Joseph@外地遊記: 201506 日本四國第五日 - 琴平，大歩危，祖谷温泉

今日冇落雨啦！好野！一早 9:00 ，我地執埋行李上車，揸一個鐘車去到琴平，參觀金刀比羅宮。金刀比羅宮係日本最難參拜既神社，因為神社位於山上，去最遠既嚴魂神社要走 1368 級樓梯。金刀比羅宮供奉著稱爲「金毗羅」既海上守護神，佢主要為信眾去除疾病、消災避禍及帶來好運。

開始爬上去金刀比羅宮

我地去到金刀比羅宮先經過兩旁開滿舖頭既表參道，我地鎖定左兩間著名既舖頭，一陣行完金刀比羅宮就係度食午餐。我地 10:30 開始出發行樓梯，沿路都有停下影下相。大約行左45分鐘，終於行左 785 級，去到御本宮，御本宮已經係金刀比羅宮最主要既宮，要去最遠既嚴魂神社，起碼行多大半個鐘樓梯，我地都係放棄。係御本宮參觀完個寺廟，高眺讚岐平原，我地就落樓梯，返去表參道食午餐。落樓梯經過「こんぴら狗の銅像」(金刀比羅犬銅像)，原來又有個故仔。以前參拜既人未必可以長途拔涉親身黎參拜，就派狗仔代佢地去金刀比羅宮，呢個銅像就係紀念呢班狗仔。

好彩途中都有野影下

行左 365 級,有平路行下

行左 500 級,有隻神馬

金毗羅係海上守護神,所以有好大型既船車葉

呢段都幾甘

行左七百幾級, 終點在望

御本宮

望返讚岐景色

金刀比羅犬

落山比上山快好多，二十分鐘就回到表參道。我地午餐就去左一間有六十幾年歷史既讚岐烏冬老店「こんぴらうどん」，正正經經試下正宗讚岐烏冬。我地入到去店舖最入面既座位，座位旁牆身竟然有張小丸子一家係呢間店食烏冬既漫畫，仲要係坐中間呢張四人枱。我地見到，識坐更係坐小丸子都坐既呢張枱啦！我地每人叫左一份跟天婦羅既湯烏冬。熱辣辣既湯烏冬，入口真係堅正，同禽日自己整既烏冬真係唔同。人地煮始終預到時間，剛剛好，唔會太硬或太軟。

讚岐烏冬老店「こんぴらうどん」

小丸子都黎食

我地坐小丸子坐過張枱

天婦羅既湯烏冬

食完烏冬就去左對面間「灸まん」食甜品。琴平最有代表性既和果子就係「灸まん」，開車進入琴平，沿途四周都有「灸まん」既廣告，非常厲害，另外呢間舖既羊羹都好出名。我地叫左一份灸まん加羊羹及一杯薄茶既套餐，另外再加多一客宇治金時。

灸まん

店內隨便座底食甜品

宇治金時

呢粒就係灸まん, 後面係羊羹

大約 1:00 開車離開琴平，出發去大步危，車程大約一小時十五分鐘。大步危係位於吉野川既溪谷，溪谷兩邊全是灰色岩石，配上平靜既河水，型成美麗既風景。我地去到大步危，走左去坐大歩危峡観光遊覧船，每位 ¥1080。黎睇峽谷，坐觀光遊覧船係不二之選，坐係船上，以接近水面既角度，睇見平靜河面反映兩旁既岩石及樹木，我都估唔到大步危既景色可以咁驚喜！

去到大步危

大步危溪谷

去座大歩危峡観光遊覧船

上左観光遊覧船

好美既溪谷

水中有倒影

坐完船，開車駛前少少就係「道の駅大歩危」，係呢度有個妖怪博物館，叫做「妖怪屋敷」。本來都想入去睇下，不過有人好似有 d 驚，而入到去又唔比影相，所以冇玩到！

妖怪屋敷

門口都有少少妖怪睇

向山上駛入去祖谷溪，有一條日本三奇橋叫「かずら橋」，中文叫祖谷藤橋。呢條橋以樹枝為主要材料，睇落好似用藤做，所以叫藤橋。行上條橋，會感覺到條橋不斷擺動，而橋面以木條砌成，木條同木條之間有兩吋空隙，都幾觸目驚心！我地見好多人都好驚咁扶實扶手，一步一步咁叫住向前行，好好笑架！另外係藤橋出口行過少少有一條瀑布，都幾有型，順路可以去睇埋！

入祖谷溪時見到好靚既大繡球花

係路邊野生都咁靚

祖谷藤橋

入口

橋上影落橋面,剛剛好夠一隻腳闊

好彩我唔怕高既

藤橋出口行過少少有既瀑布

今晚我地住係祖谷温泉既「和の宿ホテル」，呢間野都好出名，因為佢位於峽谷上，而佢個露天溫泉要坐佢專用纜車落山谷底先浸到，成件事變得好好玩！我地由藤橋揸車沿窄窄既山路去到「和の宿ホテル」，到達時大約 5:20。我地先入房休息，房間不算太大，以摩登日式設計，有張按摩椅。另外有一部 BOSE Wave Music System，佢有幾張專係為溫泉設計既音樂 CD，我是但放一張入去聽，部 BOSE 既聲好靚，隻 CD 既音樂好安寧，好悅耳，好配合溫泉旅館洗滌心靈既主題。