今次法國十四日旅程，主要係去南法既普羅旺斯及蔚藍海岸一帶，最後有兩日會去上返去巴黎。秋天唔係南法既旅遊旺季，因為冇薰衣草睇，所以我地行程主要係去下小鎮及山城，跟下名畫家梵高既足跡。
 |
Pont du Gard (杜嘉水道橋) 前既風景
|
二十號晚，我地坐 23:20 既德國
漢莎航空 (Lufthansa)，先飛慕尼黑，再轉機到馬賽機場。今次係我第一次坐漢莎航空，架飛機好新，最特別係佢既洗手間，全部集中於飛機既下一層，呢個設計好好，唔會再有被迫坐洗手間旁既位置。我地班機預計 05:35 到達慕尼黑，而我地只有一小時十五分鐘去轉機，時間都幾趕。當差唔多到德國前，機長話預計 6:00 到達，即係遲到？我地只係得 45 分鐘左右轉機，好似好趕！因為我地坐係飛機比較後既座位，一陣一定好遲先落到機，我問空姐可唔可以掉我地坐前些少，空姐話幫我睇下前面有冇位。佢之後返黎話今日班機好滿，頭等同商務都冇位，不過佢叫我放心，下一班機知道我地坐呢班，會等我地！
 |
| 我地坐呢架漢莎航空飛機 |
 |
| 架機好新 |
架飛機一停定，我地以極速彈起身，趁其他人都未起得切身時，即刻有咁前去咁前！落左機繼續急步去過海關，再衝去下一班機既閘口。途中我伸手入個袋搵野，哎呀！我部相機呢？死啦！放左係頭先班機個位度，唔記得拎。平時落機我一定會回頭睇下個位，頭先太趕，冇睇到就落機，一次既大意就出事啦！
我已經冇時間返轉頭搵，唯有同飛法國呢班機既閘口職員講。佢地幫我打左個電話問，好似冇咩消息。佢叫我地先上機，去到馬賽機場就去報失中心報失！好奇怪！我唔見左個相機，心情好似冇咩野，心諗「算啦！冇左個相機，用 iPhone 影囉！返去 Claim 旅遊保險啦！最可惜係影唔到 Wide 既相同夜景！」可能係出發時唔見相機既打擊比之後輕，因為我而家只係唔見相機，冇咩相係裡面！
 |
| 飛法國呢程機都有野食，個紙盒仲好靚 |
 |
| 到左法國，我地就係坐呢架機由德國去法國 |
 |
| 呢架機細好多 |
去到馬賽機場，係早上 8:25，天氣都幾凍，即刻變裝，著返厚衫同褸。跟住就去報失中心報失，個職員話係機倉唔見既就要打去漢莎問，佢仲即刻打印左一張漢莎聯絡電話及電郵既紙比我，真係好人！(我後來發現讚錯左佢！) 我嘗試打電話去問，但打極都打唔通，我只好寫一封電郵去問。如想知呢單唔見相機事件既發展，第六日會再講。
淨係坐飛機都寫左咁多野！好啦！正式開始南法秋遊啦！請睇下一篇！
No comments:
Post a Comment