Joseph@外地遊記: 201503 台灣東部第五日

璞拉漫民宿一切都好好，唯獨早餐比較失色。早餐係外賣買返黎既蔥油餅、菜肉包及生果，再加周太太自製豆漿。

璞拉漫民宿的早餐

8:00 開車送綿羊太太去花蓮火車站坐火車到台北，然後佢會轉國光巴士到桃園機場坐飛機返香港。我地送佢上左火車就回民宿等車接我地去賞鯨。

花蓮火車站

花蓮火車站都幾舊

賞鯨係民宿周太太幫我地訂，每位 TWD$750。本來話 9:30 黎接我地，後來遲左 20 分鐘先到，好彩由民宿去碼頭只需十分鐘左右車程。去到碼頭我先知我地光顧呢間公司叫「鯨世界」。今日天氣好好，海面浪不算太大。我地由碼頭出發，大約開左半小時，終於到達目的地，太平洋海中心！

上船既碼頭

我地坐呢架船

出發！

今日我地一條鯨魚都見唔到，但係見到超多海豚，粗略估計都有過百條。海豚品種係飛旋海豚 (Spinner Dolphin)，佢地身形嬌小，喜愛跳出水面，我地見佢地係海面跳出跳入，有幾條海豚仲會游到船頭同隻船鬥快，非常可愛。雖然睇唔到鯨魚，但見到有成百條海豚游來游去，好滿足啦！

飛旋海豚

非常多海豚

佢地好鍾意係船邊跳出水面

12:15 左右回到民宿，民宿周先生介紹我地去附近「大六牛肉麵」食午餐，呢間野真係幾得，牛肉好入味，紅燒湯好鮮甜，麵質彈牙！食食下我地見民宿周太太都過黎食，佢見到我地問我地點解識黎呢間食！我地話周先生介紹我地囉！

大六牛肉麵

午餐後，我地開車去七星潭，七星潭其實唔係一個潭或湖，而係一個海灣。我地係海邊下左一陣，然後打算去七星柴魚博物館參觀，點知今日原來係休息日，入唔到去睇。

七星潭海邊

七星柴魚博物館門口

我係七星柴魚博物館門口攞左張單張，介紹阿美麻糬工廠 (小米文化館)，好似唔係好遠，咁我地就決定去睇下。我一心諗住有得玩下整麻糬，點知去到得個大賣場，試下食，買下野。我使鬼開車黎工場試咩？花蓮市內大把阿美麻糬舖頭試食啦！浪費晒我 d 時間！

阿美麻糬工廠 (小米文化館)

冇人開工既生產線

冇得整麻糬，開車去食下午茶！我地開車去提拉米蘇精緻蛋糕位於花蓮的總店。提拉米蘇是花蓮馳名的甜品店，分店開於台灣不同地方。提拉米蘇招牌甜品當然係提拉米蘇(Tiramisu) 啦！我覺得呢個 Tiramisu 係經過改良配合台灣人口味，跟意大利正宗很不同，缺少了酒味及比較硬身！一般一般，但勝在夠平！

提拉米蘇精緻蛋糕

我的下午茶

回到花蓮市中心，泊車於花蓮文化創意產業園區旁，然後入園區參觀。花蓮文化創意產業園區前身為花蓮酒廠，現在改為舉辦文藝活動的地方。我覺得跟台北的松山文化園區好相似。

花蓮文化創意產業園區

古舊的建築

花蓮的曾記麻糬有種手工麻糬好好味，唔買都要去試食下

花蓮金三角商圈附近有一個叫舊鐵路行人徒步區的地方，是舊時花東鐵路穿過花蓮市區的一段鐵道。不過鐵道已經拆走，只用地磚舖出鐵道的模樣，好假！

舊鐵路行人徒步區

食飯前先回民宿休息一下，今晚我地去非常出名既鵝肉先生。去到鵝肉先生，佢話鵝肉買晒，要等半小時。如果我地要等就幫我地留半隻，半小時後回來，好勁咁喎，我地梗係叫佢留比我地啦！我地係附近行下，比老婆發現一間叫 101 文具天堂的店舖，裡面有佢最鍾意既馬騮公仔，咁就比佢買左幾隻返屋企！

有人買左好多馬騮

回到鵝肉先生，我地點左半隻鵝肉、一碟鵝翼、一碟菜及一人一碗粉。鵝肉切成一塊塊肉片，好似潮州打冷既鵝片，入口淡淡肉，幾好味。我地三個人一共 TWD$545，超平。

鵝肉先生

花蓮有兩個夜市，自強夜市及彩虹夜市。彩虹夜市比較新，聽說規模都比較細。我地先去彩虹夜市，夜市得一條百多米既街，行一兩分鐘行完，真係好細，人亦很少，冇咩氣氛。去到自強夜市，整個夜市都係遊人，人氣爆燈，有好多小吃檔仲要排除。大家去花蓮，可以唔去彩虹夜市，直接去自強夜市就可以啦！

彩虹夜市

今日晚餐只係食左鵝肉，仲有大把 Quota 係夜市食野。自強夜市最多人光顧係林記燒番麥，即係燒粟米。林記燒番麥唔同平時夜市的燒粟米檔仔，佢係一大個舖位，有座位比客人坐低慢慢食。林記的粟米係自家種植，品質控制到最好，客人先由軟、Q、硬三種粟米選一種，然後磅重計錢，跟住選擇辣的程度，大約等十五分鐘就燒好。呢條燒粟米真係好得，燒得不會太乾，粟米粒仲有粟米既汁及甜味。我記得十幾年前初初黎台灣旅遊，第一次食燒粟米係超好食，跟住呢幾年去唔同夜市都食唔番，唔係太乾就太硬。今次終於食到好好味既燒粟米！