係希勒勒既腓特烈堡 (Frederiksborg Slot) 擁有北歐凡爾賽宮的美譽，而又被稱為「水晶宮」。可想而知，一定唔野少！腓特烈堡入場費 DKK75，有哥本哈根卡 (Copenhagen Card) 可以免費入場。我地第一日買既哥本哈根卡，終於今日可以出場！(我之前第一日有介紹既張卡：張卡可以免費乘坐哥本哈根區域既交通公具，以及可以免費入去 86 個景點及博物館，就算係 Hillerød 既 Frederiksborg Castle ，以及 Helsingør 既 Kronborg 佢都包，所以好抵用。我地買左 72 小時既 Copenhagen Card，一個人 DDK659。)
腓特烈堡地方好大，除左城堡，仲有個超大既花園。我地係度玩左兩個鐘，都只係參觀左個城堡，冇去到個花園。腓特烈堡個城堡裡面真係好靚，尤其是裡面個教堂，金碧輝煌！其他既房間、通道及樓梯，不論地下，牆身及天花都有雕刻，油畫等裝飾品。
離腓特烈堡半個鐘車程左右，就去到路易斯安那現代藝術博物館 (Louisiana Museum of Modern Art)。我地黎呢度，除左因為張哥本哈根卡可以免費入場之外，佢剛剛好有個短期展覽，展出畢加索既陶瓷作品。畢加索既陶瓷作品都係帶有佢油畫膽鮮明線條既風格。係博物館仲有畢加索創作時既黑白短片，平時只係見過畢加索既相片，今次都係第一次睇見畢加索本人既影片。(原來 Youtube 都有呢段片：https://www.youtube.com/watch?v=X59U4mUqWtw)
我地再揸左二十分鐘車，去到赫爾辛格 (Helsingor)。大家去哥本哈根除左會去今早既腓特烈堡，仲會去埋位於赫爾辛格 (Helsingor)既克倫堡。克倫堡入場費 DKK90，用哥本哈根卡亦可免費入場。克倫堡係莎士比亞名劇「王子復仇記」劇情發生既地方，我對「王子復仇記」冇咩認識，所以冇咩野可以聯想。對比返腓特烈堡，克倫堡簡單好多，好多房間都只係四面白牆。如果安排同一日參觀腓特烈堡及克倫堡，先去克倫堡會冇咁失望。
參觀完克倫堡都已經係下午 4:00，我地竟然係未食午餐。係赫爾辛格有個叫 Værftets Madmarked 既地方，係一個船塢改建既街頭小食中心！我地泊好車係門口，突然落超大雨，由門口行入去Værftets Madmarked 個短短路程都成身濕晒。係Værftets Madmarked 內有不同既街頭小食店，因為時間又唔早又唔遲，所以冇咩人，我地叫左個阿根廷飽，快快食完就赫爾辛格市內觀光。
我地係市內既 Standgade 商店街行左一轉，再入左去一個叫 Bycenter 既商場，大約行左一個鐘左右，因為都冇咩特別野睇，所以大約 6:00 左右就揸車返哥本哈根。
車程大約一個鐘左右，我地揸車返去哥本哈根機場還車，然後坐火車返去市中心既 Norreport 火車站。我地去返第一日既 Torvehallerne 市場外搵野食。時間已經 8:00 多，眼見四周好多舖頭都關左門，附近有一間叫 Antipasti 餐廳，裡面都幾多人，咁我地就入去食晚餐。餐廳似我地香港既快餐店，先比錢買野食。我地一人叫左一個意粉，價錢大約 DDK 125 至 160。呢度既意粉，一份既份量都幾大，又有鑊氣，真係唔錯！
No comments:
Post a Comment