係酒店食左個簡單既日式早餐，沙律、麵鼓湯及白飯，我地就上車去門司港。由小倉去門司港只須半小時車程，好快去到。
 |
| 酒店食早餐既地方 門司港係九州最北既地方，一海之隔既對岸就係本州山口縣既下関。係明治大正時期，門司港係日本其中一個重要港口，因此現在保留左好多外國風格既古建築物。例如舊門司三井俱樂部、舊大阪商船、北九州市立國際友好圖書館及舊門司稅關。      |
門司港海濱有一條好觸目既吊橋，藍翼橋。呢條橋係日本唯一的步行者專用既吊橋。吊橋每日固定時間打開。（開橋時間 10:00、11:00、13:00、14:00、15:00、16:00 / 關橋時間 10:20、11:20、13:20、14:20、15:20、16:20）
係海濱，你一定會見到香蕉人既蹤跡，而紀念品店內亦有好多關於香蕉既紀念品。點解門司港會同香蕉打上關係呢？原來以前台灣香蕉非常出名，而所有台灣香蕉都經由門司港輸入到日本。因為部份香蕉去到門司港已經熟透，所以商家就係門司港進行露天兜售，而當時既檔販更創作出各種有趣既句語及歌詞。因此係門司港形成一種獨有既香蕉文化。
 |
| 香蕉雪糕 |
係門司港海濱一帶都玩左兩個鐘，然後我地就坐船去本州既下関，船票每位 ¥400 。
去到下関，我地先去春帆樓及日清講和記念館。春帆樓係 1895 年中日簽署馬關條約既地點，馬關條約就係將台灣割讓比日本既條約。而於 1937 年，係春帆樓旁就興建在一座日清講和記念館。去到春帆樓，可以參觀埋旁邊既赤間神宮。
 |
| 春帆樓 |
 |
| 簽署馬關條約 |
 |
| 簽署馬關條約既房間 |
 |
| 赤間神宮 |
下関同門司港出名食雞泡魚，係下関有個好出名既魚市場叫唐戶市場，我地諗住去食雞泡魚。可能因為我地中午先去到，好似已經做完生意，冇咩野睇。
我地去左唐戶市場旁既卡蒙碼頭 Kamon Wharf，有一間叫からと屋既餐廳食雞泡魚刺身。雞泡魚刺身擺盤好靚，將雞泡魚刺身擺到一個圓形。雞泡魚刺身肉身比較有咬口，唔同其他魚咁軟身。味道我覺得淡口，叫做試過，唔會有好想再食既感覺。
 |
| 卡蒙碼頭 Kamon Wharf |
 |
| 雞泡魚 |
由下関返去門司港，我地選擇去行關門海底隧道，呢條隧道全長 780 米，係全世界唯一可以比人行既海底隧道。大家唔好幻想好似水族館既透明隧道，可以見到海底世界。行到入去，佢只係一條好長既普通隧道，睇唔出佢係海底既隧道。唯一比較特別係因為佢橫越本州既山口縣同九州既福岡縣，所有有個位比你影相，打下卡。
 |
| 一個係本州，一個係九州 |
 |
| 關門橋 |
返到門司港，我地就揸車返去小倉。我地去左魚町銀天街，旦過市場及北九州河濱步道行下街。左魚町銀天街，旦過市場係小倉出名既商店街。而北九州河濱步道唔係一條步道，其實係一個大型商場。
 |
| 小倉城 |
晚餐我地去左一間食神戶牛既燒肉店，叫做 おんどる 小倉魚町店。去親日本，一定要去食燒和牛，和牛既油脂比火燒一燒迫左出黎，又香又美味。再配日本飯去解一解油膩感，冇得輸！
No comments:
Post a Comment