今日既天氣好差，不時落毛毛雨。我地今日既安排係奧登斯 (Odense) 市內觀光。係房內食左早餐，我地就行去市中心。丹麥有童話王國之稱，而著名既童話書作家安徒生既故鄉就係奧登斯，所以係奧登斯市內可以搵到好多有關安徒生既足跡。
 |
| 自家早餐 |
我地首先去參觀安徒生博物館 (HC Andersen's Museum)，入場費 DKK110，包埋另外四個市內既景點，分別係安徒生出生地 (H.C. Andersen Birthplace)、安徒生兒時故居 (H.C. Andersen's Childhood Home)、歷史文化博物館(Møntergården) 及 打火匣兒童文化中心 (The Tinderbox)。講返安徒生博物館，入到去首先會見到安徒生既石像，安徒生名就聽得多，今次係第一次見到佢個樣，原來佢都好高，面長長，睇個樣比較瘦削。館內有介紹佢既一生，原來佢出身係貧窮既家庭，成長後喜歡出國旅行，一生都冇結婚。行完博物館真係可以了解多左呢個咁出名既人。
係安徒生博物館附近就係安徒生故居，呢度係安徒生 2 至 14歲成長既地方。間屋算細 (但都比香港既屋大好多)，簡簡單單。
 |
| 安徒生故居就係左手邊間屋 |
 |
| 附近既屋都係保留安徒生時期既樣貌 |
係市中心有奧登斯市政廳及 St. Canute's Cathedral 教堂，市政廳冇得入去，所以係門口影張相。教堂就可以入去，教堂內好簡潔，唔太特別。
 |
| 奧登斯市政廳 |
 |
| St. Canute's Cathedral 教堂 |
安徒生兒時故居亦都係一間好細既屋，不過屋後有個小小空地，據說安徒生幻想呢個空地係一個大花園。
 |
| 屋後空地 |
今日我地有特別指定既地方食午餐，我地行過見到有個 Arkaden Food Market，入到去地方好整潔，我地就決定係呢度食午餐。話說我地去左一間買中東包 pita 既舖頭，點左一個 DKK75 既餐，咁個老細就開始整包啦！差唔多整好左個包，佢就收錢，咁我比張信用卡佢，佢話只收 Mobile Payment 或現金，我冇現金，就諗住比 Mobile Payment，即係 Apple Pay 啦。點知佢既 Mobile Payment 原來係指用 SMS 短訊黎比錢。我同佢講話我地冇，我問佢附近有冇提款機，佢同我講左，但好似都幾遠。佢見我地唔知點好，佢同我講請我地食，唔收錢，仲問我地要咩醬汁。嘩！我真係估唔到！好有愛呀！唔怪得丹麥可以成為最快樂既地方啦！咁我身上有少少港紙，我就比左佢就當紀念品！
 |
| 好有愛既小店 |
奧登斯市主要有關安徒生既地方都去晒，我地買果張入場劵包埋個歷史文化博物館 (Møntergården)，所以我地就走去睇下！歷史文化博物館主要介紹菲英島 (Funen) 地區既歷史，展現中古時期既生活，以及奧登斯既發展史。我對呢方面既博物館麻麻地，所以好快就行完。
奧登斯既商店街係位於 Vestergade ，我地行左一陣，入埋去 Magasin 百貨公司。跟住就去左一間叫 Riceteria 既咖啡店飲下午茶。
我地 7:30 左右去到 Gastroteket 餐廳食晚餐。Gastroteket 係一間主打健康飲食既餐廳，食材首選有機蔬菜及符合動物福利農場既肉。菜單由廚師以當日食材決定，兩道菜既套餐，價錢 DDK249。我地當日既頭盤係蝦沙律，唔知心理定係真係有機蔬菜既關係，沙律既蔬菜真係好新鮮同好甜。主菜就係牛仔胸肉，塊牛仔肉可能真係屬於生活係動物福利農場既牛仔，又真係幾好味。二百幾蚊，兩度菜，可能算中上價錢，不過我自己覺得以食材黎講，可以啦！
 |
| 沙律 |
 |
| 牛仔胸肉 |
 |
| 返酒店時見呢條橋幾靚 |
 |
| 橋上影落去 |
No comments:
Post a Comment