201506 日本四國第六日 - 祖谷温泉，松山，道後溫泉

為左去浸溫泉，今朝 7:00 左右起身，立即坐纜車去谷底。入到去露天溫泉，裡面已經有兩個人早過我浸緊。佢地浸左一陣就離開，淨番我一個人包場。我計一計，架纜車來回要十五至二十分鐘，即係我起碼有十五分鐘可以自己一個人浸。襯呢個機會，我更係拎部電話入黎影下相啦！

一早去浸溫泉

8:30 去返禽晚食晚餐既地方食早餐，早餐依然好精彩，一碟碟精美小碟，仲有條燒魚。呢間旅館真係正，坐纜車去浸溫泉已經好特別，間房又舒適，食物質素同賣相又好，職員服務又體貼，而成間酒店所有地方都面向山谷景，冇得頂！9:30 我地執埋行李去接待處比錢，個年青既職員比左張單我睇，然後我就比張信用卡佢碌，碌左簽個名就走啦！

早餐

好豐富，好精緻

離開前係門口合照

祖谷溫泉有個必到既景點，就係旅館附近岩石上既小便小僧。據說以前有細路跟旅客係岩石上鬥大膽，而呢個小便小僧就係跟據呢件事整出黎。

小便小僧

小便小僧

離開祖谷，向松山方向進發。大約揸左兩個鐘車，去到松山市內既松山城。松山城於 1602 開始建築，二十五年後，於 1627 年建成。要上松山城，可以乘坐吊車或吊椅，我地到達前因為落過雨，吊椅仲濕，所以暫停開放，只可坐吊車上山。吊椅睇落好似好好玩！上到山，遊人唔係太多，好悠閒，好舒服。我地慢慢行去天守閣，上去參觀下。老實講，特別就冇咩特別，同大阪城，熊本城差唔多，呢度係多左個吊車坐下咁啫！

松山城坐吊車

吊車

吊椅好似好好玩

松山市

松山城既天守閣

天守閣內

天守閣上睇到既松山市

午餐我地去左一間創業於 1635 年既鄉土料理餐廳「五志喜」。1635年呀！係三百八十年歷史，一間餐廳做左三百幾年，好鬼勁！愛媛縣既美食有五色素麵及鯛魚，黎到五志喜就可以試下。五色素麵既麵條真係有五隻色，因為麵條分別加入雞蛋、抹茶、梅子及蕎麥，所以做出唔同顏色。不過一大堆麵入到口，大家個口有冇可能分別出呢幾種味？我就唔得啦！鯛魚做成刺身，跟德島既釜飯唔同食法，刺身更食出魚既鮮味。

五志喜

好豐富既午餐

鯛魚刺身好靚

五色素麵

五色素麵仲可以買返屋企

午餐後，我地去左松山著名商店街「大街道」行下，跟住走左入三越買左兩支最近好流行既日本威士忌。大約行到 5:00，就揸車去道後温泉。

大街道商店街

買左兩支威士忌

道後温泉跟有馬溫泉及白浜溫泉並列為「日本三古湯」。道後温泉位於松山市內，揸十分鐘車就到，非常平易近人。我地先去今晚住宿既「茶玻瑠」Check-in。茶玻瑠創業於 1967 年，差不多有五十年歷史，不過佢有全面裝修過，所以入到去感覺好新。茶玻瑠算係中型溫泉旅館，露天溫泉設於天台。房間方面，傳統和室，地方夠大。

松山市內既電車

茶玻瑠

我間房

茶玻瑠對面就係「道後温泉本館」，温泉本館係日本首個公共浴場，成座建築物係三層木結構。據講宮崎駿「千與千尋」內既湯屋都係參照温泉本館畫出黎，所以好古色古香。黎到道後温泉，唔浸都一定要黎睇睇。

道後温泉本館

道後温泉本館

温泉本館旁就係道後商店街，穿過商店街就會見到道後溫泉站，呢個站保留左明治時期的建築樣貌，旁邊仲停泊左舊式蒸氣火車(少爺列車)。如果時間夾到，可以去坐下呢架少爺列車遊覽松山市。

道後商店街

道後溫泉站

少爺列車

我地預約左 7:30 食晚餐，有少少時間多，我地揸車去松山市既 AEON Mall 超級市場入下貨，買左啤酒、蜜瓜同蘋果。

AEON Mall 入貨

超級市場內

返到酒店，換返件浴衣，跟住就去一樓餐廳食晚餐。呢間餐廳裝修好西式，我其實比較鍾意坐地下，日式榻榻米上食日本料理。今日呢餐其實都唔差，不過禽晚祖谷溫泉個餐太精彩，一有比較，精美度、份量及質素，呢餐就輸左啦！

食晚餐

其實非常不錯架

不過跟昨晚比就失色了

飯後著住浴衣走出去溫泉街行下及到道後温泉本館影下相。我見到都好多人食完飯去温泉本館沖涼，搞到我本來冇諗住去浸，都改變主意去試下。我地走返酒店，再拎住酒店提供既小竹籃及小毛巾，然後出發去温泉本館。温泉本館收費都幾複雜，佢地下就係神之湯，二樓有休息室，三樓有專用個室，休息室有茶點供應。如果只去地下神之湯，價錢就最平，去埋二樓又貴少少，上埋三樓就最貴。我地旨在感受下懷舊氣氛，所以只係去地下神之湯。神之湯係傳統舊式浴場，入到去睇見牆上既畫，出水既水龍頭，全部都好有歷史。黎呢度沖涼，浸溫泉，你唔好以嘆緊，享受緊既心態黎，因為呢度完全唔豪華。應該以參觀歷史，感受古人情懷既心態，先可以領略到當中既趣味！

著住浴衣係温泉本館前, 真係好似去返古時日本咁

晚上既道後温泉本館

神之湯 (相片來自道後温泉本館)

回到酒店，試下頭先係超級市場買既蜜瓜，好甜，好鬼甜，好鬼死好味！食到入口，唔駛講野，個個都心心眼！

道後啤酒

超甜蜜瓜

宵夜後就去酒店天台既露天溫泉又浸下，今日一日內浸左三次溫泉，好過份！係酒店浸溫泉跟剛才温泉本館真係完全不同，呢度可以浸係度，望下天，睇下星星，爽爆！

茶玻瑠天台露天溫泉 (相片來自茶玻瑠網站)

茶玻瑠室內溫泉 (相片來自茶玻瑠網站)

有個小插曲想講講，話說今日去松山市既車程中，我用 iPhone 睇下 email，突然見到祖谷溫泉間旅館發左個 email 比我，仲用英文寫，不過係日式英文，我完全唔知佢想講咩！我估下估下，佢應該係話收少左錢。我即刻睇返今日張碌卡收據，佢只係收左我 ¥1200，係禽晚晚餐時開左支酒既錢，佢完全冇收我 ¥61,600 房錢。我覆佢 email 話比佢知佢真係收少左錢，跟住我就等佢再覆我。呢件事聽日繼續發展！