Joseph@外地遊記: 201510 南法秋遊第七日 - Aix-en-Provence (埃克斯)，Marseille (馬賽)，Nice (尼斯)

2015/10/26

201510 南法秋遊第七日 - Aix-en-Provence (埃克斯)，Marseille (馬賽)，Nice (尼斯)

係埃克斯住左兩晚，今朝執好行李，等屋主 Michel 黎做埋 Check-out 手續。Michel 問我地今日去邊，我地打算全日於埃克斯行下，黃昏左右就揸車去尼斯。Michel 話其實埃克斯唔係太多野睇，佢建議我地去馬賽既 MuCEM 同守護聖母大教堂 (Notre Dame de la Garde)。我唔去馬賽其實因為聽聞馬賽治安好差，但 Michel 話其實小心少少就冇問題，例如泊車要泊去有 CCTV 既室內停車場。我地即時上網睇下 MuCEM 同守護聖母大教堂，又真係好似好靚，所以決定行完埃克斯，跟住去馬賽，然後尼斯。

埃克斯既圓亭噴泉

埃克斯有水都之稱，不過唔係因為好似威尼斯咁好多水道，而係因為市內有非常多大大小小不同既噴泉。我地由米哈博林蔭大道 (Cours Mirabeau) 出發，行經市政廳廣場 (Place de l’ Hotel de Ville) ，去到救世主教堂 (Cathédrale Saint Sauveur)，最後行返去市內最大既圓亭噴泉 (Fontaine de la Rotonde)。老實講，埃克斯呢幾個景點其實真係冇咩特別，好彩今日天氣唔太凍，慢慢行下，睇下市集，都幾舒服。

米哈博林蔭大道

街上既小噴泉

市政廳廣場

救世主教堂

救世主教堂內

埃克斯街頭

市集

另個小噴泉

圓亭噴泉

午餐我地去左一間係 Tripadvisor 都排幾高位既店 O'Bagel。呢間野專賣 Bagel，有好多不同配料選擇，我見都幾大隻，我地每兩人分一隻食。雖然呢間野都幾高分，不過我真係唔係好識欣賞 Bagel。

O'Bagel

午餐

1:30 左右，我地由埃克斯揸一個鐘車去到馬賽，第一個目的地係 MuCEM，我地係 GPS 輸入左 MuCEM，並諗住泊 MuCEM 個停車場。當地到附近，轉黎轉去都搵唔到係邊度入去 MuCEM 個停車場，轉左一個大圈，後來駛左入去一個地下隧道，個停車場入口原來就係隧道內，真係估佢唔到！

MuCEM (歐洲與地中海文明博物館) 於 2013 年開幕，獨特摩登的建築站立於海港旁，建築物上仲有一條天橋連接中古城堡。因為時間關係，我地冇入到去 MuCEM 內部睇既！不過淨係睇下呢個建築，睇下海灣風景，影下相都已經非常開心，Michel 真係冇介紹錯。

馬賽港灣

Cathédrale La Major 馬賽主座教堂

Villa Méditerranée 地中海別墅文化博物館

MuCEM

MuCEM 連接中古城堡天橋

我地由 MuCEM 揸車去山上既守護聖母大教堂，上山條路又斜又窄，揸住架棍波車，終於停完燈起步時，死左火，呢度係今次旅程唯一死火既地方！上到去教堂，教堂前有位免費停車。教堂位於馬賽市內 154 米高山丘山，居高臨下可欣賞馬賽港蔚藍海岸及古老市區既景色，教堂本身建於1214 年，以不同顏色大理石建造出獨特外貌，而教堂的 46 米高鐘樓上矗立了一座金色聖母像。教堂內部亦非常華麗，可以用金碧輝煌來形容。睇完 MuCEM 同守護聖母大教堂，真係又要讚多次 Michel ，馬賽真係一個好地方！

山上看馬賽市

守護聖母大教堂

金色聖母像

守護聖母大教堂外雕像

守護聖母大教堂內

守護聖母大教堂外雕像

大約 5:00 ，我地揸左一個半鐘車去到公路上既休息站，休息站叫 (Vidauban Service Area)，我地既晚餐就係呢度食。本來以為好似日本既休息站，好多人，好多野食。點知錯晒，冇咩野食，同唔好食。不過驚去到尼斯太夜，餐廳關晒門，所以我地照係度食左餐唔好食既晚餐。

休息站

睇個樣都知唔好食

食完晚餐，我地再揸一個半鐘，大約 9:00 就去到尼斯。我地今晚開始，會住係 Hotel Massena 四晚，亦係南法最後住既酒店，跟住我地就會上巴黎。Hotel Massena 位於市中心馬塞納廣場 (Place Massena) 附近，地點非常好。不過亦因為位處市中心，泊停車場超貴，我地揸架車四圍搵，好彩搵到街邊停車位，仲要過左 8:00 唔駛比錢。