Joseph@外地遊記: 201803 冬遊瑞典丹麥第四日 - 基律納(Kiruna)，冰酒店 (IceHotel)

黎到北極圈內，我想去玩下西伯利亞雪橇犬 (Husky) 拉既雪橇，同埋雪地電單車。我上網搵過玩兩個鐘雪橇，通常 SEK1,500 左右，而兩個鐘雪地電單車就 SEK1,250 左右。如果要玩晒兩樣，先由營地玩雪橇出去，跟住返營地，轉雪地電單車出去，跟住又返營地，來回兩次，成四個鐘以上，咁玩法都幾搞笑，而又浪費時間。後來我搵到一間可以出去時玩雪橇，回營地就玩雪地電單車，全程三個鐘，價錢只係 SEK1,250。我地志在玩下，一個價錢，玩晒兩樣，時間又慳左，價錢又平左，啱晒我地！

玩雪橇同雪地電單車既地方係接近返基律納 (Kiruna)。我地早餐食左杯麵及麵飽，執好行李就離開阿比斯庫 (Abisko)，揸車返去基律納。由阿比斯庫去基律納呢條路既雪真係清理得好好，所以我可以以最高速既合法速度駕駛，一個鐘左右車就去到。呢個團個名叫 Dog sledding and snowmobile tour，我地先去換大會提供既禦寒連身衣褲、雪鞋及手套。呢個裝備真係超厚，著左成個人脹左好多，不過佢真係勁禦寒，就算高速玩雪地電單車，風吹過黎都唔覺得凍。

個人好脹

我地四個人，團友 V 及團友 W 先玩雪橇，我同老婆就玩雪地電單車。領隊揸雪橇，團友 V 及 W 做雪橇既乘客。我就揸雪地電單車，老婆坐後面，跟住雪橇行。雪地電單車唔難揸，我地跟住條路行，如果離開左條路，跌左入去鬆軟既雪地就要領隊黎救，我都試過一次轉彎時架車太側，跌左入雪地。玩左一段路，我同老婆就掉位，比佢試下揸雪地電單車，我就坐佢後面。

大約 45 分鐘左右，我地就到左一個帳篷營地。領隊整左熱茶同餅比我地食。呢個時侯，我地可以同雪橇犬玩下，影下相。大約休息左一個鐘，我地就回程。回程就輪到團友玩雪地電單車，我地坐雪橇。回程時可能雪橇犬都累，所以我覺得比去程時慢左。

呢個團個時間控制得好好，我地 9:45 到達，真係 12:45 走，剛好三個鐘！

午餐我地揸車返去基律納市中心一間叫 Pizzeria Sicilla 薄餅店，入到去店內冇咩人，明明 Tripadvisor 既評價好高分，點解冇人既，心諗會唔會中伏架。我地叫左三個薄餅，三個一齊整好送黎，好香！入口之後，唔伏喎！勁好味！間店少人可能因為我地太晏食午餐啫！呢一餐，我地四個人只係食左 SEK338，仲平過係香港食薄餅。

冰天雪地下，冇咩人會係街行來行去。所以我地都只係去左基律納教堂 (Kiruna Pastorat) 行個圈。然後就直接去今晚既酒店 check-in。

我地 3:00 去到今晚住既冰酒店 (IceHotel)。冰酒店位於基律納旁既 Jukkasjärvi 小鎮，揸車去十分鐘左右。世界各地好多地方都有冰酒店，但位於 Jukkasjärvi 既冰酒店係全世界第一間冰酒店。佢係 1990 年開幕，每年夏天時會溶掉，冬天時就由附近既 Torne River 河流取冰重建。酒店既冰房每一年每一間都由不同既設計師設計，所以年年既冰房都唔同。入去參觀冰房就好似去左冰雕藝術館咁。酒店內更有一間冰教堂及冰酒吧，大家可以去教堂參觀及去酒吧飲杯野。

冰酒吧

冰教堂

冰酒店有兩種房，分別係冰房及暖房。我地唔敢挑機住冰房 (Cold Room)，所以選左暖房 (Warm Room) 既北歐小屋 (Nordic Chalet)。北歐小屋有兩間睡房、客廳、簡單既開放式廚房及一個浴室。冰酒店既住客可以免費參加 SEK349 既導賞團，領隊會帶我地去參觀冰酒店及講解冰酒店既製造過程。領隊講到最好笑係當地法規，酒店一定要有防火設施，但試諗諗，冰酒店好少會有火災，如果真係有大火警，間酒店都會溶左，消防設施都跌晒落地啦！