幸福地瞓左一晚好覺，一早起身又去浸溫泉。早上露天風呂既景致跟昨晚完全不同。一面浸一面欣賞四周的景色，好開心。 (呢篇 Blog 係 2022 年寫番當時既野，因疫情已經三年冇去日本，冇浸溫泉，好懷念呀！) 早餐當然係日式早餐，有飯、漬物、鍋物、燒魚及甜品等，最後仲有杯咖啡。
 |
| 仲有貸切露天風呂可以免費使用 |
離開前，我地揸車去 B-Speak 等佢開門，買左一件卷蛋蛋糕走。我地今日既目的地係別府，由布院去別府會先駛上山，去到山上，可以停一停狹霧台觀景台，眺望由布院一帶景色。
由狹霧台直駛去別府，並開始別府必做既別府地獄巡禮。十年前巡過一次，今次再黎，相比返十年前既相，景色依舊。我地先去鬼石坊主地獄睇一個個泥漿中噴出既泉水，而一個個圓形既泥漿睇落好似坊主既光頭。
海地獄係最大既地獄，泉水因為溶解左硫酸，所以呈現出瓷藍色。
山地獄其實唔係別府地獄巡禮其中之一，不過順路我地去睇埋。呢度既泉水蒸氣不停地由凹凸不平岩石所組成既山上噴出。
灶地獄既地標就係一個大大既惡鬼像企左係個灶上。而因為祭典時會用此地既蒸氣黎煮食，所以叫灶地獄。
鬼山地獄以泉水飼養鱷魚，所以有好多鱷魚睇。
白池地獄就係白色既泉水，有少少似豬骨湯底拉麵既湯。
一個早上就去左六個地獄，仲有兩個地獄未去。我地都係決定先去醫肚。係別府有種傳統料理方式，就係用熱溫泉既蒸汽進行烹飪，就好似之前講灶地獄祭典時會用既烹飪方法。我地去左一間既地獄蒸し工房鉄輪既店舖。呢度叫野食都幾得意，首先去比錢點想蒸既野食，有包點、海解、牛肉、豬肉、餃子、點心、蔬菜及飯等食物可以蒸。點好後就等職員將我地點既食物分入一個個蒸籠。跟住我地就自己親手將蒸籠放係噴出熱溫泉蒸汽既地方，呢個時候，更係一面放一面影返幾張打卡相。旁邊既職員會幫下手，同計時。時間夠就可以自己拎返去個位食啦。
好啦！我地開始食啦！好唔好味？其實係冇味既，主要靠點醬汁提味。黎呢道食都係貪得意，試下佢地祭典時用蒸氣黎煮食啫。好彩我地仲有個 B-Speak 卷蛋蛋糕，即刻開黎食，呢個真係極好味！
食完野，我地又返去地獄。血池地獄就係睇紅色既泉水。泉水因含有氧化鐵、氧化鎂等物資，所以呈現出血色。
最後一個龍卷地獄係別府市天然紀念物的間歇泉，佢會間歇性由地底猛烈噴出 30 米高既泉水。可能如果比佢噴到 30 米高太危險，所以建造左一個石頂擋住佢。
睇晒地獄都已經下午4:30，我地今晚住係別府海邊既溫泉酒店，叫悠彩の宿望海。呢間酒店只係一座普通既酒店，個露天風呂係天台，都可以望到個海既。可能禽晚嗰間實在太好，有比較下就覺得差左。同行朋友上去睇完個露天風呂話未必去浸。
 |
| 酒店附近係別府塔 |
 |
| 房間望到海 |
 |
| 天台既露天風呂 |
晚餐安排左我地一間獨立房，呢度既晚餐反而比昨晚豐富，五小碟前菜、酥皮湯、天婦羅、刺身、豐後牛鍋物、釜飯及甜品。
食完飯通常都係去浸下溫泉，但因為呢度既露天風呂不太吸引，所以我地揸車去附近既激安之殿堂 Donki 買左蜜瓜、晴王提子及冬甩返去食。
一場黎到，點都要去一去個露天風呂。佢係望到個海，但夜晚黑鼆鼆，咩都見唔到，都係專心沖涼，浸一陣就返去瞓啦！
No comments:
Post a Comment