201506 日本四國第九日 - 姫路

今晚會坐 8:40 飛機由関西空港返香港，但我地仍然身處廣島，由廣島去関西空港有 380 公里，我地要去関西空港一係坐新幹線去新大阪，再轉火車去関西空港，一係就慢慢揸車返去関西空港。經我計一計，四個人坐新幹線係勁勁勁貴，去到新大阪又要轉車，所以同慢慢揸車去唔會慳好多時間，但慢慢揸車去就慳好多錢。

早上酒店望出去既景色

我地 9:00 開車，揸左 45 分鐘，先係小谷服務站食個早餐。然後再揸兩個半鐘去到姫路城。由廣島去関西空港呢段遙遠既路程，我就係中途加左姫路城呢個景點。姫路城跟松本城及熊本城被稱為日本三大名城。姫路城跟一般日本城堡好唔同，一般城堡都係以黑白為主，但姫路城以白色的外牆為主，係陽光照耀下好似白色既珍珠，閃閃生輝。

小谷服務站

服務站內好多店舖

我早餐食呢個心心飽

揸車去姬路

泊左架車係動物旁既停車場

姫路城

姫路城既遊客主要係日本本地人，而今日剛好係星期日，所以姫路城既遊客非常多，我地入停車場都要排一陣隊。入去姫路城參觀既人龍由城外排到城內，入到城簡直多人到水洩不通。本來我以為一個鐘左右可以參觀完姫路城，而家搞左超過兩個鐘，搞到我冇時間食午餐。

姫路城

排大隊入城

裡面都勁多人

上到最高一層，有個小神社

城上看姬路市

城上看姬路市

姬路城以兩條大柱為主軸，呢條係其中一條

正面既姬路城

合照時間

2:30 離開姫路城，揸左 40 分鐘車，去到明石服務站，快快食個午餐，然後直駛去関西空港。

明石服務站

食牛肉飯

大約去到神戶開始塞車，塞左都有十幾公里，大約去到環球片場先唔塞。係過関西空港聯絡橋之前，我地要駛離高速公路去入油，因為一過左橋就冇油站。大約 6:00 我地終於到達関西空港！

係機場還左車，跟住去 check-in，過完海關，係上機前我地去「がんこ壽司」食晚餐。九日前剛到日本又係機場食「がんこ壽司」，九日後既今日又係機場食「がんこ壽司」，不過呢間係禁區既「がんこ壽司」冇出面間「がんこ壽司」咁好食！

呢餐壽司麻麻地