既酒店冇咩要求。不過呢間酒店間房比想像中大好多，起碼個地下可以開到喼。另外佢地下有個似餐廳既地方，大家可以隨意入去坐下，我地今晚可以買野返黎，係呢度大家一齊食。

晚餐我地去左附近既京寿司 紺屋町店。佢門口寫回轉壽司，入到去，舖唔太大，條回轉帶上冇咩壽司，都係即時同壽司師傅落單，即叫即整，所以件件壽司都脹卜卜，好好味。

食完壽司，我地就行左去激安の殿堂小倉店，賣左激安の殿堂招牌煨番薯、晴王提子、熊本蜜柑、炸物返去酒店慢慢食。雖然香港都開左好多激安の殿堂，都有煨番薯，唔知點解係日本食既煨番薯真係香甜好多。