201506 日本四國第一日 - 関西空港，神戶

四國，一個已經想去好耐既地方。三年前已經 Plan 好左行程，不過當時日元高企，計計下數，去九日既使費仲貴過去歐洲，所以冇去到。最近日元跌得好勁，而又訂到廉航機票，所以四國之旅終於成行！

坐廉航去関西空港

架機叫「腸粉」

我地坐下午 2:55 機去関西空港，晚上 7:30 到達，比預定時間早左 10 分鐘。不過過海關要排好耐隊，攞埋行李，足足搞左一個鐘。好啦！又係去提款機提日元啦！今次用獅子銀行提款卡攞左 ¥100,000，銀行戶口扣左我 HK$6340.26，匯率即係 0.0634。當日香港百年匯率係 0.06315，差個少少，點解仲咁多人去百年排大隊唱錢既？

去到日本都天黑啦

排隊提款

本來想租左車先，然後一路開車去神戶，一路睇下途中有咩食。但實左太肚餓啦！所以先係関西空港醫肚。係日本第一餐，我地光顧了「がんこ壽司」。我叫了一份吞拿魚魚生套餐，套餐除左有不同部位的吞拿魚魚生，仲有天婦羅、豆腐、湯、飯及漬物，價錢 ¥2000，好抵食！

がんこ壽司

好多野食

刺身有三款唔同部位既吞拿魚

8:30 去 Toyota 攞車，今次上網租車不斷三心兩意。最先預訂了 Corolla Fielder，後來睇見 Sienta 好平就轉左訂 Sienta。跟住上網睇，好多人都話 Sienta 唔夠力。我地成個行程靠架車走遍四國，好似租架好少少既車比較好。最後轉左租 Puris α 混能車，行李箱夠大放四件行李，既慳油、又好力、又舒服！

租車，唔駛 15 分鐘搞好晒手續，仲借埋 ETC 卡

我地架 Puris α 混能車

我地架 Puris α 混能車

9:40 開車出發，因為太夜，我地唔會直去四國，今晚會係神戶住一晚。由関西空港去到神戶已經晚上 11:00 多。我地快快 check-in ，泊好車，上房沖涼，然後馬上瞓覺。今晚既酒店叫「カサベライン神戸 (Casabella Inn Kobe)」，其實只瞓一覺，所以冇咩要求，平平地，乾乾淨淨就算啦！

カサベライン神戸 (Casabella Inn Kobe)

間房好細，張床好細，瞓幾個鐘，算啦！