201506 日本四國第四日 - 高松

今日天氣好差，一早落雨，原本打算下午坐船去直島，然後租架單車係島上睇下草間彌生既大南瓜，地中美術館及直島銭湯。而家唯有取消，留返係高松市！

早上我地都仲有個節目，就係去學整讚岐烏冬。我一早預約左 10:00 去「中野うどん学校」上堂，我地早少少 9:30 就去到。揸車途中見到有間「激安の殿堂」及 YouMe 商場，啱啦！今日都冇咩野做，一陣整完烏冬就去行下！

中野うどん学校

開始上堂，一位老師對我地四個學生。首先比一舊粉團我地，然後就用條棍壓扁佢，跟住用刀切成一條條既烏冬，做完！仲比個牌我地同自己整既烏冬影相。唔係掛，咁就完？原來仲有教我地搓舊粉團，原來唔係用手搓，係要用腳踩。老師突然播放強勁音樂，然後拎幾件樂器出黎，叫我地一路跟音樂跳，一路踩個粉團。咁樣整烏冬，好好玩，又好好笑！和牛就話要比音樂佢聽，原來烏冬都要！跳左十分鐘舞，老師見我地舊粉團都合格，終於放人，可以上二樓食自己整既烏冬。我預先訂埋天婦羅，唔駛齋食烏冬咁慘。

搓粉團

切麵條

烏冬製成品

大家既製成品

用腳踩

食自己整既烏冬

配天婦羅

學完整烏冬，雨都仲未停，我地揸車去左「激安の殿堂」行下。呢間野好鬼大間，好多野賣。我地行左大半個鐘，其實未行完，不過想去埋 YouMe 商場睇下。YouMe 商場內有百貨公司，又有大型運動舖 The Super Sports Xebio 及大型電器舖 Edion，唔覺唔覺都行左兩個鐘。

激安の殿堂

有斬鑊

YouMe 商場

YouMe 商場內

買左好多野

行到 2:45，要去食午餐，高松市食骨付鳥好有名，即係燒雞肶。我地去到一家叫「蘭丸」既骨付鳥名店，點知佢下午落場，冇開門，冇得食！我地只好係附近搵下有咩食，點知間間都落左場，冇野食。我地見有間三越百貨公司，我估裡面應該有餐廳仲開門掛。去到三越，好彩仲有日間食日式西餐既餐廳，佢做埋我地生意先落場。我食左個日式咖哩豬扒飯，好正宗既日式咖哩，唔辣，帶甜！

搵野食

三越內食午餐

我食咖哩豬扒飯

食完之後，行左一陣三越，大約 5:30，見冇雨，決定去高松市內既栗林公園行下。栗林公園係四國地方最著名既庭院，更被指定為國之特別名勝，春天係賞花，秋天係賞紅葉既名所。我地雨後去到，就係喂蚊既好地方！雖然栗林公園真係好大同好靚，但真係太多蚊，咬到我彈下彈下咁行。我地快速地行一圈，快速地影左相，快速地閃人！

栗林公園睇地圖都覺得大

入口既園景

有湖有樹, 真係幾靚架

好奇特既樹

掛滿雨水既松葉

園中其中個湖

任何一角度都好靚

仲有楓葉, 如果秋天變成紅葉, 一定好壯觀

仲有大草地

呢棵樹好型, 伸左出個湖

有枯山水

呢種樹好得意

6:30 啦，但因為太晏食午餐，所以仲未想食晚餐。我地再去「激安の殿堂」行下。大約 8:00 ，我地開車去之前經過見到既「燒肉きんぐ」食燒肉放題。燒肉放題既好處係咩都有得食，種類多，但唔好處係量多但唔精。食物好好好普通，都係好似上次係佐賀，搵專食和牛既燒肉食好好多！

再去激安の殿堂

燒肉きんぐ食燒肉放題

食燒肉放題