Joseph@外地遊記: 201506 日本四國第二日 - 淡路島，鳴門，德島，高松

今早 8:30 出發，先開半小時車，經過明石海峽大橋去到淡路島。一進入淡路島，左手邊就係淡路SA (Service Area)，即係公路既休息站。呢個 SA 應該係大部份觀光客都會停既 SA，因為淡路 SA 除左有比一般 SA 大既商店及餐廳，仲有摩天輪及可以欣賞雄偉的明石海峽大橋美景，及瀬戶內海的風光。而我地仲順便入去 SA 內既餐廳食早餐。

淡路SA既摩天輪

淡路SA

早餐

明石海峽大橋

食完早餐，係淡路 SA 影下相。跟住就開 15 分鐘車，去到「あわじ花さじき」賞花。呢個花園好好架，佢種左好多不同品種既花，任何季節黎到都一定有花睇。最正係免費入場，我真係好好奇，究竟呢個花園靠咩野維生呢？我地呢個季節剛剛有紫色既馬鞭草花海，跟薰衣草差唔多，真係好靚！

あわじ花さじき賞花

四周都有呢 d 繡球花

有日文字既路牌, 特別好 feel

好多唔同顏色既花

種得好靚

唔同顏色既菊花

有隻蜜蜂同隻蝴蝶

隨便影都好靚

呢 d 係唔係薰衣草?

馬鞭草花海

馬鞭草

冇用 Photoshop 執架, 旁邊 d 花真係冇色架

係 Tabelog 網站 (類似香港 Openrice 既日本網站)搵左附近一間叫「麺乃匠いづも庵」既小店食午餐。開車去到，嘩！好多人係門口等，即係代表呢間係好野啦！我地等左十五分鐘左右就有位啦！呢間小店食烏冬為主，我地見佢個招牌菜係淡路島名物洋蔥烏冬，我就叫黎試下。呢個洋蔥烏冬對我地呢 d 見識少既人黎講，真係第一次見咁樣食法。一整個洋蔥切開少少，切到好似含苞待放既花咁，然後成個拎去炸。炸好既洋蔥放係醬油湯上，再配上冷烏冬，好特別。我平時好少成隻洋蔥食，但淡路島既洋蔥真係好甜，唔怪得呢間店敢成隻洋蔥上啦！

麺乃匠いづも庵門口好多人

等緊位

店內

洋蔥烏冬

湯烏冬

飯後要食下水果先夠健康。我地揸十分鐘車去到「淡路島フルーツ農園」摘士多啤梨食。入園費 ¥1300 一個人，每人帶一桶水入溫室，摘左既士多啤梨可以用呢桶水洗一洗先食。唔知係唔係唔啱季節，呢度既士多啤梨唔係太大隻，入口又有帶酸，同九州既士多啤梨比，差好遠。

淡路島フルーツ農園

摘士多啤梨

摘左既士多啤梨

最靚呢粒

去淡路島必去睇鳴門漩渦，我地去左坐 3:30 開出既観潮船「日本丸」。去到鳴門海峽，瀨戶內海與太平洋兩邊的水相遇，形成好多不同大小既漩渦。而我地係船上近距離睇漩渦，好正！大家去鳴門一定要出海睇下！

坐船既碼頭

日本丸

開船啦

鳴門漩渦

另一種睇鳴門漩渦的方法就係去位於大鳴門橋內的渦の道。渦の道是大橋下的通道，大家可以行到漩渦 45 公尺高上方，透過地下的玻璃觀看漩渦。不過漩渦唔一定出現係玻璃正下方，所以都未必睇到，我覺得坐船出去睇比較實際。

渦の道

要經過呢條又大風又凍既通道

渦の道

透過地下的玻璃觀看漩渦

面向太平洋

睇完漩渦就開車去德島食晚飯，食完晚飯就去「阿波おどり会館」睇 8:00 開始既阿波踊舞。晚飯我地去左會館附近一間叫「とりぞう」既小居酒屋。我地去到居酒屋先係 6:30，大把時間食。黎到德島更係要試下當地出名既阿波美雞，另外仲有鯛魚釜飯。呢間居酒屋得一兩個廚師，所以上菜都幾慢，我地本來大把時間食，但佢搞到 7:40 先黎個釜飯，個釜飯又熱，我地又要快食，突然變得好鬼趕。

とりぞう居酒屋

小店內,後面就係廚房

開餐啦!

右下角就係阿波尾雞

左下角係鯛魚釜飯

仲有大雞翼

最後我地遲左少少，8:05 先去到「阿波おどり会館」。阿波踊舞已經有四百多年歷史，每年八月德島都會舉辦阿波踊舞祭典，不少人於街頭跳阿波踊舞，非常熱鬧。好似我地咁，唔係八月去既朋友，就可以去「阿波おどり会館」睇阿波踊舞表演。阿波踊舞步法簡單，音樂節奏輕快，大家不其然會跟舞者手舞足蹈。去到表演尾段，台上會請觀眾出去一齊跳，好好玩！

阿波おどり会館

阿波おどり会館內

阿波踊舞

漂亮既浴衣

有小朋友表演

觀眾都出左去跳

走前同舞者影張相

今晚我地會住係高松既「JR ホテルクレメント高松」(JR hotel clement takamatsu)，並且會住三晚。由德島去高松，車程約一小時十五分鐘，我地去到酒店都已經 10:15。呢間酒店位於高松 JR 站對面，又近碼頭，地點一流。我地住既房面向無敵海景，房內仲有兩邊窗，非常光猛。浴室浴缸旁有一大玻璃，可以一路浸浴、一路睇風景，不過後來我發現塊玻璃唔係單面玻璃，出面係可以望到入黎，所以之後浴室塊玻璃窗全程拉底窗簾。