Joseph@外地遊記: 201804 冬遊瑞典丹麥第十四日

2018/04/07

201804 冬遊瑞典丹麥第十四日 - 哥本哈根 (Copenhagen)

哥本哈根既 Nyhavn (新港運河) 係遊客必到既景點，新港運河興建於1671 至 1673年，是當時商業最繁盛的地區。現在新港運河保留著十七世紀建造既顏色鮮豔房屋，並改為酒吧、咖啡店和餐館。

運河上更有很多有特色既木造船隻。遊客可以於新港運河乘坐觀光船，於縱橫交錯既河道上觀看哥本哈根呢個城市，記住有哥本哈根卡可免費坐觀光船，否則要比 DDK80。

觀光船

丹麥皇家劇場

哥本哈根歌劇院

Amalienborg (阿馬林堡宮) 係現時丹麥王室成員既住所，每日中午 12:00 會有士兵換更儀式。有哥本哈根卡既我地，睇完換更儀式，就入去皇宮參觀，睇下近代丹麥王室既歷史及珍藏。

旅程第一日，我地係Torvehallerne 市場食過地道既 Smørrebrød 開口三文治。今日下午我地去左 The standard - Almanak餐廳食高級版既 Smørrebrød 開口三文治。Almanak 係米之蓮推介既餐廳，所以價錢都唔平。一件細細件既開口三文治，價錢由 DDK80至 DDK120 不等。我一個人叫左兩件，食完其實都唔係太飽。雖然佢係貴，但個賣相同味道又真係唔錯。我自己覺得黎到哥本哈根，呢間餐廳係值得一試既。

The standard

下午我地主要跑景點，先去地標 Den Lille Havfrue (美人魚) ，然後行下旁邊既 Kastellet (卡斯特雷特) 堡壘。跟住返去市中心登上 Rundetaarn (圓塔) 睇下眺望成個哥本哈根。

Kastellet (卡斯特雷特) 堡壘

Rundetaarn (圓塔)

Rundetaarn (圓塔) 上

晚餐我地去返旅程第一日預定左既 Olive Kitchen & Bar，呢間餐廳係 Tripadvisor 好高分，晚晚座無虛席。我地香港人係香港食飯，餐廳一定有水供應。但去到外國，一入去就會問你開支咩水，如果你唔想比錢開水，可以叫水喉水 (Tap water)，不過去到高級餐廳，唔叫支裝水好似好奇怪咁。Olive Kitchen & Bar 就好好，佢有無限飲既礦泉水或有氣水，每位 DDK10，終於唔駛就住就住飲水。

Olive Kitchen & Bar

餐廳提供四道菜晚餐，每位 DDK350。頭盤係挪威三文魚他他配牛油果，芒果及青瓜。呢道菜好清新，好好咁開左我地個胃去迎接黎緊既野食。第二道菜係蘑菇湯，超濃既蘑菇香，上面再加左少少松露油，我超鍾意呢個湯。主菜係牛扒，雖然呢間餐廳唔係扒房，但佢既牛扒好有驚喜，肉質外香內軟，非常好味。最後甜品係雲呢拿法式焦糖燉蛋，為呢餐及今次旅程最後既晚餐劃上完美句號。