Joseph@外地遊記: 201510 南法秋遊第三日 - Pont de Gard (杜嘉水道橋)，Nimes (尼姆)

今早 8:45 出門口，因為酒店冇包早餐，我地開車去附近一間叫 Marie Blachere Boulangeriea 既麵包店。一入店內已經聞到新鮮麵包香，店內有一列麵包櫃，放滿好靚既麵包、撻、批。麵包櫃後面就有一班麵包師傅，即製新鮮出爐麵包。係法國食麵包，首選一定係牛角飽，呢度四隻牛角飽都只係 €2.4，我再買左一個 €1.2 既蘋果酥，一個€0.85 既法飽及一杯€1.4 既 Nespresso 咖啡，兩個人一共只係食左€5.85。佢店內有幾個位，可以坐低，食完先走。呢間麵包店真係無得頂，好味、又平！

Marie Blachere Boulangeriea 食麵包

好多好靚既麵包同撻

今日我地會去 Pont du Gard (杜嘉水道橋) 及 Nimes (尼姆)。由酒店開車去杜嘉水道橋只係要 30 分鐘，好快就到達！杜嘉水道橋係古羅馬所建造的輸水系統，主要將水源運去當時既大鎮尼姆。水道橋大約於公元前19至20年建造，建造時間歷時十五年，現在已經有二千年既歷史。而歐羅五元紙幣上就係印左杜嘉水道橋，可以知道杜嘉水道橋係歐洲當中係幾咁重要！呢度一架車既停車錢包五個人入場費，一共 €18。今日天氣非常之好，藍天白雲，我用 iPhone 影出黎既相都好靚，另外我地仲見到紅葉。秋天既法國，真係極美！

一落車就見到紅葉

杜嘉水道橋上望落去既風景

杜嘉水道橋

河對岸既建築物

係杜嘉水道橋都逗留左差唔多兩個鐘，因為真係太靚，影相影到唔捨得走。由杜嘉水道橋開車去尼姆，都係半個鐘左右，大約 1:00 到達尼姆。

我地將架車泊左係 La Coupole des Halles (圓頂市場) 既停車場，圓頂市場好似亞維儂既中央街市，市場內又係有賣肉、魚、菜既檔，又有幾間熟食檔。呢度既熟食檔好多人幫襯，好似好吸引。不過因為佢只有法文菜單，都唔知點叫，所以我地冇係度食！

圓頂市場個圓頂

我即刻係 Tripadvisor 搵下有咩食，我地唔知點解走左去一間冇咩人既餐廳，叫做 Le Nil，食左餐埃及菜。埃及菜真係未食過，佢有塊好似印度薄餅既野，包住肉、豆蓉，再點醬咁食，味道好似中東菜咁好濃烈。正唔正宗我又真係唔識，好唔好味？一試無妨既！

Le Nil 門口

埃及菜

食完飯都已經 2:00，我地只有幾小時去遊覽尼姆既景點，因為尼姆既景點都幾集中，全部步行可以到達。首先我地去 Arenes de Nimes (尼姆競技場)，係售票處買左 €12 既 Pass "Nîmes romaine"，呢張套票包三日內參觀尼姆競技場、Maison Carree (卡利神殿) 及 Tour Magne (瑪涅塔)。我地就好勁咁幾個鐘睇晒人地預你三日睇既野！

尼姆競技場係一個建於公元70年既古羅馬圓型競技場，就好似係細版既羅馬競技場。要影晒成個競技場，可以去觀眾席山頂既地方，影番落去中間個圓形場區。我地大約半小時就參觀完尼姆競技場。

古羅馬圓型競技場

古羅馬圓型競技場對面既建築物

古羅馬圓型競技場對面既餐廳

古羅馬圓型競技場內

行返去市中心既 Maison Carree (卡利神殿)，其實「Carree」即是四方既意思，所以呢個神殿可以叫方形神殿。神殿建設於公元前16年，我覺得好似細版既羅馬萬神殿 (Pantheon)。據說卡利神殿係現今保存得最好既古羅馬神殿。而家神殿內係一間現代化既放映室，定時放映有關尼姆各時期既英雄人物 3D 影片。我地冇咩時間，所以冇入去睇！

卡利神殿

卡利神殿對面有座全玻璃現代化既建築物，係 Carre d'Art (當代藝術中心)，跟神殿一新一舊，好大對比，大家可以留意下！

尼姆市內有一家歷史悠久既老餅店 Maison Villaret，餅店開業於 1775 年，據聞佢有種叫 Caladons 既杏仁蜂蜜餅非常出名。我地去到呢間餅店，坐低叫左件杏仁蜂蜜餅，再飲杯咖啡。呢塊杏仁蜂蜜餅，我又唔覺有咩特別，反而呢家店既 Macaron 幾好食！

經過呢個鱷魚噴泉，好似都幾有名架!

老餅店 Maison Villaret

餅店內

飲下午茶

杏仁蜂蜜餅

Macaron 幾好食

餅店外既小廣場

跟住我地行去 Jardins de la Fontaine (噴泉花園) 內一個小山丘上既 Tour Magne (瑪涅塔)。先講講個噴泉花園，呢個法式園林花園內有個好大既水池，其實係以前既儲水池，水源就係由今朝去過既杜嘉水道橋，一路流到呢個水池，並供水給整個尼姆。而瑪涅塔建於二千年前，站立於城市最高點，佔據有利既戰略位置，大家走到塔上可以眺望整個尼姆市既風景。

噴泉花園入口

建係水池上既花園

瑪涅塔

瑪涅塔內就係要上呢條樓梯

瑪涅塔上睇尼姆城

尼姆街上的小運河

5:30 左右，我地完成尼姆既觀光項目，食晚飯又好似太早。所以我地決定開車返去亞維儂酒店附近個商場先食晚飯。我地大約 7:00 返到亞維儂，我之前係網上睇過，好多人介紹一間廉價抵食既連鎖自助餐廳 Flunch 餐廳，呢個商場剛好有一間，我地就走去睇下。餐廳係先取食物再付費，配菜就冇限任食。我其實冇所謂可以試一試，不過有人唔係好鍾意，所以冇得試，唯有下次黎法國先試囉！