Joseph@外地遊記: 201506 日本四國第三日

今日我地會去小豆島玩，而我地架 Puris α 會由得佢自己係酒店停車場。去到小豆島就租另一架車仔。今早本來想去高松火車站買人氣名物章魚便當做早餐，去到賣便當間舖頭，佢話冇章魚便當，點解架？我地只好去火車站買麵包上船食。

高松火車站有個笑面

早餐食麵包

去小豆島有普通船及高速船兩種，我地坐 9:10 高速船，每位 ¥1170，船程只係 35 分鐘。到達小豆島土庄町碼頭，唔好以為一出碼頭就可以租車，我打算去既 Orix 租車公司，由碼頭行去要五分鐘左右。去到 Orix ，佢話冇車喎，吓？咁點算好？Orix 其中一位伯伯，佢識少少英文，我問佢仲有冇其他地方可以租車，佢叫我去附近一間叫 Ohkido hotel 酒店既櫃台試下。我地行到去酒店，又真係有車租喎，不過比 Orix 貴。我地租左一架三菱既車仔，個樣好似 IQ 博士揸既車，租金係 ¥7500。本來 Orix 租一架車四千幾日元已經可以，而家貴左三千幾日元。估唔到星期一都咁多人租車，大家去小豆島租車記得上網預訂定先啦！

我地坐船去小豆島

買船飛

坐後面隻高速船

船上

到達小豆島, 先去睇下地圖

小豆島土庄

去酒店櫃枱租車

租左呢架車仔

租完車都 10:20 ，我地先去小豆島オリーブ園 (小豆島橄欖公園)。小豆島氣候類似歐洲地中海一帶，所以適合種植橄欖。而因為小豆島與希臘的米洛斯島結為姊妹城市，所以係橄欖公園會有希臘風車同希臘既藍頂白小屋，風景好似地中海沿岸一帶。

小豆島橄欖公園

橄欖樹

睇到瀨戶內海

圓形花園

希臘風車

有個幾靚既花園

好希臘既小屋

希臘式教堂

小豆島有一家叫「野の花」，是用小豆島當地食材既創作料理，網上評價好好，我地開車去到，竟然又 Full Booking，冇位冇得食。點解小豆島星期一都咁多人架？

野の花, 環境好好

有得睇, 冇得食

唔知食咩好既時候，即刻用手機上 Tabelog 搵下附近有咩食。突然醒起小豆島素麵非常出名，而島上有一間叫「小豆島手延べそうめん作兵衛」，可以參觀素麵工場，又有得食麵，不過今日星期一休息。所以我都係搵下附近仲有冇素麵食。原來係橄欖公園旁邊有一家叫「平井製麺所」，好！就去呢間啦！

平井製麺所

去到平井製麺所，門口有一個麵檔，不過冇人。我走入去旁邊小賣部問有冇麵食，裡面個姐姐話有，然後走去麵檔開檔煮麵。佢整左一人一碗素麵比我地，真係好素，菜都冇條！一入口，大家即時「登」一聲，好味呀！小豆島素麵非常幼細，入口彈牙，熱天食一碗冷素麵，簡直涼透心！埋單時四碗麵一共 ¥2200，收錢位姐姐仲送左四包素麵比我返屋企自己煮，好開心！

小豆島素麵

坐露天位食小豆島素麵

走時送我地四包小豆島素麵

寒霞溪係日本三大溪谷美之一，我地由橄欖公園去到寒霞溪纜車站，大約二十分鐘車程。搭纜車時可以欣賞到壯闊既溪谷風景及奇形怪狀既岩石，我覺得成個寒霞溪最靚係呢個位。上到山頂站，我地都唔知有咩睇，所以只係走去鷹取展望台，鳥瞰瀨戶內海既景色。

坐纜車上山

山谷美景

上到山頂

行山路去鷹取展望台

沿路好多高高大樹

鷹取展望台

我地經銚子溪方向山路走，經過上山落山既路，呢架車仔真係唔惦，落山時居然剎唔切車，搞到衝左過對面行車線，好彩冇對頭車，呢 d 車仔都係唔好開咁快！行行下車，我地見到有個觀音像，就走入去影張相。

行山路返土庄

經過見到個觀音像

安全返到去土庄町，我地先去土渕海峡影張相。呢個海峽係全世界上最窄既海峽，並且入左健力士紀錄大全。影完相見肚餓，我地走去海峽旁一個大型超級市場買魚生食。四國出名鰹魚，我專登買左一盒鰹魚刺身，真係堅好食！

土渕海峡說明牌

土渕海峡

食刺身

鰹魚

小豆島最後一個景點，就係天使の散歩道，天使の散歩道係一條一日只出現兩次如夢似幻既路。實情係一條連接小豆島及余島既砂路，每日潮退時，天使の散歩道就會係大海中現身。另外仲有一個有關呢條路既傳說，傳說係話跟重要既人一齊手牽手走過呢條路，就會永遠得到幸福。今日下午 3:26 潮退，我地 4:20 去到，已經退得好勁，條天使の散歩道好闊，唔似係一條會消失既路，睇落冇咩特別。其實應該開始潮退時黎到，睇住條路慢慢出現會比較特別。