201506 日本四國第八日 - 広島, 宮島

我地冇加錢係酒店食早餐，(因為加好多錢，好鬼貴)，酒店大堂有一間便利店，我地就係裡面買麵包食算啦！酒店有架快速船直去宮島，半個鐘左右就到，非常方便，但代價係超貴，來回船票，一個人要 ¥3300。慳左早餐錢，就坐快船去宮島！

超貴既船去宮島

今朝既早餐

我地坐 9:30 船，真係 10:00 左右就去到宮島。宮島既大鳥居係「日本三景之一」，對外國人黎講， 一諗起日本，就會諗起呢個位於海上既鳥居，宮島鳥居簡直係外國人心目中日本既標誌，所以係宮島會見到好多好多外國人。我黎左咁多次日本，今次都係第一次黎，真係有少少唔好意思！

日本三景之一

落左船，真係好多人，黎左日本八日，呢度係見到最多人既地方。大鳥居係嚴島神社一部份，我地向神社方向行，沿路會見到有梅花鹿係度走來走去，好似奈良咁，但冇奈良咁多鹿。呢度既鹿會伸個咀去你手袋偷野食，所以要小心！我地經過左一個公園，沿海邊行就去到表参道商店街，街上有好多賣宮島蠔既專門店，仲有宮島名物楓葉饅頭，另外仲有好多手信店。

表参道商店街

表参道商店街

表参道商店街

經過左表参道商店街就會去返海邊，海上大鳥居就出現係眼前。一路向前行，大家既焦點全落在大鳥居身上。去到嚴島神社入口，比左入場費就可以入去參觀，嚴島神社建於約公元593年，有約一千四百年歷史，神社最特別係建於水上，好少神社係咁樣興建。

鹿鹿四圍走

水中鳥居

鹿鹿都睇下個鳥居

梗係要合照啦

嚴島神社入口

成個神社都興建係水面

行完晒都差唔多 12:00，搵野食時間。黎到宮島，一定要試宮島蠔，不過呢度冇烤蠔放題，只有餐廳內一客客烤蠔。我地去左一間叫「とりい」食麵及蠔，一客六隻烤蠔 ¥1360，因為都唔平，我地只係叫左兩客，每人食得四隻，到喉唔到肺。係廣島有隻廣島可樂，大家可以試下，味道好似細細個時，係學校小食部買既維他可樂，好有童年回憶！

午餐的餐廳

廣島可樂

除左食蠔，仲有烏冬

廣島蠔

食完到喉唔到肺既麵同蠔，我地返到表参道商店街，買下手信，又試下食楓葉饅頭，剛剛出爐熱辣辣既楓葉饅頭，又真係幾好味架！仲有免費熱綠茶比你配楓葉饅頭！

楓葉饅頭

我地坐 2:00 船返酒店，放底手信係房，然後立即開車去廣島市中心觀光。廣島最為人熟悉既就係經歷過原子彈爆炸，我地第一站就係去原子彈爆炸遺址 - 原爆圓頂屋。原爆圓頂屋本來係廣島縣產業獎勵館，位於爆炸中心附近，爆炸後附近一帶都夷為平地，只有圓頂屋冇倒下，後來就成為一件紀念原爆既建築物。

原爆圓頂屋

圓頂屋旁邊就係相生橋，相生橋成 T 字形狀，當年美軍以呢個容易識別既地標黎投放原子彈。當年原爆中心一帶，而家係廣島平和記念公園，公園內有個收集原爆資料既廣島平和記念資料館。資料館內資料好豐富， 大家一定要去睇下，了解下原子彈既威力同當年廣島受破壞既情況。

廣島平和記念公園

廣島平和記念資料館

資料館講解原爆既模型

經歷過原爆既三輪車

原爆後既相片

廣島有一間美術館叫「ひろしま美術館」(廣島美術館)，館內居然有梵高 (Van Gogh) 同畢加索 (Picasso) 既畫。我地係佢收工前剛好到達，真好彩。美術館其實得一層，好細，展品唔太多，行十幾分鐘就行完。但係日本可以睇梵高同畢加索既畫， 好神奇！

廣島美術館

廣島美術館

大約 5:00 ，要食下午茶啦！午餐食左幾隻蠔，唔係好夠，所以我地下午茶去左廣島港一間自助燒蠔既小店，店名叫「カキ小屋 宇品店」。呢間野除左燒蠔，仲有其他海鮮燒，不過我地主力燒廣島蠔。入到店內，開爐費 ¥300 一個人，包餐具、手套。而一盤 1kg 既蠔就 ¥1000，大約有10 至 12 隻，平過中午既蠔一半有多。呢間店有位叔叔好熱心，教我地燒，每一枱都有個沙漏。位叔叔教我地用個沙漏黎計燒蠔既時間，我地跟住做，又真係燒到剛剛好，唔會熟到乾晒，又唔會太生食左肚仔痛。我地食完一碟又一碟，超越大滿足。

カキ小屋 宇品店

店內

又燒蠔，又燒蝦

美味燒蠔

燒左個幾鐘蠔，之後我地去左附近 YouMe 商場行下，又去世嘉打下機，書店扮下偽文青同去 Edon 電器店行下。大約 9:20 再揸車去一間「太閤うどん」既小店食晚飯。我食左個烏冬鍋，開頭以為係好普通既烏冬，放係一個鐵鍋上面煮，食食下，發現鍋內有飯，食完烏冬就變左食湯飯，好特別，同食到好飽。

太閤うどん

我食好大碗既烏冬飯

冷烏冬

宵夜係酒店食生果