201803 冬遊瑞典丹麥第三日 - 納爾維克(Narvik)

今日我地會揸車去挪威既納爾維克(Narvik) 小鎮行下。早上係旅館食杯麵、麵包及士多啤梨，然後 10:00 出發去納爾維克。

我本來編左幾個景點係去納爾維克既途中，但今日既天氣好差，不停落大雪，所以我都冇停車，直接揸左兩個多鐘車去到 納爾維克。由阿比斯庫 (Abisko) 去納爾維克呢段路既路況唔係太好，成條路都舖滿雪，又上落山，所以要好小心去揸。路既兩旁係高高既積雪，個地又白色，兩旁又係白色，有時跟本睇唔到究竟條路係邊。如果對面線有架摌雪車駛過黎，佢一經過你旁邊，所有地下既雪比佢摌左上天，天同地都白茫茫一片，跟本咩都睇唔到。呢段路真係要有豐富駕駛經驗既先好揸！ (豐富駕駛經驗? 我講我自己?)

摌雪車

納爾維克係一個位於峽灣既小鎮，而佢既海水因為由溫暖既地方流過黎，所以零下十幾度既天氣下，海面都唔會結冰。我地係入鎮前，搵左個地方停一停車，影下個海同山峽。

去到納爾維克，我地將架車泊左係鎮中央既廣場，跟住去一間叫 Fiskehallen 既海鮮檔食午餐。呢間海鮮檔有一邊係賣鮮魚比人買返屋企整，另一邊就係餐廳。因為納爾維克近海，所以佢既海鮮好靚，尤其是挪威三文魚。

午餐我叫左個海鮮湯，湯底係忌廉湯，湯內非常多魚肉，好好味。另外仲叫左個雜魚肉炸既魚餅，好香口。同埋魚柳漢堡，魚柳漢堡既魚柳更係好過快餐店既好多。呢餐全魚宴真係好得，我地四個人食左 NOK920，大約港幣 HK$960。我地係 Fiskehallen 買左一塊三文魚，今晚係旅館既廚房整焗三文魚扒！

納爾維克有一座高少少既建築物，係一間叫 Hotel Scandic 既酒店。係酒店既頂層有一間叫 Narvik Sky Bar 既地方可以欣賞成個鎮既景色。不過我地去到酒店大堂，職員話間 Sky Bar 冇開。

Hotel Scandic

我地轉到鎮內一個大型購物中心 VELKOMMEN 行下商場。

VELKOMMEN 商場

4:00 左右，我地走左去公立圖書館既咖啡室，飲杯咖啡，差一差電，跟住就揸車返去瑞典。

係返到阿比斯庫之前，有一個係山上既 Bjorkliden 渡假村，我諗住揸上山，然後可以睇下阿比斯庫既冰湖景色。不過上到去，又落大雪，咩都睇唔到。

返到阿比斯庫，我地又走左去湖邊玩下同影相。

今晚我地係旅館整左煎牛扒，肉丸同焗三文魚。大約 9:30 左右，我地又出發去追極光，不過個極光指數預測 App 預測今晚係冇極光。我地本著咁遠黎到，點都出去博下，睇唔到未出去影下夜景，影下星囉！