201506 日本四國第七日 - 道後溫泉，大久野島，広島

酒店既早餐相當唔錯，有好多愛媛縣特產，都幾有特色。我地 9:30 出發，不過今朝又開始落雨，溫度跌左好多，有涼意。今日我地既行程係揸車經過瀨戶內海既大島、伯方島，然後去到大三島既盛碼頭。係碼頭連人帶車坐船去大久野島，即係兔仔島，睇完兔仔就坐船去對面岸本州既忠海碼頭，跟住落廣島。

酒店食早餐

有好多特色野食

開車去大三島中

連接大三島及生口島既多々羅大橋

我地雨中揸左兩個鐘車去到碼頭，係個非常簡陋既碼頭，四周圍咩野都冇，人都唔多個。我行去一個好似售票處既地方問下個伯伯，原來真係同佢買船飛。我一次過買晒兩程船飛，架車連一位司機一程收 ¥1990，另外每一位乘客一程 ¥310。11:50  左右隻船開門比我地揸架車上去，準時 12:00 開船，船程只係 13 分鐘，好快到。

等上船

我地架車上左船

可以去船既上層坐下

係架船度都仲落緊雨，我好擔心落雨搞到兔仔變晒濕毛雞，未冇野睇？不過好神奇，我地一落船，雨就停左，真係講都唔信！架車落左船就要停係一邊既停車位，因為大久野係唔比車行既，我估係驚唔小心車到兔仔。我一落車，附近草地上既兔仔已經即刻跳過黎搵我，佢地完全唔怕人，可以話係見人就衝埋去。唔駛幾秒，我已經被十幾隻唔同色，唔同大細既兔仔包圍，佢地真係勁可愛。(佢地冇變濕毛雞！)

碼頭旁既草地, 勁多兔仔

完全唔怕人

我地一早係超級市場買定紅蘿蔔黎餵兔仔，班兔仔見到有野食，開心到死！我地係碼頭邊個草地餵下兔，影下相，唔覺唔覺就玩在成 40 分鐘。

餵兔仔

餵兔仔

餵兔仔

食緊紅蘿蔔既兔仔

有 BB 兔

中間隻跑緊

呢兩隻休息緊

大久野島上有間酒店 (休暇村) ，我地打算去食午餐。由碼頭沿海邊行去酒店，路程唔係太遠，不過沿路依然勁多兔仔，我地又唔忍心唔同佢地玩下，所以都行左半個鐘先去到。酒店既餐廳 1:30 關門，我地剛剛 1:29 入到去，佢肯做埋我地生意，真係好彩，如果唔係成個島冇其他野食！我叫左個烏冬餐，十分鐘就送到黎，我花十分鐘左右就食晒。睇下個錶仲可以即刻埋單，然後坐 2:00 酒店免費車返碼頭，再趕上 2:13 船去本州既忠海碼頭。臨上船前，我都仲有少少時間同碼頭旁既兔仔玩左一陣。

酒店內有張大 Poster 比遊客影相

賣咖啡都用兔仔做招牌

食午餐

冷烏冬

另一個餐,唔記得咩名

上船前見到呢隻好細既 BB 兔

佢真係超細隻

由大久野島坐船去忠海碼頭，只係 13 分鐘。落船時，忠海碼頭好多人。其實大部份人去大久野島都係坐 JR 去忠海，然後再坐船過去。好少人好似我地咁由四國穿過大久野島玩返上本州。

由忠海揸車去廣島，大約一個鐘。我地先去位於廣島港既 Price Hotel (グランドプリンスホテル広島) check-in，呢間酒店位於海邊，因為附近得呢個建築物係咁高，所以都幾觸目。

到達廣島,見到當地既電車

我地住呢間酒店

我間房

都見到海景架

放低左行李，休息一陣，我地就揸車入去廣島市既本通一帶行下街，本通一帶好似大阪難波咁，有商店行、有商場、有百貨公司，不過更係冇咁大型啦！行到7:30 左右，我又靠 Tabelog 幫我搵左一間回轉壽司，叫「のん太鮨」。都係不過不失既回轉壽司，唔會有驚喜！

本通一帶商店街

Jump Shop 門口見到悟空

有大百貨公司

仲有激安之殿堂

晚餐既地方

其實都唔差

好啦！講返祖谷溫泉酒店收少左錢單野，今日我繼續同佢用 email 來往，我繼續估佢 email 既英文想講咩，大致上我估佢想搵我收返錢，我話比佢知我今晚係廣島既 Price Hotel，我仲比埋房號比佢，佢話今晚 9:00 黎搵我。嘩！佢由祖谷黎到廣島都幾遠喎！我準時 8:45 左右返到酒店，我同大堂職員講一陣會有人搵我，黎到就打電話去我房叫我落黎。我一上到房，電話就嚮起，祖谷溫泉酒店個人真係準時 9:00 到達。我走去大堂，原來係一位約五十多歲既中年男士，佢比張卡片我，嘩！原來係老闆，佢親自黎搵我收錢！佢不斷同我 Say Sorry，我都唔好意思要佢長途拔涉黎廣島，佢話揸左四個鐘過黎，嘩！來回未要八個鐘！我快快比錢佢，等佢可以早 d 返去，走前佢仲送左佢地酒店既護膚品以表歉意。